Read Wahau Kenyah 2 TIMUTIUS 3 Bible Online

2 TIMUTIUS 3 - Wahau Kenyah bible

2 TIMUTIUS 3

¹Petawai hoʹ neng puyan ini: Tegoʹ ketai kuʹo udip ʹo, ke un penaru iaʹ baran dalau ina.

²Moʹ dulu ke malaʹ neng usa re tengen, mekum neng ligit, balang tawai, kancau, pejaʹat dau neng dulu. Tai re muau neng ueʹ ngan amai re, abeʹ de nyuaʹ tiga saheʹ, ngan untau pe ida.

³Durat ne saheʹ de, abeʹ de tisen lesau, tai re pejaʹat dau neng dulu, abeʹ de mencam mapo asam tawai re, ngan minget, ngan miʹi neng puyan iaʹ tiga,

⁴mencam nyekaluk, mahing pisiu, mpau kimet de. Malaʹ de neng pengawaʹ usun tanaʹ ini. Nyahut de malaʹ Tuhan Allah.

⁵Ida ngelayen usa re koʹ seʹ diaʹ mudip temek bayaʹ Allah, un sepuʹo penyukat ke mudip temek ina, lepa ne ida nyekang nge. Ngerada ne usa hoʹ neng diaʹ pekina.

⁶Moʹ un palai mida diaʹ nyelem tai kedalem amin dulu, sulo re petabo neng leto diaʹ untau, diaʹ lenca dalem penyalaʹ, diaʹ puyung kuʹun kadoʹ naʹan pengubaʹ de.

⁷Leto diaʹ pekina lemuto pekalai, un sepuʹo tepa laleʹ penisen nte neng katuk telit.

⁸Kuaʹ koʹ baʹan Janis ngan Jamberis nyekang dau Musa cen naʹaʹ, pekina lete ida dina nyekang katuk telit, ngan durat ne kimet de, ngan coʹ de neng pengelan.

⁹Un sepuʹo abeʹ gayeng nte kumpin telicuk laʹa, moʹ penguntau re kenai luhaʹ kata dulu mung ʹo, kuaʹ koʹ baʹan penguntau Janis de dua Jamberis iaʹ nai luhaʹ are.

¹⁰Lepa ne ikoʹ nyituk bayaʹ dau katuk keʹ, ngan seʹ penyaheʹ keʹ, ngan neng iaʹ atek sen pengudip keʹ. Tisen pe ikoʹ neng pengelan nceʹ, ngan seʹ pengedenaʹ tawai heʹ, ngan seʹ pengemalaʹ keʹ, ngan seʹ pengemihen nceʹ,

¹¹ngan seʹ puyan dulu nyakit akeʹ ngan petuyen akeʹ. Moʹ ikoʹ tengen pe tisen neng puyan iaʹ ban sihoʹ akeʹ kaʹ Antiukia, ngan kaʹ Ikunium, ngan kaʹ Listera are. Tisen pe ikoʹ ban pasak kadoʹ penuyen iaʹ sihoʹ akeʹ. Un sepuʹo neng dina mung, Tuhan iaʹ sau akeʹ kidi.

¹²Lan lete mung dulu diaʹ ubaʹ ke mudip temek bayaʹ Allah pemung dalem Keristus Yesus, atek de ke sihoʹ tuyen kuʹun dulu.

¹³Un sepuʹo dulu diaʹ jaʹat ngan diaʹ ngaloʹ, ke un pit un pit pengeja at de, mentung nte pelingu dulu, ngan ida tengen pe ke pelingu ida loʹ.

¹⁴Un sepuʹo tiga hoʹ tudep dalem mung katuk iaʹ telit, iaʹ ban ikoʹ pekalai ngan ngelan, moʹ tiga hoʹ ngetisen aheʹ diaʹ ban pekatuk ikoʹ.

¹⁵Cen dalau iʹut coʹ, lepa tisen ne ikoʹ neng Kitap iaʹ buheʹ, iaʹ ban naʹ penisen mikoʹ iaʹ ngkin ikoʹ palaʹ udip dalem Tuhan kuʹun pengelan dalem Keristus Yesus.

¹⁶Moʹ mung Kitap iaʹ ban Allah peluhaʹ, un bang nge man le pekatuk tiraʹ iaʹ telit, man le negun dau neng iaʹ salaʹ, man le penceng iaʹ jaʹat, man le pekatuk neng janan udip iaʹ teneng,

¹⁷apan kelunan diaʹ pegayeng me Allah ketai daʹam penisen nte, ngan dengkep senganan nte neng mung naʹan gayeng iaʹ tiga.