Read Wahau Kenyah IBERANI 11 Bible Online

IBERANI 11 - Wahau Kenyah bible

IBERANI 11

¹Puyan pengelan le, iaʹ ina puyan salet tekaʹ kimet le neng puyan iaʹ ilu nebelum ke uyan, ngan tugen tekaʹ le neng iaʹ ilu abeʹ un taʹan.

²Diaʹ lataʹ cen naʹaʹ iaʹ sihoʹ pengubaʹ Allah kuʹun pengelan nte.

³Kuʹun pengelan ne ilu tisen uban langit ngan tanaʹ ini lepa nuyan kuʹun isiu Allah, idi puyan iaʹ ilu taʹan lepa nuyan cen puyan iaʹ ilu abeʹ senteng taʹan.

⁴Uban kuʹun pengelan ne Habil mencai palaʹ Allah ca pencai liwa iaʹ pelapa tiga cen anun Kain. Uban kuʹun pengelan ne Habil iaʹ ban niga kimet Allah. Ca kelunan iaʹ teneng ne ia, uban Allah tengen iaʹ badaʹ seʹ e ubaʹ pencai ie. Moʹ kuʹun pengelan ne Habil caʹ pisiu ilu, naʹ pe ia lepa matai.

⁵Kuʹun pengelan ne Inuk abeʹ un matai, un sepuʹo ia tai kayang palaʹ Allah. Abeʹ un aheʹ senteng pita ia uban Allah lepa ngayang ia. Un dau Kitap badaʹ kuma ha, kena Inuk tai kayang kempau, ia iaʹ ban niga kimet Allah.

⁶Kelunan aheʹ pe abeʹ senteng ke niga kimet Allah buk ke abeʹ un pengelan. Moʹ aheʹ iaʹ nai ngejuma Allah, abeʹ e senteng are ngelan uba Allah iaʹ un, ngan ngelan uban Allah iaʹ naʹ bang me kelunan diaʹ mita ia.

⁷Kuʹun pengelan ne Nuh kenahan dau pulen Allah neng puyan iaʹ ke nuyan bayaʹ, iaʹ ia abeʹ un taʹan lepe. Nuh bayaʹ dau Allah, penco uyan ca kapen sungai iaʹ ukoʹ diaʹ pemanak ke pemung ngan ne ke mudip ʹo. Man puyan ne pekina Nuh mekun salaʹ neng kelunan kusun tanaʹ, kun ne alaʹ cen Tuhan Allah puyan peneneng iaʹ nai kuʹun pengelan.

⁸Kuʹun pengelan ne Ibrahim bayaʹ dau tegoʹ Allah mengin ia are. Penco Ibrahim tai palaʹ ca tanaʹ iaʹ Allah petuket ke naʹ mia. Kun ne mecin tanaʹ a tengen, mentung nge abeʹ un tisen kempi ia ukoʹ o ketai.

⁹Kuʹun pengelan ne Ibrahim mudip kuaʹ baʹan ca iaʹ nyakai neng tanaʹ iaʹ Allah lepa petuket naʹ mia. Kun ne mudip dalem lepau anit pun pemung ngan Isak ngan Yakup, moʹ ida dua kuaʹ alaʹ tuket ina cen Allah lete.

¹⁰Moʹ Ibrahim iaʹ ngena lepoʹ iaʹ Allah nyedep ke uyan, iaʹ Allah ke medeng lete, iaʹ ina lepoʹ iaʹ un puʹun besun iaʹ salet pa majan.

¹¹Kuʹun pengelan ne Ibrahim senteng tai nuyan ca amai, naʹ pe ia kaya laleʹ, ngan naʹ pe Sara tengen pe lua. Ibrahim petapi tawai ie palaʹ Allah iaʹ ke ngkang tuket te.

¹²Naʹ pe Ibrahim seleket matai, cen ia lete anak su nai kuaʹ baʹan kadoʹ betuʹen kaʹ langit, ngan pekina pe kuaʹ baʹan ahit kaʹ sada bahi banget iaʹ ilu supeʹ ke pecap.

¹³Mung kelunan dini are, lepa matai dalem pengelan. Abeʹ de alaʹ puyan iaʹ Allah lepa petuket ke naʹ mida, un sepuʹo cen coʹ ne ida taʹan ngan nyelama kidi. Kun nte ngahaʹ kata dulu mung uban nte kelunan nyakai ngan tutang kusun tanaʹ ini.

¹⁴Luhaʹ kimet kelunan iaʹ pisiu pekina dau atek de mita ca naʹan tanaʹ mida tengen.

¹⁵Abeʹ de gurang tekaʹ kimet neng tanaʹ iaʹ ida lepa mecin are. Buk de gurang are, senteng pe ida tai uleʹ liwet laʹa.

¹⁶Un sepuʹo ida bampa neng ca tanaʹ iaʹ pelapa tiga, iaʹ ina tanaʹ surga. Ina ukoʹ Allah abeʹ un saʹe ke pisiu ia atek Allah iaʹ anun nte, uban ia iaʹ lepa petenup ca lepoʹ mida.

¹⁷Kuʹun pengelan ne Ibrahim mencai anak ke Isak ca pencai liwa tegoʹ Allah ten ia are. Naʹ pe ngan Ibrahim Allah uyan tuket te, Ibrahim lete iaʹ tenup tekaʹ ke mencai anak ke ca liwa.

¹⁸Lepa ne Allah pisiu Ibrahim kuma ha: “Cen mela Isak ikoʹ ke un anak ngan su ʹo.”

¹⁹Ibrahim ngelan uban Allah iaʹ senteng ke numpak pebeteʹ Isak cen patai, ngan seleket Ibrahim alaʹ ia uleʹ cen patai lete.

²⁰Kuʹun pengelan ne Isak petuket ke naʹ peniga iaʹ kenai bayaʹ, palaʹ Yakup ngan Isau.

²¹Kuʹun pengelan ne Yakup naʹ peniga me anak Yusup de dua padeʹ kena ha ke matai. Kun ne nyegayau neng sekut te, mentung lemameʹ Allah.

²²Kuʹun pengelan ne Yusup pisiu neng puyan lepoʹ Israil ke buau cen tanaʹ Masir. Kun ne badaʹ kumpin tuk puyan nte neng tulang patai ie. Mung dau ina ia pisiu tegoʹ o kece ke matai.

²³Kuʹun pengelan nte diaʹ tuʹa Musa nyuhuk ia dalem telu bulan uʹo lepa ha pempet. Ida taʹan ia ca anak iaʹ tiga seʹ puyan. Abeʹ de takut muau dau ukum laja.

²⁴Kuʹun pengelan ne Musa leko ke alaʹ ngadan anak amung neng anak Piraun tegoʹ o lepa bioʹ udip pe are.

²⁵Kun ne lemileʹ tuyen pemung ngan kelunan diaʹ anun Allah neng ʹo bangen ne nuat le dalem penyalaʹ.

²⁶Musa pekimet puyan dulu nyepuhoʹ ia kuʹun Keristus, ngan kuma tiga kuʹo ne bang cen puyan ina tegoʹ o pata ha ngan bang cen puyan mung pengekayaʹ lepoʹ Masir are. Un pekina dau Musa uban ne nyalet taʹat te neng bang iaʹ ia ke un bayaʹ.

²⁷Kuʹun pengelan ne Musa mecin tanaʹ Masir, ngan abeʹ un takut tekaʹ kuʹun iʹa laja. Koʹ baʹan puyan ne taʹan Allah iaʹ mata le abeʹ senteng taʹan, ina ukoʹ o abeʹ un dayo tai ngeliwet.

²⁸Kuʹun pengelan ne Musa nading ke nyalet Bunut Paska, ngan cuk dulu migai dahaʹ neng pamen nte, apan Melikat Patai abeʹ un lematai diaʹ anak ading kelunan Israil are.

²⁹Kuʹun pengelan ne lepoʹ Israil tai pelawat Banget Bala kuaʹ baʹan masat kaʹ tanaʹ re. Tegoʹ lepoʹ Masir ten ketai bayaʹ ida, penco sungai nampun ida.

³⁰Kuʹun pengelan ne iaʹ ukoʹ kerahan batu lepoʹ Yeriko mapeʹ uʹo lepa lepoʹ Israil tai masat teliling nge dalem tujoʹ tau are.

³¹Kuʹun pengelan ne Rakap, leto pedayang ina, abeʹ un matai pemung ngan dulu diaʹ muau neng Allah are. Uban Rakap iaʹ alaʹ kelunan melip, ngan selama dau neng ida.

³²Kumpin un tekep keʹ metuk isiu ini laʹa tupe? Abeʹ un nceʹ biʹen pisiu puyan Gidiun, Barak, Samsun, Yepta, Daut, Samuil ngan diaʹ pegawa are.

³³Kuʹun pengelan ne ida pesupeʹ lepoʹ dulu. Ida menco puyan iaʹ teneng ngan alaʹ iaʹ Tuhan Allah petuket ke naʹ mida. Ida mekep paʹ singa,

³⁴ngan lemataʹ luten bangoʹ, ngan petakau usa re cen puyan iaʹ ke lematai ida man bahing. Naʹ pe ida lemaʹ, pali kuʹo pe ida. Ida muat dalau pekayau, ngan pesupeʹ bawa lepoʹ dulu.

³⁵Kuʹun pengelan nte un palai leto diaʹ alaʹ anak de diaʹ matai nai numpak mudip. Un palai laʹa abeʹ de ubaʹ kelap dulu diaʹ mumik lematai ida. Ida nengayet neng ina apan nte senteng numpak beteʹ neng udip iaʹ pelapa tiga ʹo.

³⁶Dulu nyepuhoʹ ngan lemeta palai. Un pelaʹa dulu ngaput ngan nyepin palai.

³⁷Un palai sihoʹ tebaleng batu, ngan palai mida dulu ngisa mese dua, ngan palai mida dulu lematai man bahing. Ida pegelam usa re man anit dumba ngan anit kading. Kadip pe ida. Un pe dulu nyakit ngan peketa ida.

³⁸Pelapa aleʹ tiga re, ina ukoʹ de abeʹ un marung neng layen udip dulu kusun tanaʹ ini. Ida masat masat koʹ baʹan kelunan petutang-utang kaʹ tanaʹ lenga, ngan kaʹ tanaʹ mudung. Ida mudip kaʹ dalem lubang batu ngan lubang tanaʹ.

³⁹Muʹo tawai le pekimet mung puyan iaʹ nuyan kuʹun pengelan kelunan dini are. Naʹ pe pekina, abeʹ de alaʹ iaʹ bioʹ iaʹ Tuhan Allah petuket ke naʹ mida,

⁴⁰moʹ Allah lepa metep kimet te neng sedep iaʹ pelapa tiga, iaʹ ke ngahum ilu. Atek tengangan kimet te, abeʹ e ubaʹ pedaʹam ida buk de abeʹ un kahum neng ilu.