Read Wahau Kenyah RUM 4 Bible Online

RUM 4 - Wahau Kenyah bible

RUM 4

¹Inu ke baʹan le neng seʹ pemuhan pengudip Ibrahim iaʹ tepun le kelunan lepoʹ Yahudi ne?

²Buk lan Ibrahim ban tai teneng ngan Allah kuʹun pemuyan ne, ke jum me neng pemuyan ne ia. Lan ne abeʹ e senteng jum dau kata Allah.

³Un dau dalem Kitap Tuhan pekini dau ue: “Ban Ibrahim ngelan neng Allah, ina ukoʹ kuʹun pengelan ne, Allah naʹ ia teneng.”

⁴Palaʹ dulu diaʹ pegayeng, un te bang nge. Abeʹ le pisiu bang nte ina koʹ baʹan ca pengencai tuaʹ le, moʹ o atek ban penalan nte.

⁵Pekina lete Allah pekimet ilu kelunan ne. Palaʹ aheʹ diaʹ abeʹ un mita peneneng kuʹun peniga gayeng nte, bang ngelan neng Allah le ida, Allah ke naʹ ida teneng ngan ne lete, kuʹun pengelan nte ina. Allah iaʹ senteng petelit ida diaʹ ban muau.

⁶Koʹ baʹan dau Daut badaʹ diseʹ penyaheʹ kelunan diaʹ Allah ban kuma teneng, moʹ abeʹ Allah peteneng ida kuʹun ban gayeng nte, ina ukoʹ de saheʹ laleʹ le. Pekini dau Daut:

⁷“Bangen saheʹ ne diaʹ tisen ban Allah sau salaʹ de, moʹ abeʹ de taʹan toʹ penyalaʹ de iaʹ cen kena idai laʹa.

⁸Bangen saheʹ ne diaʹ tisen ban Tuhan abeʹ un pubo penyalaʹ de.” Pekina dau Daut.

⁹Kumpin bangen saheʹ iaʹ baʹan dau Daut ina: bang diaʹ ngkang adet sunat ina tengen le un ne mo? Naʹun. Moʹ lepoʹ diaʹ ca pekuaʹ lete ida ke un ne. Lepa ne ameʹ badaʹ tiraʹ neng Kitap Tuhan iaʹ kuma ha: “Ban Ibrahim ngelan neng Allah, ina ukoʹ kuʹun pengelan ne Allah naʹ ina teneng.”

¹⁰Midan ne pekina dau tupe? Un ne kena, buk are uʹo ho ti adet sunat tupe? Ahaʹ kena ha ti adet sunat, abeʹ e uʹo ho ti ie.

¹¹Neng kebayaʹ a Ibrahim ti adet sunat, ca tedanaʹ iaʹ badaʹ ban Allah lepa naʹ ia teneng, ban kuʹun pengelan ne tuaʹ le kena ha un adet sunat. Ngan pekina Ibrahim nuyan amai neng mung kelunan diaʹ ngelan palaʹ Allah, ida diaʹ Allah ban naʹ teneng ngan ne, naʹ pe ida abeʹ un adet sunat.

¹²Un pelaʹa Ibrahim pe amai neng ida diaʹ sihoʹ adet sunat dina puʹo, moʹ abeʹ de ban un adet sunat tuaʹ le, di lareʹ moʹ de teto ngelan dalem pengudip de, pekuaʹ diseʹ ngan pengudip amai le Ibrahim kena ha ke sihoʹ adet sunat te are.

¹³Palaʹ Ibrahim ngan mung mela ha, Allah lepa petuket ke naʹ usun tanaʹ ini mida ʹo. Allah ban petuket dau pekina, abeʹ ban moʹ Ibrahim temek bayaʹ Katuk Adet, di lareʹ moʹ Ibrahim ban ngelan Allah, ngan Allah ban naʹ ia teneng ngan ne.

¹⁴Buk aheʹ diaʹ bayaʹ Katuk Adet tuaʹ le iaʹ ukoʹ Allah ke mencai inu iaʹ dau ia petuket ina, abeʹ ke un tuman pengelan kelunan. Pekina pe dau iaʹ Allah petuket palaʹ ida diaʹ ngelan dina, abeʹ un atang nge.

¹⁵Ida diaʹ abeʹ un tisen katuk adet, abeʹ de ngesa ha. Un sepuʹo aheʹ diaʹ un katuk adet ina, seʹ de ke penat ukum kenca Allah nai nantaʹ ida.

¹⁶Ina ukoʹ dau tuket Allah pebesun neng pengelan, apan iaʹ ia petuket ke naʹ me mela Ibrahim, abeʹ un inu iaʹ ke mempeng ia ke mencai ie ngan lebang nge. Abeʹ e diaʹ ngkang Katuk Adet tuaʹ le diaʹ ke mela Ibrahim, di lareʹ mung dulu diaʹ ngelan koʹ baʹan Ibrahim are. Ina ukoʹ Ibrahim ketai nuyan amai le mung.

¹⁷Pekina ban sen dau Kitap iaʹ kuma ha: “Akeʹ uyan ikoʹ amai neng kadoʹ naʹan lepoʹ.” Ngan puyan pekina, tai palup ne dau tuket Allah iaʹ ke ngahum mung naʹan lepoʹ, mele aheʹ iaʹ ngelan koʹ baʹan Ibrahim are. Moʹ ia tisen Allah iaʹ pudip diaʹ matai, ngan cuk inu iaʹ abeʹ un kenai un.

¹⁸Ibrahim iaʹ ngelan ngan nebelum, naʹ pe ia abeʹ un taʹan inu iaʹ ukoʹ o ke nebelum ina. Pekina tai ie nuyan “amai neng kadoʹ naʹan lepoʹ.” Koʹ baʹan dau isiu dalem Kitap Tuhan iaʹ kuma ha: “Pekina kadoʹ mela hoʹ ʹo.”

¹⁹Abeʹ Ibrahim tai lemaʹ dalem pengelan ne buk ke pekimet usa ha seleket seʹ e matai ne, moʹ kaya laleʹ ne ia, pekina pe Sara lua ngan kaya pe ia. Majan Ibrahim mudip nyeng ke ca ato uman.

²⁰Abeʹ pengelan Ibrahim tai lekak cen ia, abeʹ un kawaʹ kimet te neng dau tuket Allah. Pengelan ne tai pali kuʹo ke, ngan lemuto pe ia pempau Tuhan Allah.

²¹Un pelaʹa Ibrahim teto laleʹ le ia ngelan neng Allah iaʹ ban un penyukat ke pabeʹ inu iaʹ ia ban petuket ina.

²²Ina ukoʹ “Allah naʹ ia teneng,” ban kuʹun pengelan ne.

²³Dau isiu Allah naʹ ia teneng ina, abeʹ e nyurat te me Ibrahim tengen le.

²⁴Un te dalem surat te milu lete, ban Allah ke naʹ ilu teneng moʹ kuʹun pengelan le neng ia, ngan Allah lete iaʹ ban pudip Tuhan le Yesus cen patai ie.

²⁵Yesus ne iaʹ Allah ban mencai tai matai tuman penyalaʹ le kelunan, ngan pudip ia neng ca udip iaʹ tumpak laʹa, apan ne ke peteneng ilu tai teneng ngan Allah.