Read Wahau Kenyah GALATIA 1 Bible Online

GALATIA 1 - Wahau Kenyah bible

GALATIA 1

¹Cen Paulus iaʹ lepa sihoʹ pengin tai nuyan lawa Injil, abeʹ e kuʹun kelunan, ngan abeʹ e bayaʹ dau pengecuk kelunan, di lareʹ kuʹun Yesus Keristus, ngan Allah iaʹ Amai Bioʹ iaʹ lepa beteʹ Yesus cen ahang kelunan matai.

²Mung cenganak le diaʹ pemung ngan nceʹ kini badaʹ tiga saheʹ de palaʹ Mpun diaʹ ngelan Tuhan kaʹ dale Galatia.

³Awaʹ pe Allah iaʹ Amai le, ngan Tuhan Yesus Keristus, ke naʹ pengelesau ue ngan udip iaʹ tadan mikem.

⁴Keristus lepa mencai usa ha ban tuman penyalaʹ le. Moʹ lebang tekaʹ kimet te bayaʹ pengubaʹ Allah iaʹ Amai le, ina tuman ne nakau ilu cen udip usun tanaʹ iaʹ jaʹat ini.

⁵Pempau ne serema peniga Allah pa abeʹ bayaʹ. Amin.

⁶Muʹo ne tawai heʹ neng ikem, moʹ jelarai laleʹ le ban ncem tai nyelikut ia iaʹ lepa mengin ikem man pengelesau Keristus ina. Belekaʹ kem tai bayaʹ denga injil diaʹ ca.

⁷Iaʹ lan ne, abeʹ un “denga injil” diaʹ ca. Un sepuʹo akeʹ pekina dau moʹ un palai kelunan diaʹ ubaʹ ke ngasing ikem, mentung nte ten ke ngaliu Denga Injil neng puyan Keristus ina.

⁸Buk ke ameʹ, mele melikat cen surga pe, ngan mele aheʹ aheʹ pe iaʹ ke pedenga palaʹ ikem denga injil iaʹ ca naʹan neng ʹo Denga Injil iaʹ ameʹ lepa pedenga palaʹ ikem are, talan ne kelunan diaʹ pekina ke sihoʹ ukum luten.

⁹Koʹ baʹan iaʹ ameʹ lepa badaʹ ading are, idi lete iaʹ akeʹ ke badaʹ pelaʹa: buk ca usa ke pedenga palaʹ ikem denga injil iaʹ ca naʹan neng ʹo Denga Injil iaʹ ikem lepa alaʹ idai, talan ne kelunan ina ke sihoʹ ukum luten.

¹⁰Tuman ina, un seʹ keʹ nebelum kelunan ke pancau akeʹ tupe? Naʹun. Bang puyan iaʹ badaʹ Allah ubaʹ akeʹ tuaʹ le iaʹ akeʹ mita. Kumpin, un nceʹ mita janan iaʹ bayaʹ pengubaʹ kelunan mo? Buk lan ne pekina, abeʹ keʹ ca ulaʹ Keristus laʹa.

¹¹Ahaʹ cenganak cenganak, akeʹ badaʹ mikem, Denga Injil iaʹ akeʹ pedenga palaʹ ikem are, abeʹ e Denga Injil iaʹ un tai nuyan kuʹun kelunan.

¹²Ngan abeʹ keʹ alaʹ a cen kelunan. Abeʹ pe un kelunan iaʹ pekalai akeʹ, di lareʹ Yesus Keristus tengen iaʹ peluhaʹ Denga Injil ini makeʹ.

¹³Moʹ lepa ne ikem kenahan kumpin denga pengudip keʹ cen naʹaʹ, ca kelunan Yahudi iaʹ sanget dalem adet, ngan kumpin puyan nceʹ tai nyakit diaʹ Mpun diaʹ anun Allah ngan buseʹ, mentung ngkeʹ mita janan ke nasaʹ ida.

¹⁴Akeʹ ne iaʹ atek muhat neng ʹo kelunan Yahudi diaʹ pekuaʹ udip ngan nceʹ, neng puyan pengelan nceʹ palaʹ adet Yahudi. Akeʹ ne iaʹ atek sanget neng toʹ adet tepun le cen naʹaʹ neng ʹo kelunan dina.

¹⁵Un sepuʹo kuʹun pengelesau Allah ina, ia lepa lemileʹ akeʹ cen kena heʹ nai pempet kusun tanaʹ ini, ngan mengin akeʹ, apan nceʹ tai nuyan ulaʹ a.

¹⁶Tegoʹ Allah lepa metep kimet te ubaʹ ke peluhaʹ Anak ke palaʹ akeʹ, apan nceʹ tai pedenga Denga Injil neng puyan Anak ke ina palaʹ lepoʹ dulu diaʹ ca, abeʹ keʹ nyat dulu, mele aheʹ aheʹ pe iaʹ nai pekatuk akeʹ.

¹⁷Ngan pekina pe abeʹ keʹ tai petegoʹ ngan kelunan diaʹ ading neng akeʹ tai lawa Injil kaʹ Yerusalim. Di lareʹ penco tai heʹ kaʹ tanaʹ Arap, ngan lepa ina sulo kenai heʹ ngeliwet kaʹ Damsik.

¹⁸Telu uman ʹo ina sulo ketai heʹ kaʹ lepoʹ Yerusalim, ubaʹ ke tisen tugen cen Peterus. Dua mingku majan nceʹ pemung ngan ne.

¹⁹Abeʹ keʹ un petegoʹ ngan lawa Injil diaʹ ca, pit Yakup iaʹ cenganak Tuhan le ina.

²⁰Mung inu iaʹ akeʹ nyurat ini, atek lan. Man ngadan Allah, nyahut ceʹ lemalo ne.

²¹Lepa ina tai heʹ kaʹ dale Siria ngan Kilikia.

²²Dalau ina mung Mpun Keristus diaʹ kaʹ dale Yahudi, abeʹ de taʹan akeʹ lepe.

²³Un sepuʹo ida tai tisen akeʹ kuʹun dulu diaʹ ca tuaʹ le iaʹ kuma ha: “Ini ne kelunan iaʹ nyakit ameʹ are, naʹkini ia ne iaʹ pedenga pengelan iaʹ ia ten ke nasaʹ cen naʹaʹ are.”

²⁴Pekina ne puyan nte pempau Allah ban tuman akeʹ.