Read Wahau Kenyah KULUSE 4 Bible Online

KULUSE 4 - Wahau Kenyah bible

KULUSE 4

¹Mung ngkem diaʹ tuʹa gayeng, tekep kem uyan iaʹ teneng ngan telit kimet cem palaʹ diaʹ ulaʹ kem. Nawai ne, moʹ Tuʹa Gayeng, iaʹ ngkang ikem, un kaʹ surga.

²Tiga hem lemameʹ lemuto-uto, ngan tudep le tegoʹ kem lemameʹ, mentung ngkem nyuaʹ tiga saheʹ palaʹ Allah.

³Ngan pekina pe tiga hem lemameʹ mameʹ, apan Allah ke naʹ ca pengebiʹen mameʹ, ukoʹ meʹ ke pedenga katuk ke ini, mentung meʹ ke badaʹ katuk Keristus iaʹ linget ina. Moʹ ban tuman katuk ina heʹ un kaʹ dalem amin sepin naʹkini.

⁴Lemameʹ ne makeʹ apan nceʹ sukat pisiu inu iaʹ tekep akeʹ ke pisiu, pa heʹ sukat ke peluhaʹ sen Denga Injil ina ngan tempa tekaʹ.

⁵Mudip ne ngan tunuk neng ata dulu diaʹ abeʹ un ngelan man penudi kimet cem, mentung ngkem petutui kanan pengebiʹen iaʹ un neng ikem.

⁶Tekep lete isiu hem lemuto tiga ngan sengela dau neng dulu. Ngan tekep kem mencam ke mipa man isiu iaʹ teneng, iaʹ sihoʹ neng putu aheʹ aheʹ pe.

⁷Cenganak le Tikikus iaʹ ilu malaʹ, ca usa iaʹ tudep, ngan iaʹ kuaʹ ulaʹ ngan meʹ dalem gayeng Tuhan. Ia ke badaʹ mung denga heʹ palaʹ ikem.

⁸Ina tuman nceʹ cuk Tikikus nai palaʹ ikem, apan ne ke pebangen tawai hem man denga puyan meʹ mung.

⁹Serengan ne, un pe kenai Unisimus, cenganak le iaʹ ilu malaʹ, ngan iaʹ tudep. Ia ca usa diaʹ anun ncem lete. Ida ke badaʹ mikem mung puyan iaʹ lepa nuyan kini.

¹⁰Aristakus iaʹ pemung ngan nceʹ dalem amin sepin, badaʹ tiga saheʹ e palaʹ ikem, ngan pekina pe Markus iaʹ pepadeʹ pesak ngan Barnabas. (Ameʹ lepa badaʹ mikem apan ncem alaʹ ia ngan selama dau, buk ke nai palaʹ ikem.)

¹¹Pekina pe Yusak, iaʹ dulu pisiu Yustus, badaʹ tiga saheʹ e palaʹ ikem. Moʹ bang ida telu dini le lepoʹ Yahudi iaʹ lepa ngelan, iaʹ pemung pegayeng ngan nceʹ dalem puyan pengaren Allah ke ngaren ilu kelunan. Ida ne iaʹ atek mepo akeʹ.

¹²Pekina pe Ipapras, ca usa diaʹ anun ncem, ngan iaʹ ulaʹ Yesus Keristus, badaʹ tiga saheʹ e palaʹ ikem. Ngan sanget seʹ e lemuto lemameʹ palaʹ Allah apan ncem ke salet dalem pengelan ncem, ngan dengkep puyan ncem, ngan penisen ncem ke sukung, mentung ngkem ke tunuk palaʹ Allah ngan toʹ tekaʹ libaʹ tawai hem bayaʹ pengubaʹ a.

¹³Akeʹ tengen iaʹ nugen seʹ e sanget laleʹ ban tuman ikem, pekina pe tuman kelunan diaʹ kaʹ lepoʹ Ludikia, ngan lepoʹ Hirapulis.

¹⁴Lukas, duktun iaʹ ilu malaʹ, ngan pekina pe Dimas, badaʹ tiga saheʹ de palaʹ ikem.

¹⁵Badaʹ ne tiga saheʹ meʹ palaʹ cenganak le diaʹ kaʹ lepoʹ Ludikia, pekina pe palaʹ cenganak le Nimpa, ngan palaʹ Mpun diaʹ ngelan Tuhan iaʹ pempun neng amin ne.

¹⁶Buk kem lepa baca surat ini, cuk ne Mpun diaʹ kaʹ lepoʹ Ludikia baca ha laʹa. Ngan pekina pe puyan ncem baca surat iaʹ lepoʹ Ludikia ke pekatu palaʹ ikem.

¹⁷Ngan tiga hem kuma dau neng Arkipus: “Nawai hoʹ ke pelepek tulat gayeng iaʹ Tuhan lepa naʹ mikoʹ are.”

¹⁸Man ujoʹ keʹ tengen akeʹ nyurat ini: Tiga saheʹ cen Paulus. Nawai ne beka ampit iaʹ un neng akeʹ ne. Awaʹ pe pengelesau Allah lemuto un ngan ncem. 1