Read Wahau Kenyah IPESUS 1 Bible Online

IPESUS 1 - Wahau Kenyah bible

IPESUS 1

¹Cen Paulus, lawa Keristus Yesus kuʹun pengubaʹ kimet Allah: Palaʹ mung ikem diaʹ anun Allah kaʹ lepoʹ Ipesus, diaʹ tudep bayaʹ Keristus Yesus.

²Awaʹ pe Allah iaʹ Amai le, ngan Tuhan Yesus Keristus, ke naʹ pengelesau ue ngan udi iaʹ tadan mikem.

³Tiga le mung nyuaʹ tiga saheʹ palaʹ Allah iaʹ Amai Tuhan le Yesus Keristus. Moʹ lepa ne Allah naʹ peniga milu, dalem puyan le pebeka tawai dalem Keristus, mentung nge naʹ mung naʹan pengencai udip berua le kaʹ surga.

⁴Abeʹ lepe tanaʹ ini nuyan, lepa ne Allah lemileʹ ilu, apan le ke tai diaʹ anun ne tengen dalem puyan le pebeka tawai dalem Keristus, apan le buheʹ ngan abeʹ un penginteʹ kata Allah. Un kimet Allah malaʹ ilu,

⁵ina ukoʹ o pebetep neng kimet te cen penading nge ke madut ilu palaʹ ia, ngan uyan ilu ketai nuyan anak ke kuʹun Yesus Keristus. Pekina pengubaʹ Allah, ngan tengangan ban kimet te are.

⁶Tiga le pempau Allah moʹ bioʹ serema pengelesau ue, ngan lebang pengencai ie milu, kuʹun puyan le pebeka tawai dalem Anak iaʹ pengemalaʹ a.

⁷Kuʹun musa dahaʹ Keristus, ia pawang ilu tai pesau cen iaʹ jaʹat, moʹ un pebeka tawai le dalem me. Pekina pe penyalaʹ le pesau kuʹun patai ie.

⁸Pekina ban pasak bioʹ seʹ pengelesau Allah, ngan lebang seʹ e mura pengelesau ue milu.

⁹Kuʹun toʹ penudi Allah ngan pelesan taʹat te, ina ukoʹ o teto uyan bayaʹ kaʹ pengubaʹ kimet te. Ia peluhaʹ milu ban kaʹ sedep pe, iaʹ ia pebetep neng kimet te cen penading nge, iaʹ ke tai daʹam kuʹun Keristus.

¹⁰Un kaʹ sedep Allah, ia ke pebulung mung inu tenuyan ne, inu pia kaʹ langit ngan kusun tanaʹ ne. Ngan Keristus iaʹ ia ke naʹ ngkang pungu ue mung. Atek ke ketai nuyan lete pekina tegoʹ ke tai sihoʹ tuket te ʹo.

¹¹Mung inu tai nuyan bayaʹ sedep pe iaʹ ia pebetep neng kimet te tengen. Ngan Allah lepa lemileʹ ilu ke tai diaʹ anun ne tengen, moʹ o ke pebeka tawai le dalem Kerisus, bayaʹ ban kimet te cen penading nge.

¹²Tiga ne ilu, diaʹ ading nebelum neng Keristus, pempau Allah moʹ kuʹun serema peniga ha.

¹³Pekina lete ikem, dalau hem ban kenahan dau katuk iaʹ telit lan are, iaʹ ina Denga Injil neng puyan iaʹ pudip ikem dalem Tuhan, penco hem ngelan neng Keristus. Sulo kun Allah matep ikem man Berua ha iaʹ Buheʹ, iaʹ lepa ia petuket ina.

¹⁴Berua Buheʹ ina iaʹ koʹ baʹan ca kedatung milu, neng iaʹ Allah lepa petuket ke naʹ me kelunan diaʹ anun ne. Idi le un tebelum pa kenai Allah ke pawang toʹ kelunan diaʹ anun ne kelap cen iaʹ jaʹat. Tiga le pempau Allah kuʹun serema peniga ha.

¹⁵Moʹ cen diaʹ pekina, dalau heʹ kenahan dau denga pengelan ncem neng Tuhan Yesus, pekina pe neng denga hem malaʹ mung kelunan diaʹ anun Allah,

¹⁶pa abeʹ naʹkini abeʹ keʹ beto ke nyuaʹ tiga saheʹ palaʹ Allah kuʹun ncem. Akeʹ lemuto petawai ikem dalem temameʹ keʹ.

¹⁷Kun nceʹ nyat neng Allah, iaʹ Allah Tuhan le Yesus Keristus, Amai iaʹ atek puʹun serema peniga, cuk ia naʹ Berua Buheʹ iaʹ ke naʹ penudi mikem, iaʹ ke peluhaʹ Allah, idi hem tai tisen ia.

¹⁸Akeʹ nyat pelaʹa apan mata penawai hem ketai pesik, idi hem tai taʹan dema ha, apan ncem tai tisen tebelum dalem pengin Allah neng ikem. Pekina pe apan ncem tai tisen kumpin bioʹ puyan peniga iaʹ ia petuket ke naʹ me kelunan diaʹ anun ne.

¹⁹Pekina pe apan ncem tai tisen kumpin ban bioʹ laleʹ seʹ penyukat te iaʹ pegayeng dalem ilu diaʹ ngelan Tuhan.

²⁰Moʹ un penyukat Allah iaʹ un dalem ilu ne, pekuaʹ te ngan pengali penyukat iaʹ Allah kanan tegoʹ o pudip Yesus cen patai are, ngan padung ia tahaʹ taʹu ue kaʹ surga.

²¹Cen ina Keristus ngkang perinta iaʹ atek mpau neng mung perinta bali tahaʹ ntaʹ langit, neng mung penyukat, neng mung pengali, ngan neng mung diaʹ paren. Atek mpau ngadan ne neng mung kelunan iaʹ un ngadan kusun tanaʹ ini, pekina pe neng udip iaʹ kenai bayaʹ ʹo.

²²Mung inu ne tunuk tahaʹ ntaʹ taket Keristus kuʹun Allah. Kun Allah naʹ Keristus me Mpun diaʹ ngelan ia, ngan uyan ia atek Tuʹa Bioʹ iaʹ ke man pungu neng mung inu.

²³Un Mpun diaʹ ngelan dina, ia ne atek usa Keristus, iaʹ pedengkep Keristus. Un Keristus, ia tengen pedengkep mung inu ne.