Read Wahau Kenyah 1 TESALUNIKA 2 Bible Online

1 TESALUNIKA 2 - Wahau Kenyah bible

1 TESALUNIKA 2

¹Ahaʹ cenganak, ikem tengen iaʹ tisen ban meʹ nai menoʹ ikem are, abeʹ meʹ nai ngan puyan iaʹ abeʹ un tuman.

²Tisen te ikem kumpin puyan dulu nyakit ameʹ ngan panyi ameʹ kaʹ lepoʹ Pilipi, kena kenai meʹ palaʹ ikem kaʹ Tesalunika. Naʹ pe ia pekina, Allah le iaʹ naʹ akang mameʹ, man meʹ badaʹ Denga Injil iaʹ nai cen ia, kenuen pe kadoʹ diaʹ ke nyekang nge.

³Dau meʹ pekatuk ikem are, abeʹ e ngedung neng katuk iaʹ salaʹ ngan jo kimet iaʹ jaʹat. Pekina pe abeʹ meʹ panyi dulu.

⁴Di lareʹ ameʹ lemuto pisiu pekuaʹ ngan pengubaʹ kimet Allah. Ban ne lepa ne Allah badaʹ kimet te ubaʹ ameʹ, ngan ngelan ameʹ ke ngkang Denga Injil ina. Abeʹ meʹ mita apan kelunan ke pada ameʹ, un sepuʹo iaʹ ameʹ pita apan Allah ke pada ameʹ, moʹ Allah iaʹ nesek jo dalem kimet meʹ.

⁵Un sepuʹo ikem tisen lan, ameʹ nai palaʹ ikem, abeʹ meʹ nai ngan isiu pancau ngan lanya dau iaʹ ke nyuhuk tekaʹ puyan iaʹ tutun dau. Neng puyan ini Allah tengen iaʹ ke nugen ameʹ.

⁶Ngan pekina pe abeʹ meʹ keloʹ dulu ke pincung ameʹ, mele ikem pe, buk are dulu diaʹ ca pe.

⁷Naʹ pe ameʹ senteng ke nyat inu cen ikem moʹ ameʹ diaʹ lawa Keristus, dalau meʹ un ngan ncem are, un lemaʹ saheʹ meʹ koʹ baʹan lemaʹ saheʹ ca ueʹ iaʹ nubo anak ke are.

⁸Tuman pengelesau meʹ palaʹ ikem are, ameʹ iaʹ tenup tekaʹ ke petulat ngan ncem, abeʹ e bang Denga Injil cen Allah ina tuaʹ le, un sepuʹo peging ngan laset meʹ pe ameʹ ke petulat mikem. Pekina ban ncem nuyan diaʹ pengemalaʹ meʹ.

⁹Atek ikem petawai lete cenganak, kumpin seʹ meʹ nyara pegayeng naʹ tau ngan ngahu, apan meʹ abeʹ un ke ngepit bahat mpin ncem ngajan meʹ pedenga Denga Injil cen Allah ina.

¹⁰Ikem ne iaʹ tugen meʹ, ngan pekina pe Allah. Pemuyan meʹ palaʹ ikem diaʹ ngelan are, un pejo ban ne, un pe teneng, ngan abeʹ un salaʹ.

¹¹Ikem tisen ban meʹ pekimet singket usa hem pekuaʹ a koʹ baʹan ca amai ke pekimet anak ke tengen are.

¹²Ameʹ diaʹ petangen ikem. Ameʹ diaʹ nyelaho ikem. Tajen meʹ cuk ikem mudip ngan puyan pengudip iaʹ sihoʹ neng pengubaʹ Allah. Atek Allah iaʹ mengin ikem ke pebulung neng puyan pengaren ne ke ngaren ilu ngan kahum neng serema peniga ha lete pe.

¹³Ca laʹa pukoʹ meʹ lemuto pempau Allah, moʹ dalau meʹ nai badaʹ katuk Allah palaʹ ikem are, ikem ngeringa ha, sulo alaʹ a. Abeʹ kem alaʹ a kuaʹ baʹan katuk kelunan are, di lareʹ katuk Allah idi lan lete ina. Moʹ lan lete Allah iaʹ pegayeng dalem ikem diaʹ ngelan katuk ina.

¹⁴Ahaʹ cenganak cenganak, puyan iaʹ sihoʹ ikem are, puyan kuaʹ ina lete iaʹ sihoʹ singket Mpun diaʹ ngelan Allah kaʹ tanaʹ Yudia, ida diaʹ anun Keristus Yesus ina. Ikem lete iaʹ sihoʹ tuyen kuʹun diaʹ lepoʹ kem tengen, kuaʹ baʹan ida lepa sihoʹ tuyen kuʹun lepoʹ Yahudi are.

¹⁵Lepoʹ ina lete iaʹ lematai Tuhan Yesus peging ngan diaʹ pegawa Tuhan. Ngan pekina pe ida lepa petuyen ameʹ pe. Seʹ de nyakit kimet Allah. Seʹ de buseʹ neng mung kelunan pe.

¹⁶Pit laʹa ida ten ke mempeng ameʹ, mulen ameʹ badaʹ denga ini palaʹ lepoʹ diaʹ ca, denga katuk ini iaʹ senteng ke pudip ida dalem Tuhan. Ini ne iaʹ kuʹo bioʹ neng mung penyalaʹ diaʹ ida lemuto uyan ne. Ngan naʹkini lepa ne kenca Allah mencit ida.

¹⁷Un sepe ameʹ dini cenganak cenganak, tegoʹ meʹ ketai petat ngan ncem kena le ʹo, petat ina abeʹ e un neng puyan kimet, bang neng puyan usa tuaʹ le ina. Bampa laleʹ lete tekaʹ tawai meʹ ke mecin ikem are, ngan tengayet le tekaʹ meʹ ten kenai naʹat ikem laʹa.

¹⁸Ubaʹ te tekaʹ meʹ kenai menoʹ ikem laʹa. Akeʹ Paulus pe, kudaʹ liwai heʹ keloʹ ten kenai ngeliwet palaʹ ikem laʹa, un sepuʹo Bali Sitan iaʹ mempeng ameʹ.

¹⁹Tuman inu ameʹ mudip tupe? Aheʹ iaʹ uyan tebelum mameʹ, pekina pe iaʹ naʹ bangen mameʹ tupe? Atek ikem le. Abeʹ kem tepa neng ʹo kelunan diaʹ ca. Ikem ne diaʹ nuyan pukoʹ selum tekaʹ meʹ, iaʹ ukoʹ meʹ senteng badaʹ ban meʹ un usun tegoʹ meʹ ngejuma Tuhan le Yesus, dalau ke nai ie luhaʹ ʹo.

²⁰Iaʹ atek lan ne, ikem ne iaʹ tekaʹ penyelum tawai meʹ, ngan iaʹ pengebangen tawai meʹ.