Read Wahau Kenyah IBERANI 13 Bible Online

IBERANI 13 - Wahau Kenyah bible

IBERANI 13

¹Tudep ne malaʹ neng ikem semaheʹ, kuaʹ baʹan pecenganak dalem Keristus.

²Nawai ne nyelama alaʹ sakai kaʹ dalem amin ncem. Cen naʹaʹ un palai diaʹ ti pekina ngan nyelama alaʹ melikat petem nte abeʹ un tisen ida melikat.

³Nawai kelunan diaʹ dalem sepin, koʹ baʹan tekaʹ kem pemung ngan nte dalem sepin. Nawai kelunan diaʹ tuyen, koʹ baʹan tekaʹ kem tuyen pemung ngan nte lete.

⁴Tekep le mung ke pubo puyan pepeto ngan iaʹ selumuk. Tekep ne laki ngan leto, diaʹ lepa pepeto, ngkang ca le kimet neng ida semaheʹ. Moʹ Allah iaʹ ke metep ukum neng kelunan iaʹ abeʹ un nyingo adet buheʹ kahang laki ngan leto, pekina pe neng kelunan iaʹ pemung nyelem.

⁵Neng puyan pengudip kem, ayen peletoʹ malaʹ neng ligit, bang teto tekaʹ neng inu iaʹ ikem un. Uban Allah lepa pisiu kuma ha: “Peletoʹ-letoʹ keʹ abeʹ keʹ ke mecin ikem. Peletoʹ-letoʹ keʹ abeʹ keʹ ke peterai ikem.”

⁶Ina ukoʹ tiga ne ilu tempa tekaʹ ngan kuma: “Tuhan iaʹ mepo akeʹ. Abeʹ keʹ ke takut ʹo. Inu iaʹ kelunan senteng ti neng akeʹ tupe?”

⁷Nawai neng tuʹa hem cen kena are, diaʹ menco katuk Allah palaʹ ikem. Pekimet tiga neng puyan pengudip de, ngan puyan nte matai lete. Ngan tiga hem ngatap seʹ puyan pengelan nte.

⁸Yesus Keristus abeʹ un pekaliu, kuaʹ koʹ baʹan cen kena are, pekina pe ia tau ini, ngan pekina pe ia pa majan ʹo.

⁹Ayen buhaʹ naʹan naʹan katuk bulen ke peduncau ikem. Tiga ne penawai le nuyan salet kuʹun pengelesau Allah. Abeʹ tiga le nebelum palan penguman ke nyalet penawai le. Moʹ kelunan diaʹ bayaʹ adet pekina, abeʹ un bang nte kuʹun ne.

¹⁰Kelunan detaʹu diaʹ pegayeng dalem luncung palan lepoʹ Yahudi, abeʹ un penekep iaʹ ukoʹ de senteng ke uman liwa iaʹ kempau padung pengencai le.

¹¹Laki Pengebioʹ Detaʹu Yahudi, iaʹ malai ngkin dahaʹ pun kaʹ dalem kukoʹ iaʹ Pengekuʹo Buheʹ, ke mencai ie nuyan liwa me penyalaʹ. Un sepuʹo ida nutung patai pun dina tahaʹ awang lepoʹ.

¹²Tuman ina lete Yesus matai tahaʹ awang pamen lepoʹ, apan man dahaʹ a tengen ia ke muheʹ kelunan kadoʹ cen penyalaʹ.

¹³Uban ne pekina, tiga ne ilu tai palaʹ Yesus tahaʹ awang lepoʹ, ngan kahum ngan ne dalem puyan penyaʹe he tegoʹ dulu lemanyaʹ ilu.

¹⁴Moʹ abeʹ un ca lepoʹ iaʹ dengkep milu kusun tanaʹ ini. Ilu mita ca lepoʹ iaʹ kenai uʹo.

¹⁵Uban ne pekina, tiga ilu lemuto-uto mencai pengepada le palaʹ Allah, kuaʹ liwa le kuʹun Yesus, iaʹ ina pencai iaʹ ilu mencai man dau paʹ iaʹ teto ngahaʹ ngadan ne.

¹⁶Ayen lingu ti puyan iaʹ tiga, ngan mepo ikem semaheʹ, uban puyan dini ne nuyan liwa diaʹ ke niga kimet Allah.

¹⁷Bayaʹ ne dau diaʹ tuʹa hem dalem Tuhan, ngan tunuk ida. Ida diaʹ pubo penawai hem, ngan abeʹ un ngelineʹ-lineʹ, moʹ ida abeʹ senteng are ke mipa kumpin puyan gayeng nte palaʹ Allah. Buk kem bayaʹ dau re, ida ke menco gayeng nte ngan bangen tekaʹ. Buk are pekina, ida ke ti ie ngan bahat tawai, ngan puyan iaʹ pekina abeʹ ke ngkin bang iaʹ ke mepo ikem.

¹⁸Lemuto ne lemameʹ mameʹ. Ameʹ tisen lan uban un dema tekaʹ dalem penawai meʹ, uban lemuto-uto ameʹ ubaʹ ti puyan teneng tuaʹ le.

¹⁹Nco pelaʹa akeʹ nyat ikem lemameʹ apan Allah ke mawang akeʹ laho nai naʹat ikem.

²⁰Tuhan le Yesus iaʹ Pengebioʹ diaʹ Manan Dumba, moʹ kuʹun puyan patai ie. Man puyan ina ia lepa ngelisan penyalet tuket iaʹ un pa majan. Allah iaʹ meteʹ ia cen patai ie.

²¹Awaʹ pe Allah iaʹ puʹun udip tadan ke naʹ mikem mung naʹan iaʹ tiga, iaʹ tekep ikem ke un, apan ncem senteng ti pengubaʹ kimet te. Awaʹ pe laʹa Allah iaʹ kanan Yesus Keristus ke uyan dalem ilu puyan iaʹ ke niga kimet te. Me Keristus ketai mung serema peniga pa pa majan. Amin.

²²Ahaʹ cenganak cenganak keʹ, ngelapen dau heʹ nyat ikem denaʹ tawai ke ngeringa dau katuk ini iaʹ ke petangen ikem, moʹ surat iaʹ akeʹ nyurat mikem ini, abeʹ un kumpin dadoʹ dau ue.

²³Akeʹ ubaʹ ikem ke tisen uban dulu lepa pawang cenganak le Timutius nai kelap cen dalem amin sepin. Buk ke laho nai, akeʹ ke ngkin ia ngan nceʹ tegoʹ keʹ nai naʹat ikem uʹo.

²⁴Badaʹ tiga saheʹ meʹ palaʹ mung diaʹ tuʹa Mpun ncem, pekina pe me mung kelunan diaʹ anun Allah. Cenganak le diaʹ cen tanaʹ Italia ngatu tiga saheʹ de palaʹ ikem.

²⁵Awaʹ pe pengelesau Allah ke un ngan ncem mung. 34