Read Wahau Kenyah 1 KURINTUS 16 Bible Online

1 KURINTUS 16 - Wahau Kenyah bible

1 KURINTUS 16

¹Un dau heʹ neng puyan pempun ligit man le ke mepo cenganak le diaʹ anun Allah kaʹ tanaʹ Yudia. Koʹ baʹan dau heʹ lepa cuk mung Mpun Tuhan kaʹ tanaʹ Galatia are, pekina lete ikem uyan bayaʹ dau ina.

²Neng singket Tau Mingku, tekep ne singket usa hem mahung palai ligit bayaʹ ban pengekadoʹ penalan ncem are. Tiga hem peremun ne, idi dalau heʹ nai ʹo, abeʹ e titin le papit ligit ne.

³Dalau lepa heʹ abeʹ ʹo, kimet ceʹ ubaʹ ke cuk kelunan, diaʹ ikem lepa ngelan ke ngkang gayeng ini, ketai ngkin pencai hem ina peging surat iaʹ ke badaʹ ngadan nte kaʹ Yerusalim.

⁴Buk ke tekep tekaʹ kimet le kuma akeʹ iaʹ ketai, tiga ne ida nai serengan akeʹ ʹo.

⁵Un sepuʹo ke kenai te akeʹ palaʹ ikem buk keʹ ketai pelapa tanaʹ Makedunia, moʹ keʹ ketai pelapa tanaʹ Makedunia naʹkini ʹo.

⁶Kimet ceʹ ke ngelineʹ majan kediʹut de ngan ncem, masaʹ pe ngajan awang sengim ini ʹo. Uʹo ina ikem senteng pepo ngan nceʹ neng puyan pengaset ceʹ, mele kempi ketai heʹ masat laʹa ʹo.

⁷Kimet ceʹ, abeʹ keʹ ubaʹ ke menoʹ ikem nuat tuaʹ le, di lareʹ tebelum ngkeʹ ke ngelineʹ majan ngan ncem buk Tuhan dayo.

⁸Un sepuʹo ke ngelineʹ keʹ kaʹ lepoʹ Ipesus pa abeʹ neng Tau Pentakusta te.

⁹Moʹ lepa pesik makeʹ ca janan ke menco gayeng Tuhan, seleket ca pamen iaʹ bioʹ ngan nawa, naʹ pe un kadoʹ diaʹ nyakat kidi.

¹⁰Buk Timutius nai palaʹ ikem, tiga hem nyelama alaʹ ia, moʹ ia pegayeng me Tuhan koʹ baʹan akeʹ lete.

¹¹Tuman ina ayen buhaʹ aheʹ kelunan muau neng ia. Un sepuʹo tekep kem pepo ngan ne, apan ne ke metuk pengasat te ngan saheʹ saheʹ tekaʹ, sulo ho nai uleʹ palaʹ akeʹ. Moʹ akeʹ ke pekena kenai ie pemung ngan diaʹ cenganak didai.

¹²Dau heʹ neng cenganak le Apulus, kudaʹ liwai pe akeʹ petangen ia tai menoʹ ikem, tai serengan cenganak diaʹ ca dina. Abeʹ e un tekaʹ a tekep kenai naʹkini, un sepuʹo kenai te ia tegoʹ un ca awang iaʹ tiga.

¹³Jagaʹ tiga tiga le, nekejeng salet dalem pengelan ncem. Lemuto makang ngan pali ne.

¹⁴Mele inu pemuyan ncem, ti ie mung dalem seʹ puyan pengemalaʹ.

¹⁵Ikem tisen Stipanus de telu pemanak, kumpin ban puyan nte ading ngelan Tuhan kaʹ tanaʹ Gerika are. Ida diaʹ nyuluk usa re tai pubo kelunan diaʹ anun Allah.

¹⁶Akeʹ nyat cem cenganak cenganak keʹ apan ncem tunuk ngan bayaʹ dau kelunan diaʹ pekina. Pekina lete tekep tekaʹ kem neng aheʹ diaʹ ca diaʹ pemung pegayeng ngan nte ke menco gayeng Tuhan.

¹⁷Bangen tekaʹ keʹ neng kenai tantaʹ Stipanus ngan Putunatus ngan Akikus. Seʹ de ban pesukung inu iaʹ tepa tahaʹ ikem.

¹⁸Ida pebioʹ saheʹ keʹ, kuaʹ baʹan nte lepa pebioʹ saheʹ kem are. Tekep lete ilu un bioʹ tapi neng kelunan kuaʹ dina are.

¹⁹Mung Mpun Tuhan diaʹ kaʹ tanaʹ Asia ngatu tiga saheʹ palaʹ ikem. Akila ngan Periskila, peging ngan Mpun iaʹ pempun dalem amin nte dina, ngatu bioʹ tekaʹ tiga saheʹ palaʹ ikem.

²⁰Mung cenganak le kini ngatu tiga saheʹ palaʹ ikem. Tiga hem selama le neng ikem semaheʹ apan, man puyan paʹoʹ ukoʹ baʹan iaʹ tekep diseʹ ilu diaʹ pecenganak are.

²¹Man ujoʹ keʹ tengen akeʹ nyurat ini: “Tiga saheʹ cen Paulus.”

²²Aheʹ iaʹ abeʹ un malaʹ Tuhan, talan ne ia sihoʹ ukum iuten. Maranata — Ahaʹ Tuhan meʹ, nai ne!

²³Pengelesau Tuhan Yesus un ngan ncem.

²⁴Pengemalaʹ keʹ ke un ngan ncem mung kaʹ dalem Keristus Yesus.