Read Wahau Kenyah 2 KURINTUS 12 Bible Online

2 KURINTUS 12 - Wahau Kenyah bible

2 KURINTUS 12

¹Moʹ keʹ sihoʹ pejen, ina ukoʹ keʹ selum dau. Naʹ pe pekina, abeʹ e uyan ca peniga. Un sepuʹo naʹkini kimet ceʹ ubaʹ pisiu neng puyan iaʹ Tuhan lepa naʹ makeʹ, iaʹ ina puyan penaʹat ngan puyan iaʹ Tuhan peluhaʹ makeʹ.

²Un ca laki iaʹ mudip dalem Keristus, ban puloʹ pat uman lepa, akeʹ tisen ia tai pejung kaʹ surga iaʹ atek mpau. (Abeʹ keʹ tisen puyan ini nuyan neng usa ha lan buk ke abeʹ un puyan penaʹat tuaʹ le. Bang Allah iaʹ tisen kidi.)

³Dau heʹ numpak laʹa, akeʹ tisen laki ina tai pejung kaʹ Lasan Selawan kaʹ surga. (Laʹa abeʹ keʹ tisen puyan ini nuyan neng usa ha lan buk ke abeʹ un puyan penaʹat tuaʹ le. Bang Allah iaʹ tisen kidi.)

⁴Kina ha kenahan dau iaʹ abeʹ un senteng pungkaʹ neng isiu. Un puyan iaʹ abeʹ un tekep paʹ kelunan ke badaʹ.

⁵Tuman ina senteng ngkeʹ selum tekaʹ kuʹun laki ina, di lareʹ abeʹ keʹ ubaʹ ke selum tekaʹ kuʹun usa heʹ tengen buk ke abeʹ un puyan iaʹ badaʹ kumpin seʹ ban pengelemaʹ keʹ.

⁶Buk keʹ un kimet iaʹ ubaʹ selum dau, abeʹ e uyan akeʹ ca kelunan apaʹ, moʹ mung isiu heʹ atek telit lan. Un sepuʹo abeʹ keʹ ubaʹ ke selum dau, uban abeʹ keʹ ubaʹ ca kelunan mele aheʹ pe ke ngempau ngadan nceʹ lapa neng puyan iaʹ ia lepa tisen akeʹ uyan, ngan isiu heʹ iaʹ ia lepa kenahan pe.

⁷Malap mpau tekaʹ penawai heʹ kuʹun puyan penaʹat iaʹ tiga laleʹ are, Tuhan naʹ ca puyan iaʹ petuyen akeʹ, seleket ca teman suhaʹ iaʹ kalen dalem sin usa heʹ, seʹ e nuyan ca puyan man petawai akeʹ neng Sitan, ngan nyakit akeʹ malap tai mpau penawai heʹ.

⁸Ngan telu liwai heʹ lemameʹ nyat Tuhan mesau puyan ini.

⁹Un dau ue mipa akeʹ kuma ha: “Bang pengelesau heʹ iaʹ sukat mikoʹ, moʹ penyukat ceʹ muat ke luhaʹ tegoʹ kelunan lemaʹ tekaʹ.” Tuman ina un bangen ngan selum tekaʹ keʹ kuʹun pengelemaʹ puyan nceʹ, idi heʹ tisen penyukat Keristus nyelempau akeʹ.

¹⁰Ina ukoʹ denaʹ saheʹ keʹ dalau un puyan lemaʹ, pekina pe dalau dulu pejaʹat akeʹ, pekina pe dalau keta, ngan dalau dulu nyakit akeʹ, ngan dalau taru tuman Keristus. Moʹ dalau heʹ lemaʹ, dalau ina lete akeʹ un pali.

¹¹Puyan nceʹ koʹ baʹan kelunan apaʹ re, moʹ pejen tekaʹ keʹ kuʹun ncem. Di lareʹ tekep lete ikem diaʹ ke nyebelang akeʹ. Naʹ pe akeʹ abeʹ un inu inu, abeʹ keʹ tepa neng diaʹ lawa Injil diaʹ ca naʹan seʹ idai are.

¹²Puyan iaʹ badaʹ ban akeʹ ca lawa Injil lepa luhaʹ neng ahang ikem, peging ngan puyan denaʹ tawai pe. Lepa un puyan tedanaʹ, un pe puyan bulen, un pe puyan nyingan.

¹³Neng puyan kumpin ne ameʹ piʹut ikem nuyan selepeʹ ngan Mpun diaʹ ca tupe? Selu un pe ca puyan, iaʹ ina abeʹ keʹ nyat inu me usa heʹ tengen, malap pebahat mpin ncem. Moʹ puyan nceʹ un selepeʹ pekina, akeʹ nyat ikem lesau akeʹ neng puyan ina.

¹⁴Naʹkini un tenup tekaʹ keʹ nai menoʹ ikem. Ini iaʹ ketelu liwai ie, ngan abeʹ keʹ ubaʹ nyat ca inu neng ikem. Akeʹ mita ikem. Abeʹ keʹ mita inu hem. Abeʹ e tekep diaʹ anak ke peremun inu man pubo diaʹ tuʹa re, di lareʹ tekep diaʹ tuʹa ke peremun inu man pubo anak de.

¹⁵Telit akeʹ, bangen tekaʹ buk keʹ ke naʹ mung inu heʹ pit usa heʹ pelaʹa tuman nceʹ ke mepo ikem. Kumpin taʹin, abeʹ un bioʹ kaʹ kimet cem malaʹ akeʹ uban bioʹ kaʹ kimet ceʹ malaʹ ikem tupe?

¹⁶Ikem iaʹ tisen ban lan te abeʹ keʹ ngebahat mpin ncem. Un sepuʹo masaʹ un dau ca kelunan kuma ha ban akeʹ tudi palo ngan pejauʹ ikem.

¹⁷Kumpin taʹin? Dalau heʹ cuk lawa heʹ tai palaʹ ikem are, un meʹ panyi ikem tupe?

¹⁸Akeʹ iaʹ naten nyat Titus tai palaʹ ikem tau idai, pekina pe cenganak le diaʹ ca are. Un Titus iaʹ panyi ikem taʹin? Kumpin taʹin, abeʹ meʹ dua kuaʹ ayo moʹ kuaʹ lete jo kimet meʹ, ngan kuaʹ lete puyan pemuyan meʹ dua are mo?

¹⁹Masaʹ ikem kuma ameʹ bang pekimet ke menting ngadan meʹ tengen kata ikem. Abeʹ e pekina. Ameʹ pisiu pekuaʹ iaʹ Keristus ubaʹ ameʹ pisiu neng juma Allah lete. Ahaʹ cenganak cenganak diaʹ akeʹ malaʹ, mung pemuyan meʹ, ameʹ uyan man pedengkep ikem.

²⁰Tekaʹ keʹ takut malap tegoʹ keʹ nai taʹan ikem, un puyan ncem ca naʹan neng ʹo puyan iaʹ akeʹ ubaʹ taʹan ʹo, ngan ikem ke taʹan puyan nceʹ ca naʹan neng ʹo puyan iaʹ ikem ubaʹ ke taʹan ʹo. Takut kaʹ keʹ nai taʹan puyan iaʹ punan tiraʹ, ngan puyan petiʹet, ngan puyan buseʹ, ngan puyan maʹam, ngan puyan isiu iaʹ pejaʹat kelunan, ngan puhan nyelem patu tiraʹ, ngan puyan kancau, ngan puyan paseʹ pe.

²¹Akeʹ malap tekaʹ selu tegoʹ kenai heʹ ca liwai laʹa masaʹ Tuhan Allah heʹ ke ngelibaʹ akeʹ neng juma ikem, pa heʹ ke nange tuman kelunan kadoʹ diaʹ uyan penyalaʹ cen kena, ngan abeʹ lepe ida nyepuleʹ kimet de cen puyan jameng nte, ngan puyan pemung nyelem, ngan puyan selabu iaʹ ida malai uyan are.