Read Wahau Kenyah 1 KURINTUS 1 Bible Online

1 KURINTUS 1 - Wahau Kenyah bible

1 KURINTUS 1

¹Cen Paulus iaʹ Allah mengin bayaʹ pengubaʹ a, iaʹ nuyan lawa Keristus Yesus. Pemung ngan cenganak le Sustenis akeʹ pekatu surat ini —

²Palaʹ Mpun iaʹ anun Allah, iaʹ un kaʹ lepoʹ Kurintus. Iaʹ ina palaʹ mung kelunan diaʹ lepa sihoʹ pengin ke tai nuyan kelunan buheʹ iaʹ Allah ke un. Allah iaʹ un ida moʹ kuʹun puyan nte pebeka tawai dalem Keristus Yesus. Ida iaʹ pebulung ngan kelunan diaʹ lemameʹ man ngadan Tuhan le Yesus Keristus ngalang kempi kempi kukoʹ de. Tuhan nte, ia lete Tuhan ne.

³Awaʹ pe Allah iaʹ Amai le, ngan Tuhan Yesus Keristus, ke naʹ pengelesau ngan udip iaʹ tadan mikem.

⁴Lemuto heʹ nyuaʹ tiga saheʹ palaʹ Allah heʹ tuman ikem, moʹ ban pengelesau ue iaʹ ia lebang naʹ ina, lepa naʹ a mikem kedalem Keristus Yesus.

⁵Ban kuʹun puyan ncem pebeka tawai ngan Keristus, ikem diaʹ nuyan kayaʹ neng mung naʹan puyan pengudip kem, koʹ baʹan mung puyan isiu ngan mung penisen ncem.

⁶Puyan iaʹ badaʹ tugen neng Keristus un luhaʹ, ban ne lepa nuyan dalem puyan pengudip kem.

⁷Ina ukoʹ kem lepa alaʹ singket naʹan pengencai peniga Tuhan ngajan ncem mengaʹ kenai luhaʹ Tuhan le Yesus Keristus.

⁸Ngan pekina puyan ne pubo ikem salet salet pabeʹ pengelepa ha, apan ncem are un penyalaʹ tegoʹ kenai Tau Tuhan le Yesus Keristus.

⁹Allah iaʹ atek semamet. Ia lete iaʹ lepa mengin ikem tai pebeka tawai kedalem Anak ke Yesus Keristus, Tuhan le.

¹⁰Ahaʹ cenganak cenganak keʹ, ngan taten dau heʹ ke pisiu ikem man ngadan Tuhan le Yesus Keristus. Mung ngkem alaʹ ne ca le tiraʹ, apan ncem abeʹ un paseʹ neng ahang ikem. Pedaʹam ne puyan ncem pebeka tawai man ca le kimet cem, ngan man ca le jo sedep kem.

¹¹Ahaʹ cenganak cenganak keʹ, un kelunan cen amin Laki Kelui diaʹ lepa badaʹ makeʹ neng puyan ncem punan tiraʹ.

¹²Pekini kimet ceʹ ngetisen dau ina, singket usa hem un selepeʹ dau isiu hem. Un dau ca: “Akeʹ ini anun Paulus.” Un dau ca pelaʹa: “Akeʹ ini anun Apulus.” Un dau ca pelaʹa: “Akeʹ ini anun Peterus,” ngan un dau ca pelaʹa: “Akeʹ ini anun Keristus.”

¹³Seleket seʹ kem petulat Keristus neng ahang ikem ne ina. Aheʹ iaʹ matai neng usun kayu tecek tuman ikem? Paulus mo? Tuman ngadan aheʹ iaʹ ukoʹ kem sihoʹ ngebatis are tupe? Tuman Paulus mo?

¹⁴Akeʹ nyuaʹ tiga saheʹ palaʹ Allah ban ne ca pe abeʹ un neng ahang ikem iaʹ lepa akeʹ ngebatis, pit bang Kerispus ngan Gayus le.

¹⁵Abeʹ senteng ca usa ke badaʹ uban ncem lepa sihoʹ ngebatis tuman ngadan nceʹ.

¹⁶Lan lete akeʹ lepa ngebatis diaʹ amin Stipanus pe. Diaʹ ca neng ina abeʹ keʹ nawai ida, mele un pe akeʹ lepa ngebatis kelunan diaʹ ca pe taʹin.

¹⁷Ban ne abeʹ Keristus un cuk akeʹ nai ngebatis kelunan. Ia cuk akeʹ nai pedenga Denga Injil, abeʹ e man isiu penudi kelunan, moʹ keʹ malap puyan patai Keristus neng usun kayu tecek ketai nuyan ca isiu iaʹ buhe.

¹⁸Moʹ katuk neng puyan patai Keristus neng usun kayu tecek ina nuyan ca apaʹ me kelunan diaʹ ketai lingu. Un sepuʹo palaʹ ilu iaʹ un puyan iaʹ pudip ilu dalem Tuhan, ia ne penyukat Allah.

¹⁹Un dau Kitap: “Akeʹ ke nasaʹ penudi kelunan iaʹ tudi. Pekina pe pengencam kelunan iaʹ mencam, akeʹ ke pet te ʹo.”

²⁰Moʹ ban pekina, kumpin ketai kelunan tudi dina tupe? Kumpin ketai diaʹ mencam dina tupe? Kumpin ketai kelunan diaʹ pesakat ngan dulu kusun tanaʹ ini tupe? Moʹ abeʹ Allah iaʹ uyan tudi kaʹ usun tanaʹ ini tai apaʹ tupe?

²¹Man penudi kimet te Allah mempeng penudi kelunan, mulen ida ngetisen ia man penudi kimet de tengen. Un sepuʹo Allah ngimet ke pudip kelunan diaʹ ngelan man “Katuk apaʹ” iaʹ ameʹ pedenga ini.

²²Kelunan Yahudi pita puyan nyingan apan nte un tugen kidi baʹan nte, ngan kelunan Gerika ke mita penudi.

²³Un sepe ilu dini ke pedenga Keristus iaʹ lepa ngediding neng usun kayu tecek, iaʹ ina ca puyan iaʹ mpeng me kelunan Yahudi, ngan ca apaʹ me kelunan diaʹ ca.

²⁴Un sepuʹo palaʹ kelunan iaʹ Tuhan Allah lepa mengin, kuaʹ lepoʹ Yahudi, kuaʹ pe ngan lepoʹ diaʹ ca, katuk Keristus ini ne atek penyukat Allah ngan penudi Allah me ida.

²⁵Moʹ puyan Allah iaʹ kelunan kuma ha puyan apaʹ, un lapa bioʹ penudi ie neng ʹo penudi kelunan. Pekina pe puyan Allah iaʹ kelunan kuma ha puyan lemaʹ, un lapa pali neng ʹo pengepali kelunan.

²⁶Ahaʹ cenganak cenganak keʹ, nawai tiga neng puyan ngadan ncem cen kena are, cen tading Allah mengin ikem are. Abeʹ pia kadoʹ kelunan neng ahang ikem iaʹ dulu kuma ha tudi ngan mencam kusun tanaʹ ini, ngan diaʹ ngkang penyukat, ngan diaʹ paren pe.

²⁷Moʹ nengangan ban Allah lemileʹ puyan iaʹ dulu kuma ha apaʹ, apan ne pesaʹe kelunan diaʹ tudi dina. Pekina pe puyan Allah lemileʹ diaʹ lemaʹ kusun tanaʹ ini apan ne pesaʹe diaʹ ngkang penyukat dina.

²⁸Pekina pe Allah lemileʹ diaʹ libaʹ ngan diaʹ dulu naʹ jaʹat, apan ne ke lemasa puyan iaʹ dulu kuma ha bioʹ kusun tanaʹ ini,

²⁹apan ca kelunan abeʹ un senteng ketai jum neng juma Allah.

³⁰Un sepuʹo Allah iaʹ lepa pebeka tawai le pemung ngan Keristus Yesus. Ban Allah iaʹ lepa uyan Keristus atek penudi milu. Ban kuʹun Keristus lete ilu lepa tai teneng ngan Allah. Pekina lete ilu diaʹ nuyan kelunan buheʹ anun Allah. Kuʹun Keristus lete ilu takau cen beka puyan iaʹ jaʹat.

³¹Ina ukoʹ un dau Kitap kuma ha: “Aheʹ iaʹ ubaʹ ke jum, talan pe ia jum tuman pemuyan Tuhan le.