Read Wahau Kenyah 1 KURINTUS 14 Bible Online

1 KURINTUS 14 - Wahau Kenyah bible

1 KURINTUS 14

¹Tuman ina ne nengayet ne ikem apan ncem un puyan malaʹ, mentung ngkem sanget mita mung pencai Berua ina. Iaʹ menco laleʹ, ina ne puyan ncai iaʹ badaʹ seluhan isiu Allah.

²Moʹ kelunan iaʹ pisiu ngan isiu bulen, abeʹ e pisiu me kelunan, di lareʹ me Allah le, moʹ abeʹ un kelunan iaʹ tisen sen ne. Kuʹun penyukat Berua Tuhan un dau ue badaʹ katuk telit diaʹ linget.

³Un sepuʹo kelunan iaʹ badaʹ seluhan isiu cen Allah ina menco isiu ue me kelunan. Kun ne pedengkep udip de ngan petangen kimet de ngan pedenaʹ tawai re.

⁴Kelunan iaʹ pisiu ngan isiu bulen, ia ne pedengkep udip pe tengen. Un sepuʹo kelunan iaʹ badaʹ seluhan isiu cen Allah, ia ne pedengkep mung Mpun diaʹ ngelan Tuhan.

⁵Kimet ceʹ ubaʹ ikem mung pisiu ngan isiu bulen, un sepuʹo menjo pe ubaʹ tekaʹ keʹ ikem mung un pencai iaʹ badaʹ seluhan isiu cen Allah. Moʹ kelunan iaʹ pisiu seluhan isiu Allah, menjo bioʹ pe bang nge me kelunan neng ʹo kelunan iaʹ pisiu ngan isiu bulen. Ca naʹan pe buk ke un ca usa laʹa iaʹ senteng paso isiu bulen ina apan mung Mpun ke tisen sen ne, sulo tai dengkep kuʹun ne.

⁶Moʹ ban pekina cenganak cenganak keʹ, dalau nai heʹ palaʹ ikem ʹo, inu bang nge buk keʹ pisiu ngan isiu bulen mikem tupe? Abeʹ un bang buk keʹ abeʹ un menco ca isiu iaʹ Allah peluhaʹ milu, buk are ca penisen, buk are ca isiu seluhan isiu Allah, buk are ca katuk.

⁷Alaʹ kata cen kedingut ngan sampeʹ diaʹ abeʹ un laset de tengen. Buk abeʹ un singket dau tuyau re teneng, abeʹ dulu ke tisen dau baling nte.

⁸Ca laʹa kelunan iaʹ metit tawak badaʹ ban kenai ayau, buk ke abeʹ un tuman tuman dau, aheʹ iaʹ ke petenup ketai bikaʹ tupe?

⁹Pekina lete ikem dini, kumpin ne kelunan ke tisen sen isiu hem buk kem pisiu ngan isiu bulen iaʹ abeʹ sen ne un luhaʹ tupe? Isiu hem seleket ke palit kawang bareng.

¹⁰Un kadoʹ naʹan isiu kelunan kusun tanaʹ ini, ngan abeʹ un ca iaʹ abeʹ un sen.

¹¹Un sepuʹo buk keʹ abeʹ un tisen isiu ca kelunan, tai ie nuyan koʹ baʹan kelunan bulen palaʹ akeʹ, pekina pe akeʹ palaʹ ia.

¹²Sanget seʹ kem mita mung pencai Berua Tuhan, ina ukoʹ tekep ne man bioʹ kuʹo tekaʹ penyanget cem ke kanan naʹan naʹan pencai iaʹ ke pepo ke pedengkep Mpun diaʹ ngelan Tuhan.

¹³Tuman ina, kelunan iaʹ pisiu ngan isiu bulen, tekep pe lemameʹ Tuhan apan ne ke un pencai man ne senteng badaʹ sen isiu ina.

¹⁴Buk keʹ lemameʹ Tuhan man isiu bulen, berua heʹ lemameʹ, di lareʹ kimet ceʹ abeʹ e kahum kidi.

¹⁵Tai kumpin ne puyan nceʹ tupe? Atek keʹ ke lemameʹ man berua heʹ. Laʹa atek keʹ ke lemameʹ man kimet ceʹ lete. Akeʹ ke ngentau man berua heʹ, laʹa akeʹ ke ngentau man kimet ceʹ lete.

¹⁶Dalau man berua hem tuaʹ le ikem nyuaʹ tiga saheʹ palaʹ Allah, kumpin ne kelunan dalem Mpun iaʹ abeʹ un tisen dau hoʹ ina, kumpin ne ke badaʹ “Amin” neng dau hem nyuaʹ tiga saheʹ are. Abeʹ e mencam ke tisen sen isiu hem.

¹⁷Naʹ pe tiga lan dau sebayang ngkoʹ nyuaʹ tiga saheʹ palaʹ Allah are, un sepuʹo kelunan diaʹ ca abeʹ de tai dengkep kuʹun ne.

¹⁸Akeʹ nyuaʹ tiga saheʹ palaʹ Allah tuman pencai isiu bulen man ceʹ lemuto pisiu neng ata heʹ tengen, naʹ pe puyan nceʹ pekina un lapa neng puyan aheʹ neng ahang ikem.

¹⁹Un sepuʹo dalem Mpun diaʹ ngelan Tuhan, akeʹ ubaʹ ke pisiu lema luʹung isiu diaʹ luhaʹ sen ne apan nceʹ pekatuk kelunan, neng ʹo kudaʹ ibu luʹung isiu iaʹ bulen dau.

²⁰Ahaʹ cenganak cenganak keʹ, ayen ncem koʹ baʹan anak dumit dalau hem ke pekimet puyan ini. Neng puyan jaʹat, talan ne ikem mabi koʹ baʹan anak dumit are, di lareʹ neng puyan kimet, tiga hem koʹ baʹan iaʹ sukung bioʹ.

²¹Un dau iaʹ lepa nyurat dalem Kitap kuma ha: “Un dau Tuhan: Akeʹ ke pisiu me lepoʹ ini man kelunan diaʹ un isiu bulen. Kanan paʹ kelunan bulen akeʹ ke pisiu. Naʹ pia pekina, abeʹ de kenahan dau heʹ.”

²²Moʹ ban pekina ne, puyan pencai isiu bulen ina nuyan ca tugen me kelunan diaʹ abeʹ un ngelan, abeʹ e me diaʹ ngelan. Di lareʹ pencai badaʹ seluhan isiu cen Allah ina nuyan ca tugen me kelunan diaʹ ngelan, abeʹ e me kelunan diaʹ abeʹ un ngelan.

²³Ban ne pekina, kumpin puyan mung Mpun Tuhan dalau mung kelunan lepa pempun, penco re mung pisiu ngan isiu bulen? Laʹa buk kenai diaʹ abeʹ un malai ngan diaʹ abeʹ un ngelan, masaʹ de ke kuma ikem mung un buling ne?

²⁴Di lareʹ buk mung ngkem ke badaʹ seluhan isiu cen Allah, sulo kenai diaʹ abeʹ un ngelan ngan diaʹ abeʹ un malai, atek ke ke tisen tugen neng penyalaʹ a, ban ne kenahan dau hem mung are, pekina pe kimet te ke tisen katuk telit, ban ne kenahan dau hem mung are.

²⁵Puyan kimet te iaʹ linget cen kena kenai luhaʹ ne, sulo ho ketai muʹup ke nyelama palaʹ Tuhan Allah, mentung nge ke teto ngahaʹ: “Lan lete Allah iaʹ mudip ngan ncem kini.”

²⁶Inu iaʹ baʹan nceʹ ne cenganak cenganak keʹ? Tegoʹ kem nai pempun ke nyelama palaʹ Tuhan, singket cem un ca puyan iaʹ ke pepo ke pedengkep ikem mung, ca usa iaʹ un kentau, ca usa iaʹ un katuk, ca usa iaʹ un tiraʹ iaʹ Allah peluhaʹ mia, ca usa iaʹ un katuk ngan isiu bulen, laʹa ca usa iaʹ ke paso isiu bulen apan sen ne un luhaʹ.

²⁷Buk ca usa ubaʹ pisiu ngan pencai isiu bulen, sukat ne dua usa, pa pengekadoʹ de telu usa, tahaʹ ca tahaʹ ca ida ti, sukun un diaʹ mencam paso isiu apan dulu mung tisen.

²⁸Un sepuʹo buk abeʹ un aheʹ iaʹ mencam paso isiu apan dulu mung tisen, talan pia ayen nte pisiu dalem Mpun ina, bang pisiu neng ata re tengen ngan palaʹ Allah.

²⁹Laʹa neng kelunan diaʹ pegawa Allah, tiga ha dua usa mele telu re ke pisiu, mentung diaʹ ca ke pata pekimet tiraʹ a.

³⁰Un sepuʹo buk ke Allah ke badaʹ ca tiraʹ me ca kelunan laʹa iaʹ madung dalau Mpun ina, tiga ne kelunan iaʹ ading are, pekenaʹ isiu ue.

³¹Mung ngkem senteng badaʹ seluhan isiu cen Allah, tahaʹ ca tahaʹ ca, apan mung ngkem senteng pekalai ngan tai tangen kuʹun katuk.

³²Pencai iaʹ badaʹ seluhan isiu cen Allah, abeʹ e pesau cen gaham kelunan iaʹ pisiu ina,

³³moʹ Allah iaʹ ngkang ilu. Abeʹ e cuk ilu lepo adet temek, di lareʹ mudip neng udip iaʹ tadan. Pekina puyan dalem singket Mpun diaʹ anun Allah.

³⁴Tiga ne mung leto ayen pisiu pisiu dalem Mpun, moʹ abeʹ dulu dayo ida pisiu. Koʹ baʹan dau katuk adet Yahudi kuma ha, tekep diaʹ leto tunuk kimet de.

³⁵Buk de ubaʹ ke ngetisen ca inu, tiga re lemutu laki re kaʹ amin. Ca penyaʹe milu buk leto ke pisiu pisiu dalau Mpun Tuhan.

³⁶Buk kem nyakat dau heʹ, masaʹ a ikem kuma cen ikem nai tiraʹ Allah kawang? Bang palaʹ ikem tuaʹ le nai tiraʹ ina taʹin?

³⁷Buk ca kelunan kuma ha ia iaʹ pelawa tiraʹ Allah, ngan ia iaʹ un pencai Berua Tuhan, tekep lete ia iaʹ tisen lan ban ne dau iaʹ akeʹ nyurat mikem ini, mung nge ban ne Tuhan cuk.

³⁸Un sepuʹo buk ke abeʹ un nyingo dau ini, ayen ncem pensingo dau ue ne.

³⁹Tuman ina cenganak cenganak keʹ, sanget le tawai hem neng puyan iaʹ badaʹ seluhan isiu cen Allah, di lareʹ ayen mulen kelunan pisiu ngan isiu bulen.

⁴⁰Ahaʹ mung pemuyan le nuyan temek ngan teneng seʹ tuk ke ne.