Read Wahau Kenyah RUM 9 Bible Online

RUM 9 - Wahau Kenyah bible

RUM 9

¹Lan dau heʹ. Dalem Keristus akeʹ pisiu, abeʹ keʹ palo. Moʹ un tekaʹ kimet dalem penawai heʹ, peging ngan Berua Buheʹ iaʹ un dalem akeʹ, tugen badaʹ abeʹ keʹ palo.

²Pasak taru tekaʹ keʹ, ngan miat lemuto tekaʹ kimet ceʹ ke pekimet diaʹ cenganak keʹ lepoʹ Yahudi, diaʹ pemanak keʹ buk le pekimet usa le.

³Awaʹ pia usa heʹ tengen iaʹ sihoʹ pudoʹ Allah, akeʹ pe iaʹ petat cen Keristus saliu ida, buk ke senteng ke pekina pe idi.

⁴Lepoʹ Yahudi, ida diaʹ Allah ban lemileʹ ngan mamung. Mida pe Allah naʹ serema peniga ha ne. Kun Allah nyalet tuket te neng ida. Kun ne naʹ Katuk Adet te mida puʹo. Ida pe diaʹ un puyan temameʹ iaʹ lan. Pekina pe ida iaʹ alaʹ dau tuket cen Tuhan Allah ne.

⁵Ida Yahudi diaʹ mela cen Israil. Cen ahang ida kenai Keristus luhaʹ ngaliu layen kelunan, iaʹ atek mpau neng mung inu, ngan iaʹ atek Allah iaʹ ilu ke pempau lemuto pa majan. Amin.

⁶Abeʹ keʹ naʹ dau tuket Allah ina tepa moʹ palai lepoʹ Israil abeʹ de kahum neng Israil iaʹ Allah ban lemileʹ.

⁷Pekina pe abeʹ e mung diaʹ mela cen Ibrahim diaʹ ketai nuyan anak Allah. Moʹ un dau Allah neg Ibrahim: “Bang diaʹ mela cen Isak le diaʹ ke nuyan mela hoʹ lan ʹo.”

⁸Sen ne, abeʹ un aheʹ iaʹ nuyan anak Allah kuʹun kelayen kelunan tuaʹ le, di lareʹ ida nuyan anak Allah kuʹun tuket Allah, ina le ida kahum neng mela ha lan.

⁹Moʹ pekini dau tuket Allah kuma ha: “Tegoʹ ketai sihoʹ tau ue ʹo, ke nai heʹ laʹa; ina Sara ke un anak laki ʹo.”

¹⁰Kudaʹ majan ʹo ina, kun tepun le Isak alaʹ leto, ngadan ne Rebika. Un dua re anak laki ie.

¹¹Kena ke kenai anak dua dina musang, abeʹ lepe ida uyan iaʹ tiga pekina pe neng inu iaʹ jaʹat, un dau Allah neng Rebika:

¹²“Un iaʹ seken, ia ke tunuk neng iaʹ sadin ʹo.” Pekina dau Allah ke lemileʹ anak ina bayaʹ ban tengangan kimet te tengen. Pekina Allah lemileʹ kelunan ban kuʹun pengin ne, abeʹ e ban kuʹun puyan nte.

¹³Koʹ baʹan dau Kitap Tuhan: “Un Yakup, ia akeʹ malaʹ: un Isau, ia akeʹ miʹi.”

¹⁴Inu iaʹ ke baʹan le ke pisiu laʹa tupe? Seʹ Allah abeʹ un teneng taʹin? Nyahut te pekina ne.

¹⁵Moʹ un dau ue pisiu ngan Musa: “Akeʹ lesau neng aheʹ iaʹ akeʹ ubaʹ ke lesau, ngan akeʹ ke un saheʹ neng aheʹ iaʹ akeʹ ubaʹ ke un saheʹ.”

¹⁶Ina ukoʹ puyan ina abeʹ un pesente neng pengubaʹ kimet kelunan, pekina pe neng penyanget kelunan, bang neng pengelesau Allah le.

¹⁷Un dau Kitap badaʹ me Piraun: “Akeʹ uyan ikoʹ raja moʹ keʹ nengangan ke kanan ikoʹ ke peluhaʹ penyukat ceʹ, apan ngadan nceʹ tai denga pa libut usun tanaʹ ini.”

¹⁸Moʹ ina seʹ Allah lesau neng aheʹ e ubaʹ ke lesau, ngan ia pemahing kimet neng aheʹ iaʹ ia ubaʹ.

¹⁹Masaʹ naʹkini un dau hem neng akeʹ: “Inu tuman Allah mita salaʹ kelunan tupe? Aheʹ senteng ke nyekang pengubaʹ a mo?”

²⁰Ahaʹ cenganak, aheʹ koʹ iaʹ ubaʹ ke pesakat ngan Allah ne? Abeʹ kuden tanaʹ senteng ke pisiu ngan kelunan iaʹ uyan ia, ke kuma ha: “Inu adeʹ koʹ uyan akeʹ pekini tupe?”

²¹Iaʹ lan ne, aheʹ iaʹ uyan kuden, ia lete un penyukat ke kanan tanaʹ salit ngan ke uyan dua kuden tanaʹ cen ca le keluʹung tanaʹ salit ina, ke uyan ne dua naʹan puyan, ca iaʹ maren diseʹ ngan ca iaʹ ukoʹ tahan sungai.

²²Pekuaʹ koʹ baʹan ina lete puyan Allah. Un kimet Allah ke peluhaʹ kenca ha ngan badaʹ penyukat te. Naʹ pia pekina, denaʹ laleʹ laset te pawang dulu diaʹ ia ke ngenca, ida diaʹ petenup ketai tasaʹ dina.

²³Un pelaʹa kimet Allah ubaʹ ke peluhaʹ kumpin bioʹ seʹ serema peniga ha iaʹ ia lebang naʹ milu diaʹ ukoʹ o lesau, neng ilu diaʹ lepa ia petenup ke alaʹ serema peniga ha.

²⁴Ilu diaʹ ban ia mengin dini, abeʹ le pelaya lepoʹ Yahudi le, di lareʹ un pe palai lepoʹ diaʹ ca ngan le.

²⁵Moʹ pekini dau Allah dalem surat Husia kuma ha: “Kelunan diaʹ abeʹ un anun nceʹ, ida diaʹ akeʹ ke pisiu diaʹ anun nceʹ ʹo. Ngan lepoʹ diaʹ ban akeʹ abeʹ un malaʹ cen kena are, dina diaʹ akeʹ ke pisiu dinaʹ pengemalaʹ keʹ.

²⁶Kempi lepoʹ kukoʹ dulu badaʹ kuma ha ‘Abeʹ kem lepoʹ diaʹ anun Allah,’ atek kaʹ lepoʹ ina lete, dulu ke badaʹ kuma ha: ‘Ikem diaʹ anak Allah, Amai hem ina.’ ” Pekina dau dalem surat Husia.

²⁷Kun Yesaya ngelengap lepoʹ Israil pekini dau ue: “Naʹ pe cap lepoʹ Israil ketai kuaʹ kadoʹ ahit kaʹ sada bahi banget ne, bang kediʹut le diaʹ ke un udip iaʹ ke pudip ida dalem Tuhan ʹo.

²⁸Moʹ ngelarai kenai Tuhan ke pedaʹam ban tuket te neng usun tanaʹ ini mung.”

²⁹Koʹ baʹan dau tiraʹ Yesaya cen kena pelaʹa: “Buk Tuhan, iaʹ Pasak Bioʹ Penyukat ina, abeʹ un munung kediʹut de ilu diaʹ mela lepoʹ Israil, atek muʹo ne ilu tai salai koʹ baʹan lepoʹ Sudum ngan Gemura are.”

³⁰Tuman ina, inu iaʹ ke baʹan le ke pisiu laʹa tupe? Pekini: Lepoʹ diaʹ tahaʹ awang Yahudi, diaʹ abeʹ un nebelum pemuyan nte iaʹ ke ngkin ida teneng ngan Allah, lepa ne ida tai teneng ngan ne ban kuʹun pengelan nte.

³¹Un sepuʹo lepoʹ iaʹ Allah ban lemileʹ ina, iaʹ nebelum neng katuk adet iaʹ ke ngkin ida tai teneng ngan ne, tepa pe ida kidi.

³²Moʹ inu re tepa tupe? Moʹ de abeʹ un mita peneneng bayaʹ pengelan nte, bang ke mita ha bayaʹ pemuyan nte tuaʹ le. Ina ukoʹ de tai petatek neng batu petatek idai.

³³Koʹ baʹan dau dalem Kitap Tuhan: “Akeʹ ke mahung ca usa dalem lepoʹ Siun, ca batu ukoʹ dulu petatek, ca batu ukoʹ de ke laboʹ. Di lareʹ singket usa diaʹ ngelan neng laki ina, abeʹ de tai pebahoʹ.”