Read Wahau Kenyah GALATIA 5 Bible Online

GALATIA 5 - Wahau Kenyah bible

GALATIA 5

¹Ilu naʹkini un dalem udip iaʹ pejo, moʹ Keristus lepa naʹ ca udip iaʹ pejo milu. Tuman ina tekep kem salet dalem pengudip kem, mentung ngkem abeʹ un pedayo usa hem tai ulaʹ inu inu laʹa.

²Ngeringa ne. Akeʹ ne Paulus iaʹ pisiu ikem. Moʹ buk kem uyan adet sunat, sen puyan ina, Keristus abeʹ un bang nge palaʹ ikem.

³Ca liwai laʹa akeʹ pejagaʹ dau mikem: buk ca kelunan ke uyan adet sunat, atek ke kebayaʹ lete mung puyan Katuk Adet ina.

⁴Ngan ikem diaʹ ten ubaʹ ketai teneng ngan Allah man janan bayaʹ Katuk Adet ina, lepa ne ikem lemeto beka hem ngan Keristus, ngan abeʹ ne ikem ke kahum neng pengelesau Allah ina laʹa.

⁵Un sepuʹo ilu dini nebelum Allah iaʹ ke uyan ilu tai teneng ngan ne. Ini ne iaʹ ilu pekena ke nuyan kuʹun penyukat Berua Tuhan iaʹ pegayeng dalem ilu bayaʹ ban pengelan le.

⁶Moʹ dalau le pebeka tawai ngan Keristus Yesus, diaʹ un sunat ngan diaʹ abeʹ un sunat, abeʹ un ca inu inu ue. Di lareʹ iaʹ atek bioʹ, iaʹ ina pengelan iaʹ menco gayeng man seʹ puyan malaʹ.

⁷Cen naʹaʹ ikem ne iaʹ atek sanget dalem pengelan. Aheʹ iaʹ ban mempeng ikem bayaʹ katuk telit ini tupe? Kumpin puyan kelunan ina senteng miwaʹ kimet cem tupe?

⁸Abeʹ puyan iaʹ miwaʹ ikem nai cen Allah iaʹ mengin ikem are.

⁹Puyan kelunan ina koʹ baʹan dau dulu are: “Kediʹut de lamut, sukat te ngebanga mung ca keluʹung untat.”

¹⁰Inu pia pekina, bioʹ tebelum ngkeʹ neng ikem, moʹ kuʹun pebeka tawai le ngan Tuhan abeʹ kem ke pekimet ke alaʹ kimet diaʹ ca laʹa. Neng kelunan iaʹ mempeng ikem ina, kenuen aheʹ pe ia, atek ke ke sihoʹ ukum lete kuʹun Allah.

¹¹Un dau palai diaʹ kuma akeʹ caʹ pedenga katuk iaʹ cuk kelunan ngkang adet sunat. Buk lan pekina cenganak cenganak keʹ, abeʹ un aheʹ iaʹ ke nyakit akeʹ tuman katuk keʹ neng puyan tecek Keristus.

¹²Kimet ceʹ neng kelunan diaʹ piat ikem, awaʹ pe ida ke ti pa kumpin, pa re lemeta usa re tengen.

¹³Di lareʹ palaʹ ikem cenganak cenganak, Allah lepa mengin ikem apan ncem un dalem udip iaʹ pejo. Un sepuʹo ayen ncem pedayo udip kem iaʹ pejo ina tai nuyan ukan ukoʹ puyan pengubaʹ usa ke ngaren ikem. Di lareʹ puyan pengemalaʹ kem iaʹ tekep nuyan ukoʹ kem ke ngulaʹ usa hem ke lesau ikem selepeʹ apan.

¹⁴Moʹ mung katuk Adet lepa keluʹung neng ca le katuk ukum, iaʹ ina: “Tiga hem malaʹ neng ikem kelunan, koʹ baʹan ncem malaʹ usa hem tengen are.”

¹⁵Un sepuʹo buk kem koʹ baʹan puyan pun are, seʹ kem minget ngan nyakit ca ngan ca usa, pekimet tiga tiga, malap ikem ke nasaʹ ikem selepeʹ.

¹⁶Ini ne sen isiu heʹ: talan ne Berua Tuhan ngkang pengudip kem, ngan ayen ncem tai tunuk palaʹ pengubaʹ penyaheʹ usa kelunan laʹa.

¹⁷Moʹ penyaheʹ usa kelunan ina iaʹ nyakat Berua Tuhan, ngan Berua Tuhan ina iaʹ nyakat penyaheʹ usa kelunan. Ida dua dina pebunoʹ. Ina ukoʹ kem abeʹ un sukat ke uyan pengubaʹ kimet cem tengen.

¹⁸Dalau Berua Tuhan iaʹ mampin ikem, abeʹ ne ikem ke napi Katuk Adet laʹa.

¹⁹Pemuyan penyaheʹ usa kelunan ina lepe luhaʹ dalem puyan pemung nyelem, puyan jameng, ngan puyan selabu,

²⁰puyan ngelan uyat, ngan puyan pucau. Pemuyan penyaheʹ usa iaʹ meteʹ kelunan tai pebunoʹ, punan inu re, petiʹet, pekenca, penta un denga, puyan tai un tat, ngan selepeʹ kimet.

²¹Pekina pe ida miʹi, mabuk, tutun, ngan naʹan naʹan diaʹ pekina. Akeʹ ke pejagaʹ dau mikem naʹkini, koʹ baʹan nceʹ lepa pejagaʹ dau mikem cen naʹaʹ are, iaʹ ina: mung kelunan diaʹ uyan puyan dini, abeʹ de ke kahum neng puyan pengaren Allah.

²²Di lareʹ ca naʹan buaʹ ilu ke majau kuʹun Berua Tuhan, iaʹ ina puyan malaʹ kelunan, bangen tawai, udip iaʹ tadan, denaʹ tawai, puyan pengelesau, pemuyan tiga, pejo kimet,

²³libaʹ kimet, ngan puyan iaʹ mencam mapo pengubaʹ usa le. Abeʹ un adet iaʹ mpi iaʹ ke lemalan neng puyan diaʹ pekina are.

²⁴Un sepuʹo kelunan diaʹ lepa tai nuyan diaʹ anun Keristus Yesus lepa lematai penyaheʹ usa re, peging pengemalaʹ a iaʹ jaʹat, ngan pengubaʹ a iaʹ jaʹat.

²⁵Berua Allah lepa naʹ udip iaʹ mading milu. Tekep lete ia iaʹ atek ke ngkang pengudip le.

²⁶Abeʹ le tekep ke balang tawai, nyakit ilu selepeʹ, ngan petiʹet neng ilu selepeʹ apan.