Read Wahau Kenyah 2 KURINTUS 11 Bible Online

2 KURINTUS 11 - Wahau Kenyah bible

2 KURINTUS 11

¹Awaʹ pe ikem dadoʹ denaʹ neng akeʹ. Naʹ pe mapaʹ kediʹut ne dau heʹ, dadoʹ denaʹ ading.

²Akeʹ miʹet neng ikem kuaʹ baʹan Allah iaʹ miʹet neng ikem. Akeʹ pekata ikem man ca usa dekiʹit leto iaʹ buheʹ iaʹ akeʹ lepa petulat ke naʹ me ca usa laki, iaʹ ina seleket Keristus.

³Akeʹ malap kimet cem tai pejugau ngan iaʹ jaʹat, malap ikem pe lepo kimet cem iaʹ luʹung luʹung tekaʹ ke malaʹ Keristus are, koʹ baʹan seʹ Hawa sihoʹ panyi bali ncung ulai iaʹ tudi palo ia are.

⁴Adeʹ kem selama alaʹ kelunan iaʹ pedenga ca naʹan Yesus, abeʹ e kuaʹ baʹan Yesus iaʹ ameʹ pedenga mikem are. Seʹ kem alaʹ ca naʹan berua ngan ca naʹan denga injil, atek ca naʹan ne berua buheʹ ngan denga injil iaʹ ikem lepa alaʹ cen ameʹ are.

⁵Naʹ pe lawa Injil hem dina un ngadan bioʹ, abeʹ un tepa tekaʹ keʹ neng ida.

⁶Naʹ pe akeʹ mabi pisiu, abeʹ e kuʹun penisen nceʹ tepa. Puyan ini lepa luhaʹ kata ikem dalem singket naʹan puyan ngan singket liwai pe.

⁷Dalau heʹ pedenga Denga Injil Allah palaʹ ikem are, abeʹ keʹ cuk ikem nyuaʹ akeʹ man ligit cem. Akeʹ iaʹ alaʹ libaʹ tawai apan ikem iaʹ tai pejung. Kumpin baʹan ncem kidi, salaʹ puyan nceʹ tupe?

⁸Ngajan nceʹ pegayeng neng ahang ikem, un ligit nai palaʹ akeʹ cen Mpun diaʹ ca, seleket ceʹ ngelau neng ida apan nceʹ mepo ikem.

⁹Ngajan nceʹ ngelineʹ ngan ncem are, buk keʹ tepet neng ligit, abeʹ keʹ ngesiat ikem. Moʹ diaʹ cenganak le cen Makedunia diaʹ ngkin inu iaʹ akeʹ tekep ke un. Kuaʹ baʹan puyan nceʹ dalau idai are, pekina lete puyan nceʹ bayaʹ laʹa. Nyahut ceʹ ke ngebahat mpin ncem ne.

¹⁰Moʹ katuk Keristus iaʹ telit un dalem akeʹ, ina ukoʹ keʹ selum tekaʹ, abeʹ keʹ dayo ho tai penceng mele kempi kempi pa tipo tanaʹ Gerika pe.

¹¹Inu tuman nceʹ pekina dau tupe? Tuman ban nceʹ abeʹ un malaʹ ikem taʹin? Allah iaʹ atek tisen lan.

¹²Moʹ kumpin layen nceʹ pegayeng naʹkini, pekina lete akeʹ ke penco pegayeng laʹa, apan ida diaʹ “lawa injil” diaʹ ca dina abeʹ senteng uyan ukan ukoʹ de selum kuma ha ban ida diaʹ pegayeng pekuaʹ layen ameʹ pegayeng.

¹³Moʹ ida dina, abeʹ de lawa injil lan. Atek lawa injil palo re, moʹ de palo neng puyan gayeng nte mentung pekaliu seʹ puyan nte, pa re un seʹ de koʹ baʹan lawa Injil Keristus lan.

¹⁴Sematu un puyan pekina ne moʹ bali Sitan tengen iaʹ mencam pekaliu layen ne pa ha un seʹ kuaʹ layen melikat dema.

¹⁵Ban ne pekina, abeʹ e puyan bioʹ buk diaʹ ulaʹ bali Sitan mencam pekaliu layen nte, pa re un seʹ kuaʹ layen ulaʹ iaʹ teneng. Ketai kuʹo puyan nte un suaʹ iaʹ marung neng pemuyan nte iaʹ ke nantaʹ ida ʹo.

¹⁶Akeʹ numpak pisiu ikem laʹa. Abeʹ e tekep dulu, mele aheʹ pe, ke kuma akeʹ iaʹ apaʹ. Di lareʹ buk lan ncem kuma akeʹ apaʹ, talan akeʹ ca kelunan apaʹ, sukun ncem alaʹ akeʹ, idi heʹ un kediʹut ukoʹ keʹ selum tekaʹ ʹo.

¹⁷Isiu heʹ naʹkini, abeʹ e isiu iaʹ Tuhan ubaʹ akeʹ pisiu. Moʹ isiu heʹ neng puyan selum are, lan te koʹ baʹan puyan isiu kelunan apaʹ are.

¹⁸Moʹ ban kadoʹ kelunan diaʹ selum dau tuman penyaheʹ usa re, akeʹ ubaʹ badaʹ selum dau heʹ lete.

¹⁹Masaʹ ikem iaʹ tudi pekimet, ina ukoʹ kem nyelama alaʹ kelunan apaʹ.

²⁰Lan taʹin, ikem diaʹ tai payo neng kelunan diaʹ petunuk ikem, ngan ngelunyeʹ ikem, ngan ngelabak ikem, ngan penceng ikem, ngan nepap pinga hem.

²¹Abeʹ meʹ senteng pekina puyan, moʹ pelapa lemaʹ saheʹ meʹ. Saʹe tekaʹ keʹ ngahaʹ ina. Un sepuʹo buk ca kelunan, mele aheʹ pe iaʹ makang selum dau puyan ne, akeʹ senteng kuaʹ makang lete. Ahaʹ akeʹ pisiu koʹ baʹan kelunan apaʹ lete.

²²Idaʹ diaʹ kelunan Iberani mo? Akeʹ lete kelunan Iberani. Ida diaʹ lepoʹ Israil mo? Akeʹ lete lepoʹ Israil. Ida diaʹ mela cen Ibrahim mo? Akeʹ lete mela cen Ibrahim.

²³Ida diaʹ ulaʹ Keristus mo? Naʹ pe akeʹ koʹ baʹan dau kelunan buling are, di lareʹ akeʹ ini pe ulaʹ iaʹ tiga neng ʹo ida. Buk le pekimet gayeng, akeʹ iaʹ pelapa sanget pegayeng. Ngan puyan le sihoʹ sepin, akeʹ iaʹ kadoʹ liwai sihoʹ o. Ngan puyan dulu lemeta ilu, akeʹ iaʹ kadoʹ liwai sihoʹ o, ngan akeʹ iaʹ kadoʹ liwai nyeng nyeng ke matai.

²⁴Lema liwai kelunan Yahudi naʹ ukum peta makeʹ. Neng singket liwai un telu puloʹ piʹen liwai ida lemeta usa heʹ.

²⁵Telu liwai kelunan Rum lemeta akeʹ. Ca liwai dulu lemulo batu neng akeʹ. Telu liwai heʹ kahum tegoʹ kapen kaham. Ca liwai ie un dua puloʹ pat jam ngkeʹ dalam banget.

²⁶Dalem pengaset ceʹ un kudaʹ liwai heʹ taru kuʹun sungai lempam, pekina pe taru kuʹun kejamun, pekina pe taru kuʹun kelunan, kuaʹ Yahudi pekina pe kuʹun dulu diaʹ ca lete. Un pe taru kaʹ lepoʹ bioʹ, un pe taru kaʹ dalau baʹi, un pe taru kaʹ banget, un pe taru kuʹun cenganak palo lete.

²⁷Ameʹ pegayeng ngan nyara. Puto liwai heʹ maga utung alem. Tajen pe akeʹ laʹu ngan muhang. Tajen pe akeʹ tepet neng penguman, ngan neng sengau, ngan neng gelam pe.

²⁸Puyan diaʹ ca abeʹ keʹ pisiu pit puyan iaʹ mincaʹ akeʹ singket tau ne, iaʹ ina puyan pubo singket Mpun diaʹ ngelan Tuhan.

²⁹Tegoʹ ca usa un lemaʹ, akeʹ un tekaʹ lemaʹ lete. Tegoʹ ca usa tai pihit kaʹ dalem penyalaʹ, un jutaʹ kaʹ penawai heʹ.

³⁰Buk keʹ tekep ke selum tekaʹ, akeʹ ubaʹ ke selum neng puyan iaʹ ke peluhaʹ pengelemaʹ keʹ.

³¹Moʹ ia iaʹ Allah ngan iaʹ Amai neng Tuhan Yesus, tekep le nyuaʹ tiga saheʹ palaʹ ia pa pa majan. Ia iaʹ tisen ban nyahut ceʹ palo.

³²Dalau heʹ un kaʹ lepoʹ Damsik are, un laki gebenur iaʹ ngaren dulu kentaʹ Laja Aretas, kun ne cuk sedadu diaʹ mengau pamen lepoʹ ina ke meput akeʹ.

³³Un sepuʹo diaʹ cenganak le naʹ akeʹ dalem ca gai, sulo muno akeʹ cen ca lubang dalem kerahan batu ina, pekidi heʹ takau cen laki gebenur idai are.