Read Wahau Kenyah IBERANI 12 Bible Online

IBERANI 12 - Wahau Kenyah bible

IBERANI 12

¹Naʹkini mung dini are, nuyan ca mpun bioʹ iaʹ neliling ilu. Ida badaʹ tugen neng puyan pengelan. Ina ukoʹ tiga ne ilu ngemuga usa le cen mung inu iaʹ nyebampet ilu, ngan penyalaʹ iaʹ aleʹ ngelibit ilu. Tiga ne ilu ngan teto ke ngasa neng pasa iaʹ Allah peteneng milu.

²Tiga le nyalet taʹat le palaʹ Yesus, moʹ ia iaʹ ukoʹ tapi pengelan le cen tading nge pa ketai kelepa ha. Abeʹ Yesus luʹap kuʹun puyan tecek are, un sepuʹo penyaʹe puyan ne matai neng usun kayu tecek abeʹ un inu tekaʹ a pekimet puyan ina, uban kuʹun pengebangen iaʹ ngena ia, ngan naʹkini ia madung tahaʹ taʹu padung pengaren Allah.

³Nawai tiga neng puyan iaʹ ia lepa sihoʹ, kumpin seʹ e nengayet tegoʹ kelunan penyalaʹ aleʹ miʹi neng ia are. Uban ne pekina, ayen ncem tai janga tawai ke ngeluʹap.

⁴Uban dalem puyan ncem ke ti ngan nyakat neng puyan penyalaʹ, abeʹ lepe ikem ti pa pa matai.

⁵Malap ikem lepa lingu isiu Allah man ne ke petangen ikem kuaʹ baʹan anak ke, kuma ha: “Ahaʹ anak keʹ, pekimet tiga tiga tegoʹ Tuhan ke ngenca pekatuk ikem. Ngan ayen leko tegoʹ Tuhan miʹa ikem.

⁶Uban singket usa iaʹ Tuhan malaʹ, ia ke ngenca pekatuk ida lete. Ngan singket usa iaʹ Tuhan alaʹ anak ke, ia ke lemeta lete ida pe.”

⁷Ngihen ne neng tuyen ncem, ngan pekimet puyan ina puyan Amai iaʹ ke ngenca pekatuk ikem. Uban puyan penuyen ncem ke peluhaʹ uban Allah iaʹ pekimet ikem diaʹ anak ke. Mpi un ca anak iaʹ abeʹ un sihoʹ kenca katuk amai ie.

⁸Buk kem abeʹ un sihoʹ kenca katuk kuaʹ baʹan mung anak ke are, sen ina, abeʹ kem anak lan, bang anak ahang ne ikem.

⁹Buk le pekimet amai le neng puyan le kelunan, ida ngenca pekatuk ilu, ngan ilu nyelumuk ida. Moʹ ina nco tekep pe laʹa ilu tunuk palaʹ Amai le neng puyan udip berua le, idi le ke mudip.

¹⁰Amai le neng puyan le kelunan lepa ngenca pekatuk ilu nuat tuaʹ le, ngan puyan iaʹ teneng baʹan dau re. Un sepuʹo Allah menco puyan ini apan ne ke uyan peniga milu, idi le ketai pebulung dalem pengebuheʹ e.

¹¹Tegoʹ le sihoʹ kenca katuk, un tekaʹ le sihoʹ puyan iaʹ ke ngebahat tawai le, abeʹ e puyan iaʹ ke ngebangen ilu. Un sepuʹo kelunan diaʹ alaʹ kimet bayaʹ kenca katuk ina are, seleket de ke majau puyan iaʹ tadan, iaʹ kenai buʹan cen peneneng udip de.

¹²Uban ne pekina, tiga hem mejo ne ujoʹ kem iaʹ lemaʹ, ngan pekina pe taket cem iaʹ metut.

¹³Nyemamet ne masat neng janan iaʹ telit, apan kelunan diaʹ kenai bayaʹ ikem abeʹ un tapa, di lareʹ maget de.

¹⁴Nengayet ke mudip tadan ngan kelunan mung, ngan pekina pe nengayet ke mudip buheʹ, uban ca usa mele aheʹ pe abeʹ senteng taʹan Tuhan buk ke abeʹ un udip iaʹ buheʹ ina.

¹⁵Pekimet tiga tiga malap ca usa neng ahang ikem ke tepa neng pengelesau Allah. Pekimet tiga tiga malap ca usa neng ahang ikem ketai nuyan koʹ baʹan ca inan pula iaʹ paʹit, iaʹ kenai bioʹ ngan ngeratang kadoʹ kelunan kuʹun laʹit te.

¹⁶Pekimet tiga tiga malap ca usa neng ahang ikem ketai nuyan koʹ baʹan Isau iaʹ abeʹ un nyingo adet buheʹ kahang laki ngan leto, pekina pe abeʹ e nyingo udip berua ha. Moʹ Isau iaʹ matu puyan ngadan ne anak ading suaʹ ca kiut lekai.

¹⁷Tisen lete ikem, uban bayaʹ ne Isau ubaʹ ke alaʹ peniga cen amai ie: abeʹ e mencam mita janan iaʹ ke pekaliu pemuyan iaʹ ia lepa ti cen kena, naʹ pe ia ngeluloʹ le mata ha ke mita. Allah iaʹ nyekang ia.

¹⁸Abeʹ kem koʹ baʹan lepoʹ Israil cen naʹaʹ are, diaʹ nai palaʹ ca mudung iaʹ ida senteng ke ten tekaʹ. Dalau ina are, un luten iaʹ ngeraban; un pe mentem, ngan malep, ngan layam.

¹⁹Un pe dau tuyau tekepip, ngan dau isiu. Tegoʹ kelunan dina kenahan dau isiu ina, penco re ngelapen nyat ayen buhaʹ ida kenahan dau ca luʹung isiu laʹa,

²⁰uban nte kuma abeʹ nyatan tekaʹ le kuʹun dau pulen isiu iaʹ kuma ha: “Pa abeʹ ca pun iaʹ ke cut mudung ina abeʹ senteng are ke sihoʹ tebaleng batu pa ha matai.”

²¹Jaʹat aleʹ puyan iaʹ ida taʹan ina, pa dau Musa kuma: “Ngeregen tekaʹ keʹ takut.”

²²Un sepuʹo ikem lepa nai palaʹ Mudung Siun, ngan lepoʹ Allah iaʹ mudip, iaʹ ina Yerusalim cen surga pemung ngan ibu ibu melikat te.

²³Ikem lepa nai ngan bangen palaʹ mpun diaʹ anak Allah diaʹ bioʹ udip. Ngadan nte senurat dalem surga. Ikem lepa nai palaʹ Allah iaʹ pebetep tiraʹ neng kelunan mung. Ikem lepa nai palaʹ kudaʹ kudaʹ berua kelunan diaʹ teneng, diaʹ lepa nuyan daʹam.

²⁴Ikem lepa nai palaʹ Yesus iaʹ lepa peteneng penyalet tuket iaʹ mading. Ikem lepa nai palaʹ pigai dahaʹ iaʹ badaʹ puyan iaʹ pelapa tiga cen ʹo dahaʹ Habil cen naʹaʹ are.

²⁵Ina ukoʹ pekimet tiga tiga, ngan ayen ncem muau neng ia iaʹ pisiu ilu naʹkini. Kelunan diaʹ lepa muau neng ia iaʹ menco tiraʹ Tuhan kusun tanaʹ ini are, abeʹ de senteng kelap ukum. Menco ne pelaʹa ilu, buk le ke nyelikut ia iaʹ pisiu ilu cen surga, abeʹ le senteng kelap ukum ʹo.

²⁶Dalau idai are, isiu Allah peliung tanaʹ, un sepuʹo naʹkini ia petuket kuma ha: “Ca liwai laʹa akeʹ ke peliung tanaʹ. Tegoʹ ina, abeʹ e tanaʹ tuaʹ le, un sepuʹo surga ke liung lete.”

²⁷Kuʹun isiu iaʹ kuma ha “ca liwai laʹa” luhaʹ uban mung puyan iaʹ lepa nuyan ke liung ngan pesau, apan ke nahung puyan iaʹ abeʹ senteng ke liung ʹo.

²⁸Ina ukoʹ tekep le nyuaʹ tiga saheʹ uban le lepa alaʹ ca puyan iaʹ ngaren ilu, iaʹ abeʹ senteng ke liung. Tekep le nyuaʹ tiga saheʹ ngan lemameʹ palaʹ Allah ngan puyan iaʹ sihoʹ pengubaʹ a iaʹ ina ngan puyan temek ngan tunuk.

²⁹Moʹ Tuhan Allah le, atek ca luten iaʹ ke uman inu inu pa salai.