Read Wahau Kenyah 1 KURINTUS 2 Bible Online

1 KURINTUS 2 - Wahau Kenyah bible

1 KURINTUS 2

¹Ahaʹ cenganak cenganak keʹ, dalau nai heʹ palaʹ ikem are, akeʹ badaʹ katuk iaʹ telit cen Allah, katuk iaʹ linget neng dulu. Abeʹ keʹ nai ngan tipan petiraʹ, ngan tudi pisiu.

²Dalau heʹ ngelineʹ ngan ncem are, tangen tekaʹ keʹ badaʹ puyan Yesus Keristus, iaʹ ina puyan ne matai neng usun kayu tecek. Abeʹ keʹ un kimet ubaʹ ke nawai puyan diaʹ ca dalau ina.

³Dalau heʹ un ngan ncem are, un lemaʹ tekaʹ keʹ. Un pe takut tekaʹ keʹ ngan ngeregen tipo usa heʹ.

⁴Ngan dau heʹ penco katuk, abeʹ keʹ man puyan isiu iaʹ tudi ngan lanya dau, di lareʹ nai ie neng puyan iaʹ badaʹ penyukat Berua Allah.

⁵Ina ukoʹ pengelan ncem abeʹ un pesente neng penudi kelunan, di lareʹ bang neng penyukat Allah le.

⁶Naʹ pia pekina, penudi isiu heʹ un palaʹ kelunan diaʹ mencam pekimet udip berua le. Ca naʹan pe penudi usun tanaʹ ini, ngan penudi diaʹ ngaren tanaʹ ini, moʹ pengaren nte keno keno tai ie salai ngan abeʹ un laʹa.

⁷Di lareʹ penudi iaʹ akeʹ pisiu ini, ia ina atek penudi cen Allah, penudi iaʹ linget ngan iaʹ suhuk neng kelunan. Moʹ puyan penudi ina, lepa ne Tuhan Allah petenup pe milu cen kena tanaʹ ini nuyan. Ia petenup puyan ina apan le ke tisen serema peniga ha neng ahang ilu.

⁸Neng ahang diaʹ ngaren dulu kusun tanaʹ ini, ca usa pe abeʹ un tisen puyan penudi ini. Buk de ke tisen ia, atek abeʹ de ke ngediding Tuhan iaʹ puʹun serema peniga ina neng usun kayu tecek.

⁹Koʹ baʹan dau iaʹ lepa un dalem Kitap iaʹ kuma ha: “Puyan iaʹ kelunan abeʹ un taʹan ngan abeʹ un kenahan lepe, ngan puyan kimet iaʹ kelunan abeʹ un pekimet, puyan ina ne iaʹ Allah petenup me kelunan diaʹ malaʹ neng ia.”

¹⁰Un sepuʹo abeʹ puyan Allah ina linget neng ilu laʹa. Man puyan Berua ha, Allah peluhaʹ a milu. Moʹ Berua ina iaʹ nugen mung naʹan inu, pabeʹ kimet Allah iaʹ dalem ngan iaʹ suhuk pe.

¹¹Buk le pekimet ilu kelunan, abeʹ un aheʹ iaʹ tisen pekimet inu inu neng ca kelunan, pit berua iaʹ un neng ia. Pekina lete Berua Allah tengen le iaʹ tisen inu inu neng kimet Allah.

¹²Ngan Berua iaʹ ilu lepa alaʹ ini, abeʹ e berua cen usun tanaʹ ini, di lareʹ Berua Allah iaʹ Allah cuk nai palaʹ ilu, apan le senteng ke ngetisen mung pengencai Allah milu.

¹³Ina ukoʹ ʹo pekina dau isiu meʹ, abeʹ e cen penudi kelunan iaʹ ke pekatuk ilu, di lareʹ Berua Tuhan iaʹ ke pekatuk ilu. Pekina ne puyan meʹ, dalau meʹ badaʹ katuk neng puyan udip berua palaʹ kelunan diaʹ un Berua Tuhan.

¹⁴Un sepuʹo kelunan iaʹ abeʹ un Berua ina, abeʹ e senteng ke alaʹ inu pengencai cen Berua Tuhan ina. Abeʹ e senteng ke ngetisen puyan pengencai dina. Dina ca puyan iaʹ mapaʹ baʹan dau ue. Moʹ puyan dina ilu ke tisen dalem udip berua le.

¹⁵Kelunan iaʹ un Berua Tuhan, senteng nge ke pekimet mung naʹan inu. Un sepuʹo abeʹ dulu senteng ke pekimet ia.

¹⁶Koʹ baʹan dau dalem Kitap: “Aheʹ iaʹ ke tisen kimet Tuhan tupe? Ngan aheʹ iaʹ senteng ke pekatuk ia?” Un sepuʹo ilu dini ne iaʹ un kimet Keristus.