Read Wahau Kenyah 2 KURINTUS 9 Bible Online

2 KURINTUS 9 - Wahau Kenyah bible

2 KURINTUS 9

¹Iaʹ lan ne, abeʹ titin nceʹ nyurat mikem neng puyan le ngatu inu man le mepo kelunan diaʹ anun Allah kaʹ tanaʹ Yudia.

²Akeʹ tisen ban ikem iaʹ ubaʹ pepo ngan le. Lepa heʹ badaʹ me kelunan kaʹ tanaʹ Makedunia kumpin ngkeʹ selum tuman ikem. Pekini dau heʹ neng ida: “Cenganak le kaʹ tanaʹ Gerika lepa ca uman un tenup ke pepo ngan le.” Kadoʹ de tai sanget kuʹun denga penyanget cem.

³Naʹkini akeʹ cuk diaʹ cenganak le dini tai palaʹ ikem apan dau meʹ selum kuʹun ncem abeʹ tai nuyan isiu pelo-lo, di lareʹ ketai ie nuyan koʹ baʹan dau heʹ are, ngan tenup ne pencai hem iaʹ ke mepo kelunan ina.

⁴Buk ke abeʹ un pekina, masaʹ kenai kudaʹ usa kelunan Makedunia serengan akeʹ uʹo, sulo re taʹan seʹ kem abeʹ un petenup lepe, atek saʹe tekaʹ meʹ ʹo, moʹ bioʹ penina meʹ neng ikem cen kena are. Nco pe ikem un saʹe lete.

⁵Ina ukoʹ keʹ kuma tiga buk keʹ cuk diaʹ cenganak le dini tai tahaʹ tena neng akeʹ, ngan petenup pencai iaʹ ikem lepa petuket ke mencai are. Idi tegoʹ kenai heʹ abeʹ ʹo, un luhaʹ ban tenup ne kuʹun pengubaʹ kem, abeʹ e kuʹun iaʹ ke lemejen.

⁶Nawai tiga neng isiu ini: kelunan iaʹ ke mula kediʹut le luang, ia ke majau kediʹut le. Un sepuʹo kelunan iaʹ mula kadoʹ luang, ia ke majau bioʹ.

⁷Tuman ina, tekep ne singket usa metep kimet te tengen, sulo naʹ tuaʹ le, ayen ne ngan tekaʹ nesen buk ke abeʹ un tekaʹ sihoʹ pejen, moʹ Allah iaʹ malaʹ kelunan iaʹ naʹ tuaʹ ngan bangen.

⁸Allah iaʹ senteng naʹ suheʹ neng iaʹ ikem ke kanan, apan ncem lemuto ke un iaʹ sukat me usa hem tengen, ngan man iaʹ suheʹ ina ikem senteng mejo singket naʹan gayeng iaʹ tiga ne.

⁹Koʹ baʹan dau Kitap iaʹ kuma ha: “Ngan lebang puyan ne ia naʹ me kelunan kasip, ngan puyan peniga ha un pa majan ʹo.”

¹⁰Allah iaʹ naʹ luang padai senteng le nugan, ngan kanen sukat le uman. Allah ina lete iaʹ ke naʹ mikem luang padai iaʹ tekep ikem ke un. Ngan ia iaʹ ke pudip pe, apan ncem un ajau iaʹ lento tuman puyan ncem lebang nugan are.

¹¹Allah iaʹ lemuto naʹ pengudip kem sukat sukat lento, apan ncem sukat lemuto naʹ tuaʹ ngan lebang puyan ncem, idi kadoʹ kelunan ke nyuaʹ tiga saheʹ palaʹ Allah tuman pencai hem iaʹ ameʹ ngkin palaʹ ida.

¹²Moʹ puyan sebayang ngkem iaʹ pekini un mepo kelunan diaʹ anun Tuhan diaʹ tepet dina. Pit laʹa puyan ina ke meteʹ puyan iaʹ nyuaʹ tiga saheʹ palaʹ Allah ngan lusut lusut seʹ puyan ne.

¹³Laʹa puyan sebayang ngkem ini iaʹ badaʹ ban isiu hem un sin. Tuman ina kadoʹ kelunan ke nyerema peniga Allah kuʹun puyan ncem semamet neng Denga Injil Keristus iaʹ ikem pedenga, ngan kuʹun puyan ncem pawat bang ngan lebang seʹ puyan ncem palaʹ ida, pekina pe palaʹ mung kelunan diaʹ ca pe.

¹⁴Pekina pe ida ke lemameʹ Tuhan mikem ngan bioʹ saheʹ neng ikem, moʹ tekinco bioʹ puyan pengelesau Allah iaʹ ia lebang naʹ mikem.

¹⁵Tiga le mung nyuaʹ tiga saheʹ palaʹ Allah tuman pencai ie iaʹ lapa bioʹ neng ʹo iaʹ ilu senteng pisiu.