Read Wahau Kenyah IPESUS 5 Bible Online

IPESUS 5 - Wahau Kenyah bible

IPESUS 5

¹Moʹ ikem ne anak Allah iaʹ ia selu, tekep ne ikem bayaʹ layen Amai hem.

²Tiga hem lemuto mudip dalem pengemalaʹ, koʹ baʹan seʹ Keristus lepa malaʹ neng ilu, ngan naʹ usa ha suaʹ penyalaʹ le, ca pengencai iaʹ me baʹoʹ kata Allah, ngan liwa iaʹ sihoʹ neng pengubaʹ a.

³Moʹ ikem kelunan diaʹ anun Allah, ayen tai pemung nyelem, ngan ayen uyan diaʹ mano, ngan pekina pe neng puyan tutun. Mung dina, abeʹ ne ia tekep ikem ke pisiu ngadan ne laʹa neng ahang ikem.

⁴Ngan pekina lete abeʹ pe ikem tekep ke pisiu iaʹ jameng, ngan iaʹ untau, ngan tekaheʹ neng iaʹ jaʹat. Di lareʹ iaʹ tekep neng isiu hem, nyuaʹ ne tiga saheʹ palaʹ Allah.

⁵Petawai lan le ikem neng ini. Moʹ aheʹ iaʹ pemung nyelem, pekina pe diaʹ uyan diaʹ mano, pekina pe diaʹ tutun, nyahut de ke un tulat dalem puyan pengaren Keristus ngan Allah ke ngaren ida. Moʹ un diaʹ tunuk neng puyan tutun, kuaʹ koʹ baʹan puyan nte tunuk neng uyat.

⁶Ayen pedayo aheʹ aheʹ pe ke pelingu ikem man tiraʹ de iaʹ abeʹ un semantet. Moʹ kuʹun penyalaʹ iaʹ pekina, Allah ke pelaboʹ kenca ha neng mung diaʹ muau tiraʹ a.

⁷Moʹ ina, ayen ncem tai pemung ngan diaʹ pekina.

⁸Moʹ cen naʹaʹ, ikem pe caʹ mudip dalau ntem are. Un ne naʹkini ʹo, lepa ne ikem tai nuyan diaʹ anun Tuhan. Ina seʹ kem mudip neng dema. Cen diaʹ pekina, tekep kem mudip koʹ baʹan diaʹ dalem dema.

⁹Moʹ cen dema ina kenai mung naʹan peniga, ngan peneneng, ngan penelit.

¹⁰Nesek ne usa hem tengen, selu puyan ncem tekep neng pengubaʹ Tuhan.

¹¹Ayen ncem tai pemung ngan dulu diaʹ un puyan diaʹ abeʹ un semantet, iaʹ nai cen dalau ntem. Di lareʹ ikem badaʹ dema ina mida tiga le.

¹²Iaʹ lan ne, abeʹ le ubaʹ pisiu neng puyan iaʹ ida ti selem ina.

¹³Inu inu iaʹ ilu peluhaʹ neng dema, ina le ilu tisen mpi iaʹ jaʹat, ngan mpi iaʹ tiga.

¹⁴Buk de tai tisen ban salaʹ de moʹ kuʹun dema, ina iaʹ menat ida nai tabin neng dema. Ina ukoʹ pekini dau katuk: “Taga ne ikem diaʹ luntoʹ, beteʹ ne cen ahang diaʹ matai. Ngan Keristus iaʹ ke ngedema ikem.”

¹⁵Moʹ ina, pekimet tiga tiga le ikem neng puyan pengudip kem. Ayen mudip koʹ baʹan dulu diaʹ turan are, di lareʹ koʹ baʹan dulu diaʹ mencam pekimet.

¹⁶Petutui hem uyan tiga neng singket tau ne, moʹ dalau ini dalau iaʹ jaʹat.

¹⁷Moʹ ina, ayen ncem untau laʹa, di lareʹ nengayet ne ngetisen pengubaʹ kimet Tuhan neng ikem.

¹⁸Ayen ncem mabuk telang jakan iaʹ ke ngejaʹat ikem, di lareʹ tiga hem tai sangan kuʹun Berua Tuhan.

¹⁹Mentung ngkem pisiu neng ahang ikem selepeʹ man Kentau Masmur, ngan dayung sebayang, ngan dayung cen Berua Buheʹ. Tiga mung dayung ngan kentau hem tai palaʹ Tuhan, mentung ngan bangen tawai pempau ia.

²⁰Lemuto nyuaʹ tiga saheʹ palaʹ Allah iaʹ Amai Bioʹ, dalem ngadan Tuhan le Yesus Keristus, neng mung naʹan inu.

²¹Pekina pe tiga hem tunuk neng ikem selepeʹ dalem ngkem takut neng Keristus.

²²Mung ngkem leto iaʹ un laki, tiga hem tunuk palaʹ laki hem koʹ baʹan palaʹ Tuhan are.

²³Moʹ laki ie iaʹ bioʹ neng leto ho, koʹ baʹan Keristus iaʹ bioʹ neng Mpun diaʹ ngelan. Ngan Keristus iaʹ matai tuman pudip usa ha, iaʹ ina Mpun diaʹ ngelan ia.

²⁴Koʹ baʹan Mpun diaʹ ngelan Tuhan ke tunuk palaʹ Keristus, pekina lete leto ke tunuk palaʹ laki re dalem mung inu inu ne.

²⁵Un sepe mung ngkem laki, tiga hem malaʹ neng leto hem, koʹ baʹan Keristus lepa malaʹ Mpun diaʹ ngelan, penco ho naʹ usa ha matai tuman Mpun diaʹ ngelan ia.

²⁶Pekina puyan Keristus, apan ne ke nebaya Mpun diaʹ ngelan ia me Allah, mentung nge muheʹ Mpun diaʹ ngelan ia, ngan ntoʹ ida man katuk ke.

²⁷Moʹ o ke petenup Mpun diaʹ ngelan ina mia tengen, ca Mpun iaʹ selawan, buheʹ, ngan iaʹ abeʹ un ca penginteʹ, abeʹ un tudik, ngan abeʹ tai kupit, ngan mung inu jaʹat diaʹ ca.

²⁸Neng mung ngkem laki, tekep lete ikem malaʹ neng leto hem, koʹ baʹan ncem malaʹ usa hem tengen are. Moʹ aheʹ iaʹ malaʹ leto ho, seʹ e malaʹ neng usa ha tengen lete ina.

²⁹(Moʹ abeʹ un aheʹ iaʹ miʹi neng usa ha tengen, di lareʹ ia ke lemakan usa ha, ngan petubo ho, koʹ baʹan seʹ Keristus petubo Mpun diaʹ ngelan ia.

³⁰Moʹ ilu dini ne senganan neng usa Keristus.)

³¹Koʹ baʹan dau dalem Kitap Tuhan: “Ina ukoʹ o ca usa ke mecin amai ngan ueʹ e, moʹ o ke tai pemung ngan leto ho, ngan ke ca le usa re dua.”

³²Neng tiraʹ Kitap ina luhaʹ ban ne ca katuk bioʹ, ina ukoʹ keʹ alaʹ kata neng puyan Keristus ngan Mpun diaʹ ngelan ia.

³³Moʹ pekina ban ne, tekep lete singket usa hem laki malaʹ leto hem koʹ baʹan neng usa hem tengen. Ngan ikem leto, tekep pe ikem nyelumuk neng laki hem.