Read Wahau Kenyah 2 KURINTUS 2 Bible Online

2 KURINTUS 2 - Wahau Kenyah bible

2 KURINTUS 2

¹Moʹ ban pekina, lepa ne akeʹ metep tekaʹ kimet ceʹ kuma ha: “Abeʹ keʹ nai palaʹ ikem ngan pebampa ikem laʹa.”

²Buk keʹ ke pebampa ikem ʹo, aheʹ iaʹ ke pebangen akeʹ pit ikem iaʹ lepa akeʹ pebampa ina tupe?

³Ina tuman nceʹ pekatu surat ina mikem. Abeʹ keʹ ubaʹ nai palaʹ ikem penco tai bampa kuʹun ncem, moʹ tekep ikem iaʹ ke pebangen akeʹ. Akeʹ tisen lete tegoʹ un bangen tekaʹ keʹ, dalau ina lete ikem mung ke un bangen.

⁴Tau idai akeʹ nyurat mikem are, atek taru laleʹ ngan janga tekaʹ tawai heʹ, mentung keʹ nange. Abeʹ e surat ina tuman pebampa ikem, di lareʹ tuman ke petisen ikem kumpin bioʹ ban pengemalaʹ keʹ neng ikem mung.

⁵Naʹkini pekimet ne laki iaʹ lepa pebampa ilu are. Abeʹ e puyan ina sihoʹ akeʹ tuaʹ le, un sepuʹo sihoʹ ikem lete. Buk ke abeʹ un sihoʹ ikem mung, masaʹ a ke sihoʹ palai mikem, moʹ abeʹ pe tekaʹ kimet ceʹ ubaʹ mincaʹ ia pe.

⁶Lepa sukat ne ikem diaʹ kadoʹ, iaʹ ban mukum laki ina are.

⁷Un sepuʹo naʹkini, tekep kem sau penyalaʹ a ngan petangen ia dalem Tuhan laʹa. Ayen buhaʹ penawai ie tai bampa pa ha supeʹ saheʹ.

⁸Dau heʹ nyat neng ikem, tiga hem badaʹ mia kumpin ncem atek malaʹ lan lan neng ia.

⁹Surat iaʹ akeʹ pekatu mikem are, ini ne tuman ne, apan nceʹ tisen kumpin ne puyan ncem dalau hem sihoʹ pengeten. Ngan laʹa, kumpin ncem lemuto bayaʹ dau katuk keʹ taʹin.

¹⁰Buk kem sau penyalaʹ ca kelunan, mele ban kuʹun inu pemuyan ne, akeʹ pe iaʹ sau penyalaʹ a lete. Moʹ midan puyan iaʹ pekina ke kahum neng akeʹ, seʹ keʹ sau penyalaʹ ina moʹ kuʹun ncem neng juma Keristus.

¹¹Un puyan le pekina apan Sitan abeʹ un senteng tai un usun neng ilu. Abeʹ le turan neng penudi ngan sedep pe.

¹²Tegoʹ ketai sabeʹ keʹ kaʹ lepoʹ Teruas ke pedenga Denga Injil neng Keristus ina, penco heʹ tisen ban Tuhan lepa mesik janan me gayeng nge kina.

¹³Un sepuʹo abeʹ keʹ petegoʹ ngan cenganak le Titus, ina ukoʹ janga laleʹ tekaʹ kimet ceʹ. Sulo heʹ nyat lesau ngan kelunan dina are, sulo mecin ida, ngan penco metuk asat ceʹ tai kaʹ tanaʹ Makedunia.

¹⁴Tiga ne ilu nyuaʹ tiga saheʹ palaʹ Allah. Moʹ ban kuʹun puyan le pebeka tawai ngan Keristus are, Allah iaʹ lemuto ngkin ameʹ koʹ baʹan kudaʹ usa salut, diaʹ miko Keristus ke badaʹ ban ia un usun. Allah iaʹ kanan ameʹ man ne ke migai penisen neng Keristus, koʹ baʹan puyan ca iaʹ me baʹoʹ iaʹ ketai libut kempi kempi pe.

¹⁵Tekep le pekata man baʹoʹ, moʹ ameʹ diaʹ nuyan koʹ baʹan ca pencai lisan gareʹ iaʹ Keristus nutung kaʹ juma Allah, ngan baʹoʹ o ketai libut neng ahang kelunan, palai diaʹ un udip dalem Tuhan, ngan palai diaʹ lingu.

¹⁶Palaʹ kelunan diaʹ tai lingu dia, baʹoʹ ina nuyan ca puyan laʹit iaʹ ngkin patai. Un sepuʹo palaʹ kelunan diaʹ un puyan iaʹ pudip ida dalem Tuhan, baʹoʹ ina ca puyan me, iaʹ ngkin udip. Aheʹ iaʹ un penyukat man nte senteng mejo gayeng ini tupe?

¹⁷Un palai kelunan diaʹ ngkang katuk Allah koʹ baʹan seʹ de pebeli ca inu iaʹ abeʹ un tuman suaʹ a. Ameʹ dini abeʹ un pekina, moʹ Allah iaʹ cuk ameʹ, ina tuman meʹ pisiu ngan teto dau neng juma Allah koʹ baʹan kudaʹ usa diaʹ ulaʹ Keristus ne.