Read Wahau Kenyah IBERANI 4 Bible Online

IBERANI 4 - Wahau Kenyah bible

IBERANI 4

¹Naʹkini, lepa ne Allah petuket neng ilu, badaʹ ilu senteng tai kedalem iaʹ kukoʹ kelineʹ pemung ngan ne. Tuman ina tekep le alaʹ kimet takut, apan ca usa neng ahang ilu abeʹ un tapa, idi mung le tai kaʹ dalem iaʹ kukoʹ kelineʹ ina.

²Kuaʹ baʹan ida lete, ilu lepa kenahan dau Denga Tiga are. Ida kenahan te tiraʹ Tuhan ina, un sepuʹo abeʹ un ateng nta ha neng ida, moʹ de abeʹ ngelan serengan nte alaʹ a.

³Uban ne pekina, ilu diaʹ ngelan diaʹ tai kedalem iaʹ kukoʹ kelineʹ pemung ngan Allah. Kuaʹ baʹan dau ue are: “Miʹa tekaʹ keʹ neng ida, idi heʹ patek dau nyantet ida kuma ha: ‘Peletoʹ de abeʹ senteng nai kedalem iaʹ kukoʹ kelineʹ pemung ngan nceʹ.’ ” Naʹ pe gayeng Allah muʹo cen uʹo lepa ha uyan tanaʹ ini are, un dau pekina.

⁴Uban neng puyan tau iaʹ ketujoʹ un dau dalem Kitap kuma ha: “Allah ngelineʹ cen mung gayeng nge tegoʹ tau iaʹ ketujoʹ.”

⁵Un dau laʹa neng puyan ini kuma ha: “Nyahut de abeʹ senteng nai kaʹ dalem kukoʹ kelineʹ pemung ngan nceʹ.”

⁶Kelunan diaʹ ading kenahan dau Denga Tiga, abeʹ de tai kaʹ dalem kukoʹ kelineʹ pemung ngan Allah, uban nte abeʹ ubaʹ ngelan. Uban pekina un kelunan diaʹ ca iaʹ petem un awang senteng tai kaʹ dalem kukoʹ kelineʹ pemung ngan Allah.

⁷Luhaʹ puyan ini uban Allah badaʹ tau iaʹ ca iaʹ ia pisiu “tau ini.” Uban kudaʹ kudaʹ uman bayaʹ ina laʹa ia pisiu neng puyan ini man Laja Daut dalem jo Kitap iaʹ uʹo re kuma ha: “Buk tegoʹ tau ini ikem kenahan dau Allah, ayen ncem mahing kimet.”

⁸Buk lan ne Yusua lepa ngkin kelunan kaʹ dalem kukoʹ kelineʹ iaʹ anun Allah, abeʹ e ke pisiu ca liwai laʹa neng ca naʹan tau iaʹ kuma tau ini ilu senteng tai kaʹ dalem.

⁹Un sepuʹo iaʹ lan ne, petem un ne naʹkini ca puyan kelineʹ me kelunan diaʹ anun Allah, koʹ baʹan puyan Allah ngelineʹ tegoʹ tau ketujoʹ idai are.

¹⁰Kelunan mele aheʹ pe, iaʹ koʹ baʹan Keristus, iaʹ tai kaʹ dalem kukoʹ kelineʹ pemung ngan Allah ke pekenaʹ cen gayeng nge tengen, koʹ baʹan Allah pekenaʹ cen gayeng nge nyelung uyan tanaʹ ini cen naʹaʹ are.

¹¹Moʹ ina tekep lete ilu nengayet ketai kaʹ dalem kukoʹ kelineʹ pemung ngan Allah. Ayen ca milu tapa uban le muau koʹ baʹan puyan dulu cen naʹaʹ ban muau are.

¹²Atek mudip ne tiraʹ Allah ngan un penyukat. Tiraʹ Allah iaʹ lapa lerip cen bahing iaʹ nyahit seripa, ngan nyapaʹ pa besut neng ukoʹ tuk tawai ngan berua, koʹ baʹan neng ukoʹ tuk sekarup tulang ngan utak tulang. Tiraʹ ini iaʹ peluhaʹ pengubaʹ ngan kimet neng penawai kelunan.

¹³Ca inu pe abeʹ senteng suhuk kata Allah. Mung inu iaʹ lepa nuyan kusun tanaʹ un pesik ngan luhaʹ kata taʹat te. Palaʹ ia lete ilu mung abeʹ senteng are ke mipa kuʹun pemuyan le.

¹⁴Tuman ina, tekep le ngkang pali neng pengelan iaʹ ilu penco ini. Moʹ ilu un ca laki Pengebioʹ Detaʹu le. Atek bioʹ pe ia, ngan lepa ha tai kedalem kukoʹ kata Allah kaʹ surga. Yesus, Anak Allah ne ia.

¹⁵Laki Pengebioʹ Detaʹu le ina, abeʹ e kelunan iaʹ abeʹ un tisen tekaʹ pengelemaʹ le. Un sepuʹo ilu un ca laki Pengebioʹ Detaʹu le iaʹ lepa sihoʹ pengeten neng singket naʹan, kuaʹ ilu sihoʹ pengeten, un sepuʹo abeʹ e uyan penyalaʹ.

¹⁶Moʹ ina, tekep le nai palaʹ padung pengaren Allah ngan tempa tekaʹ. Kina ban un pengelesau. Kina ilu senteng alaʹ lesau, ngan tisen pengelesau iaʹ ke mepo ilu tegoʹ iaʹ penekep pe.