Read Wahau Kenyah 2 KURINTUS 5 Bible Online

2 KURINTUS 5 - Wahau Kenyah bible

2 KURINTUS 5

¹Ameʹ tisen ban usa iaʹ ameʹ kanan kusun tanaʹ ini un koʹ baʹan lumpung ketu are. Tegoʹ o tai kasing ʹo, Allah iaʹ ke naʹ ca amin mameʹ kaʹ surga, ca amin iaʹ ia tengen lepa uyan, iaʹ ukoʹ meʹ ke mudip. Amin ina ke un pa pa majan ʹo.

²Naʹkini ameʹ ngerahing moʹ tekaʹ meʹ ubaʹ laleʹ kaʹ ketai un amin meʹ iaʹ kaʹ surga ina ke nyengau ameʹ.

³Dalau meʹ lepa un gelam ina ʹo, abeʹ meʹ tepet neng usa laʹa.

⁴Ngajan meʹ mudip kusun tanaʹ dalem lumpung ketu ini, ameʹ ngerahing ngan koʹ baʹan tekaʹ meʹ sihoʹ pencit. Abeʹ un kimet meʹ ubaʹ pet seluhan usa ini, di lareʹ kimet meʹ ubaʹ ke un usa iaʹ layen surga ke pegelam ameʹ laho ʹo, apan inu iaʹ tekep matai ketai salai kuʹun iaʹ un udip ina.

⁵Allah iaʹ petenup ilu utung puyan iaʹ ke pekaliu ini, ngan lepa ha naʹ Berua ha milu uyan ca kedatung neng mung puyan iaʹ ia pekimet ke uyan milu.

⁶Ina ukoʹ bioʹ penina meʹ lemuto. Ameʹ tisen ban kudaʹ majan meʹ ngelineʹ kaʹ usa meʹ ini iaʹ seleket amin meʹ ini, pekina majan meʹ abeʹ un taʹan amin Tuhan.

⁷Moʹ puyan pengudip meʹ ini, abeʹ e ca puyan penaʹat ne.

⁸Bioʹ penina meʹ, ngan kimet meʹ ubaʹ laleʹ ketai mecin amin usa ini, penco tai pemung amin ngan Tuhan.

⁹Lapa neng ʹo inu inu iaʹ ca, un kimet meʹ ubaʹ ke sihoʹ neng pengubaʹ Tuhan, mele kempi ke un amin meʹ, kini taʹin, kina taʹin.

¹⁰Moʹ mung le lete iaʹ atek ke ngejuma Keristus, apan ia ke metep tiraʹ iaʹ marung neng ilu. Singket usa le ke alaʹ suaʹ iaʹ tekep bayaʹ ban pemuyan le ngajan pengudip le neng usa le, mele pemuyan ne tiga, mele pemuyan ne jaʹat pe.

¹¹Ameʹ tisen sen takut neng Tuhan, ina ukoʹ taten tekaʹ meʹ ubaʹ ke payo kimet kelunan. Allah iaʹ tisen ameʹ ngan lesan taʹat te. Pekina pe akeʹ nebelum ikem ke tisen akeʹ, ngan dema tekaʹ kimet dalem penawai hem.

¹²Abeʹ meʹ un ke pebioʹ dau ngadan meʹ palaʹ ikem laʹa, di lareʹ seʹ meʹ uyan ca ukoʹ kem selum tekaʹ kuʹun meʹ, apan ncem senteng mipa dulu diaʹ selum tekaʹ kuʹun seʹ puyan usa kelunan, diaʹ abeʹ un selum tekaʹ kuʹun layen kimet de.

¹³Buk un seʹ buling kimet meʹ, tuman Alah ne ina. Buk kimet meʹ sebelang, tuman ikem ne ina.

¹⁴Mele inu pemuyan meʹ, abeʹ e tuman ban usa meʹ tengen. Moʹ Keristus malaʹ ameʹ, puyan pengemalaʹ a ina iaʹ ngaren usa meʹ, moʹ ameʹ lepa tisen ban ca usa iaʹ matai tuman ilu mung. Un sen ne, ilu mung kahum dalem puyan patai ie ina.

¹⁵Ia matai tuman ilu mung, apan ilu diaʹ mudip, abeʹ le mudip laʹa tuman usa le tengen, bang mudip tuman ia iaʹ lepa matai ngan numpak mudip tuman ilu.

¹⁶Ban ne lepa pekina, abeʹ meʹ kanan penyaheʹ kelunan buk meʹ metep kimet meʹ neng ca kelunan. Kenuen pe cen naʹaʹ are, seʹ meʹ metep kimet meʹ neng Keristus bayaʹ ban penyaheʹ kelunan are, abeʹ meʹ uyan pekina laʹa.

¹⁷Dalau ca kelunan metuk berua ha ngan Keristus, atek ca pemuyan mading ne ia. Puyan iaʹ puʹun lepa pesau are. Ilu taʹan puyan mading nai luhaʹ.

¹⁸Allah iaʹ uyan mung pemuyan ina are. Kanan Keristus ne, Allah uyan udip milu, ina ukoʹ pesau puyan bunoʹ are. Kun ne uyan ilu diaʹ panak ke. Sulo ho naʹ ca tulat gayeng mameʹ, iaʹ ina gayeng uyan kelunan tai pepanak ngan ne lete.

¹⁹Pekini tiraʹ ameʹ pedenga: Allah iaʹ kanan Keristus man ne uyan udip me mung kelunan. Abeʹ e peremun cap salaʹ de. Kun ne naʹ mameʹ tiraʹ iaʹ badaʹ kumpin seʹ e uyan udip, apan nte tai pepanak ngan ne ʹo.

²⁰Tuman ina ameʹ dini nuyan lawa Keristus, seleket Allah tengen iaʹ mayo ikem kuʹun meʹ. Saliu Keristus ameʹ ngelapen nyat ikem: tunuk ne palaʹ Allah apan ne uyan ikem diaʹ pepanak ngan ne.

²¹Keristus iaʹ peletoʹ-letoʹ abeʹ un penyalaʹ, di lareʹ tuman ilu Allah uyan ia iaʹ keliwa penyalaʹ le, apan ilu diaʹ pebeka tawai ngan ne, senteng alaʹ udip iaʹ teneng cen Allah.