Read Wahau Kenyah 2 TIMUTIUS 2 Bible Online

2 TIMUTIUS 2 - Wahau Kenyah bible

2 TIMUTIUS 2

¹Ahaʹ anak keʹ, tiga hoʹ ngepali tekaʹ koʹ dalem pengelesau iaʹ ilu pemung un dalem Keristus Yesus.

²Toʹ tiraʹ katuk iaʹ akeʹ ti mikoʹ kenahan dulu diaʹ kadoʹ are, tiga hoʹ naʹ a palaʹ ida diaʹ senteng ikoʹ ke nina, diaʹ mencam pekatuk dulu diaʹ ca.

³Tiga hoʹ tisen tekaʹ sihoʹ tuyen koʹ baʹan ca sedadu Keristus Yesus iaʹ tudep.

⁴Uban ca sedadu iaʹ tai pepatai, abeʹ e nekelet tekaʹ kimet te tengen neng usun gayeng nge, bang bayaʹ pengubaʹ laki pengebioʹ sedadu le.

⁵Buk ca usa tai pasa taket kukoʹ dulu penta pasa, abeʹ dulu naʹ bang mia buk ke abeʹ un bayaʹ dau puyan iaʹ ban dulu petuket.

⁶Un diaʹ tangen uyan uma, tekep pe ida iaʹ ading ading ke alaʹ buaʹ a.

⁷Petawai le ikoʹ neng tiraʹ keʹ ini, moʹ Tuhan iaʹ ke naʹ penisen mikoʹ neng mung naʹan puyan ʹo.

⁸Petawai hoʹ neng Yesus Keristus, mela cen Daut iaʹ numpak mudip cen patai, kuaʹ koʹ baʹan Denga Injil iaʹ akeʹ badaʹ ini.

⁹Suaʹ keʹ ban pedenga Denga Injil ini, koʹ keʹ sihoʹ tuyen pa heʹ sihoʹ beka ampit malat, koʹ baʹan ca usa diaʹ ban pepuk kuʹun penyalaʹ are. Un sepuʹo tiraʹ Tuhan, abeʹ e tisen beka ampit malat.

¹⁰Ina ukoʹ keʹ ngihen tekaʹ neng mung naʹan taru, moʹ tuman kelunan diaʹ Allah lemileʹ, apan nte ke un udip dalem Keristus Yesus pemung ngan serema peniga ha iaʹ pa pa majan.

¹¹Ini ca tiraʹ iaʹ ilu senteng ke napi: “Buk le lepa matai pemung ngan ne, seʹ le ke mudip pemung ngan ne lete.

¹²Buk le mihen neng tuyen, seʹ le ke pemung ngkang pengaren ngan ne lete. Buk le ngebawaʹ ia, ia ke ngebawaʹ pe ilu.

¹³Buk le abeʹ un tudep, ina ha ke tudep lete, moʹ abeʹ e senteng ke palo usa ha tengen.”

¹⁴Tiga hoʹ petawai dulu neng katuk ini. Pekatuk ida lan lan ngejuma Allah, mulen ida punan tiraʹ. Moʹ abeʹ un ca bang neng puyan punan tiraʹ, di lareʹ bang ne ngejaʹat dulu diaʹ kenahan dau ue tuaʹ.

¹⁵Nengayet coʹ peteneng usa hoʹ marung neng pengubaʹ Allah, koʹ baʹan ca tukeng iaʹ abeʹ un saʹe kuʹun gayeng nge, ngan mencam penco katuk Allah iaʹ telit, ngan tepuʹun dau teneng teneng.

¹⁶Un sepuʹo ngerada usa hoʹ cen tiraʹ dulu diaʹ abeʹ un pesingo berua re, diaʹ pisiu iaʹ abeʹ un semantet. Moʹ tiraʹ diaʹ pekina bang muyung dulu coʹ neng Allah.

¹⁷Moʹ un katuk de koʹ baʹan ca biai iaʹ nganap kaʹ dalem. Un Himinius ngan Pilitus koʹ baʹan pekina are.

¹⁸Lepa tai dancun ne ida dua neng janan katuk iaʹ telit, ngan kuma ha puyan kelunan numpak mudip cen patai lepa lapa ne. Ina ukoʹ un kudaʹ usa tai kaham pengelan nte.

¹⁹Un sepuʹo puʹun iaʹ Allah ban nyalet, nyahut te ke liung. Moʹ Allah nyalet te man tiraʹ a iaʹ pekini dau: “Tuhan tisen aheʹ aheʹ diaʹ anun ne.” Ngan laʹa: “Buk aheʹ iaʹ kuma ha: ‘Akeʹ iaʹ anun Tuhan,’ atek ke ke ngerada usa ha cen puyan iaʹ jaʹat.”

²⁰Un kedalem ca amin bioʹ, kadoʹ naʹan kiut ngan kuden. Un pe palai mat, un pe palai pirak, un pelaʹa kayu ngan tanaʹ. Un diaʹ ilu kanan neng diaʹ tiga, un diaʹ ilu kanan neng diaʹ jaʹat.

²¹Buk aheʹ iaʹ muheʹ penawai ie cen katuk iaʹ jaʹat ina, ia iaʹ koʹ baʹan kiut mat iaʹ tiga. Ia lepa tai buheʹ. Sukat tuʹa amin ne ke kanan ia, ngan tenup tekaʹ neng mung gayeng iaʹ tiga.

²²Un sepuʹo ngerada usa hoʹ neng puyan asam pengubaʹ demanai hoʹ are. Nengayet ne ikoʹ neng iaʹ teneng, ngan neng pengelan, ngan neng pengemalaʹ, ngan neng udip iaʹ tadan, pemung ngan mung kelunan diaʹ pesente tawai re palaʹ Tuhan ngan tekaʹ dalem penawai iaʹ buheʹ.

²³Ikoʹ nyekang ne mung tiraʹ paseʹ iaʹ apaʹ, iaʹ abeʹ un luʹung. Ikoʹ tengen pe tisen puyan diaʹ pekina ngkin dulu pekenca.

²⁴Aheʹ diaʹ pegayeng me Tuhan, abeʹ de tekep ke pekenca, bang tiga seluk dau neng kelunan mung, ngan mencam pekatuk iaʹ tiga ngan denaʹ saheʹ.

²⁵Man lemaʹ saheʹ de negun katuk neng diaʹ peneti ngan nte. Masaʹ pe Allah ke naʹ puyan man nte nyepuleʹ kimet de, apan nte tai tisen neng katuk telit.

²⁶Pekina ketai re alaʹ ngeliwet kimet neng iaʹ teneng, penco re pesau cen kelabak Bali Jaʹat, iaʹ ban dakep ida ngan cuk ida bayaʹ pengubaʹ a are.