Read Wahau Kenyah 1 KURINTUS 8 Bible Online

1 KURINTUS 8 - Wahau Kenyah bible

1 KURINTUS 8

¹Laʹa neng puyan penguman iaʹ dulu mencai me bali uyat. Dalau palai neng idi: “Ilu mung un penisen.” Lan te dau re. Un sepuʹo penisen pekina iaʹ ke ngelatup kimet kelunan pa re tai mpau kimet. Di lareʹ puyan malaʹ iaʹ ke pedengkep kelunan.

²Buk ca kelunan kuma ha ia tengen le lepa un penisen neng ca inu, abeʹ lepe ia tisen ngan puyan iaʹ tekep kelunan ke tisen.

³Un sepuʹo kelunan iaʹ malaʹ neng Allah, ia te iaʹ Allah lepa tisen.

⁴Neng puyan uman penguman iaʹ dulu lepa mencai me bali uyat, ilu tisen uban uyat ina nyeleket ca inu iaʹ abeʹ un un. Ngan tisen te ilu bang ca le Allah.

⁵Buk ke lan koʹ baʹan dau dulu kuma un diaʹ bali kuaʹ ngadan Tuhan Allah, un kaʹ usun langit ngan un kaʹ usun tanaʹ baʹan nte. Naʹ pe lan un kadoʹ “bali ngadan Allah” ngan “bali ngadan Tuhan,”

⁶naʹ pe pekina, telit ilu bang ca le Allah, Amai Bioʹ iaʹ lepa nyelung uyan mung inu, ngan ilu mudip mia. Un Tuhan bang ca le, iaʹ ina Yesus Keristus. Kuʹun ia ne mung inu lepa nuyan, ngan ilu pe un mudip kuʹun ne te.

⁷Un sepuʹo abeʹ e mung kelunan diaʹ un penisen ini. Pabeʹ tau ini ne palai kelunan un malai ngan uyat. Dalau re uman penguman iaʹ ban mencai me bali uyat, kun nte ngelan bali uyat iaʹ un penguman ina. Moʹ tekaʹ kimet dalem penawai re lemaʹ, penco un tekaʹ penyalaʹ iaʹ ke ngejameng kimet de kuʹun penguman ina are.

⁸Iaʹ lan ne penguman abeʹ senteng uyan ilu tai tiga saheʹ ngan Allah. Buk le abeʹ un uman pe, abeʹ un ca inu iaʹ tepa neng ilu. Buk le uman pe, abeʹ un ca bang iaʹ ilu ke alaʹ neng idi.

⁹Pekimet tiga tiga, malap puyan pengelebo udip kem ke nuyan ca petatek, iaʹ ke pelaboʹ kelunan diaʹ lemaʹ pengelan kaʹ dalem penyalaʹ.

¹⁰Kumpin puyan ca usa iaʹ lemaʹ tekaʹ kimet dalem penawai ie, buk ke ke taʹan ikoʹ iaʹ un “penisen” ina madung uman kaʹ dalem amin palan uyat tupe? Masaʹ kimet te tai tabin ubaʹ kuman penguman iaʹ ban mencai me bali uyat ina.

¹¹Siʹau pe kelunan iaʹ lemaʹ ina, moʹ puyan “penisen” ncoʹ iaʹ ke ngejaʹat udip pe. Laʹa tuman cenganak le iaʹ lemaʹ ina ban Keristus lepa matai are.

¹²Ngan cen puyan ini ne ikem ke uyan penyalaʹ neng Keristus, moʹ kuʹun puyan ncem uyan penyalaʹ iaʹ mincaʹ cenganak kem diaʹ un lemaʹ tekaʹ kimet dalem penawai re.

¹³Uban pekina, buk penguman pencai ina ke ngkin cenganak keʹ laboʹ kaʹ dalem penyalaʹ, nyahut ceʹ ke uman penguman ina laʹa, apan nceʹ abeʹ un ketai ngkin cenganak keʹ laboʹ kaʹ dalem penyalaʹ.