Read Wahau Kenyah RUM 3 Bible Online

RUM 3 - Wahau Kenyah bible

RUM 3

¹Buk pekina, inu nco lepoʹ Yahudi neng lepoʹ diaʹ ca tupe? Inu bang neng adet sunat ina tupe?

²Kadoʹ bang nge, dalem kadoʹ naʹan janan. Iaʹ ading nge, Allah ban naʹ tiraʹ a me lepoʹ Yahudi.

³Kumpin buk palai mida abeʹ un ngelan neng tiraʹ a? Ke senteng puyan nte diaʹ abeʹ un ngelan dina ke cuk Allah lepo dau ue tupe?

⁴Nyahut de senteng ne. Bang Allah iaʹ atek teneng lan. Naʹ pe mung kelunan iaʹ palo, abeʹ Allah palo. Koʹ baʹan dau iaʹ un dalem Kitap Tuhan: “Ahaʹ Tuhan, atek luhaʹ ban teneng ngkoʹ dalem dau tiraʹ koʹ. Atek koʹ un usun tegoʹ dulu ke pebetep dau neng ikoʹ.” Pekina dau Kitap.

⁵Buk ban puyan penyalaʹ le iaʹ ke peluhaʹ penelit Allah, ngan ban kuʹun penyalaʹ le kenai luhaʹ peniga cen Allah, inu iaʹ ilu ke pisiu laʹa tupe? Salaʹ ban Allah buk ke ngukum ilu baʹan dau le? (Akeʹ pisiu ini koʹ baʹan dau dulu are.)

⁶Nyahut te ke pekina ne. Kumpin Allah ke pebetep dau neng usun tanaʹ ini, buk ke are ke telit lan tupe?

⁷Buk ke palo dau heʹ ke pempau Allah ngan peluhaʹ puyan penelit te petem seʹ keʹ mepit peniga ha, buk pekina, abeʹ un iaʹ ukoʹ Allah ke ngukum akeʹ koʹ baʹan kelunan diaʹ un penyalaʹ are?

⁸Buk le bayaʹ dau kimet ini, masaʹ pekini dau katuk le: “Talan pe ilu uyan jaʹat apan nai te peniga ʹo.” Pekina dau palai kelunan pejaʹat dau neng akeʹ, diaʹ badaʹ akeʹ ban pekatuk pekina dau me dulu. Atek tekep lete kelunan dina ke sihoʹ ukum ʹo.

⁹Naʹkini kumpin tupe? Ilu lepoʹ Yahudi ne, pelapa tiga le neng lepoʹ diaʹ ca bʹan ncem? Nyahut te pekina ne. Moʹ lepa ne akeʹ badaʹ a neng surat ceʹ ini, pekuaʹ te lepoʹ Yahudi ngan lepoʹ diaʹ ca, moʹ mung le ban lenca kentaʹ pengaren penyalaʹ.

¹⁰Koʹ baʹan dau dalem Kitap Tuhan: “Abeʹ un aheʹ kelunan tai teneng, ca usa pe abeʹ un.

¹¹Abeʹ un aheʹ iaʹ tisen pekimet. Abeʹ un aheʹ iaʹ tai mita Allah.

¹²Mung nte ban tai pupa nyelikut Allah. Ketai re mung neng iaʹ abeʹ un tuman. Abeʹ un aheʹ iaʹ uyan tiga, ca usa pe abeʹ un.

¹³Dau isiu re jameng koʹ baʹan jameng ca adam liang are. Melai re pelingu dulu Luʹung luʹung tiraʹ de koʹ baʹan laʹit ncung ulai liban are, iaʹ un neng sada paʹ de.

¹⁴Paʹ de sangan kuʹun tunoʹ iaʹ laʹit.

¹⁵Nyiʹan kala taket de tai pemusa dahaʹ kelunan.

¹⁶Bayaʹ janan nte, muʹo tasaʹ ngan pincaʹ ne.

¹⁷Janan udip iaʹ tadan, abeʹ de tisen ne.

¹⁸Abeʹ de tisen katuk iaʹ takut neng Allah pe.”

¹⁹Tisen en ilu are, ban mung dau tiraʹ Katuk Adet Musa ina ke sihoʹ neng mung kelunan diaʹ mudip kahum kidi, apan ne ke mempeng ukan mung nte diaʹ ke mipau dau Allah. Lan ne Allah ke ngahum mung kelunan kusun tanaʹ ini kedalem ukum me ne.

²⁰Abeʹ un aheʹ iaʹ tai teneng ngan Allah moʹ kuʹun pemuyan ne bayaʹ Katuk Adet Musa. Moʹ Katuk Adet Musa ke cuk ilu kelunan ke ngetisen penyalaʹ de.

²¹Naʹkini ban nai luhaʹ ne janan Allah ke peteneng ilu kelunan, tengen pe puyan katuk adet. Naʹ pe ia tengen, lepa ne Katuk Adet Musa ngan tiraʹ diaʹ pegawa Tuhan cen naʹaʹ ban badaʹ tugen neng idi.

²²Allah ke peteneng ilu kelunan tai teneng ban kuʹun pengelan le neng Yesus Keristus. Pekina pemuyan Allah neng mung diaʹ ngelan Keristus. Abeʹ Allah selepeʹ neng kelunan,

²³moʹ mung le ban uyan penyalaʹ ngan tai coʹ tepa le neng serema peniga Allah.

²⁴Un ʹo Allah mencai tuaʹ le pengelesau ue me ilu kelunan, ina ukoʹ le mung tai teneng ngan ne ban kuʹun Keristus Yesus, iaʹ nakau ilu cen penyalaʹ le.

²⁵Allah ban mencai Yesus ca ncai petutung, iaʹ ukoʹ ke uyan udip iaʹ ke menting kenca Allah ke nai sihoʹ ilu kelunan, bayaʹ ban pengelan nte neng ia. Pekina Allah mencai Yesus, idi ie peluhaʹ janan ne ke peteneng ilu tai teneng ngan ne. Cen naʹaʹ kena kenai Yesus, Allah ban mekep penyalaʹ kelunan ngan denaʹ tawai ie.

²⁶Un sepuʹo naʹkini, Allah sau penyalaʹ le apan ne peluhaʹ se ban lan ne peteneng ilu tai teneng ngan ne. Neng pemuyan ini, luhaʹ ban Allah un peneneng, laʹa ia ke peteneng mung diaʹ ngelan neng Yesus.

²⁷Buk pekina, kempi ne jum idai ʹo tupe? Nyahut te un ne laʹa. Moʹ kuʹun inu ue abeʹ un tupe? Moʹ kuʹun ban le bayaʹ dau Katuk Adet taʹin mo? Naʹun, di lareʹ kuʹun ban moʹ le ngelan neng pemuyan Keristus.

²⁸Sen dau heʹ ne: kelunan ketai teneng ngan Allah ban kuʹun pengelan nte le, abeʹ e kuʹun pemuyan nte ban bayaʹ dau Katuk Adet.

²⁹Un Allah ina ban anun lepoʹ Yahudi tuaʹ le mo? Naʹun. Allah ina anun mung lepoʹ, peging ngan diaʹ tahaʹ awang Yahudi.

³⁰Moʹ Allah ne iaʹ lan ne bang ca le. Ia ke peteneng lepoʹ Yahudi moʹ cen pengelan nte, pekina pe lepoʹ diaʹ tahaʹ awang Yahudi dina moʹ cen pengelan nte lete.

³¹Kumpin dau sen ina tupe? Un seʹ moʹ meʹ ngeratang Katuk Adet Musa man katuk pengelan ini mo? Naʹun, abeʹ pekina puʹo. Iaʹ lan ne ameʹ diaʹ pedaʹam Katuk Adet Musa ne.