Read Wahau Kenyah IBERANI 8 Bible Online

IBERANI 8 - Wahau Kenyah bible

IBERANI 8

¹Ini ne umpung isiu le: ilu un ca Laki Pengebioʹ Detaʹu le iaʹ madung tahaʹ taʹu padung pengaren Allah iaʹ Atek Bioʹ kaʹ surga.

²Ia ngkang gayeng Pengebioʹ Detaʹu kukoʹ iaʹ kuʹo buheʹ, iaʹ ina dalem luncung palan iaʹ lan, iaʹ nedeng kuʹun Tuhan, abeʹ e nedeng kuʹun kelunan.

³Singket usa Pengebioʹ Detaʹu, dulu nyalet neng gayeng nte ke mencai pengencai ngan liwa pun palaʹ Allah. Uban ne pekina, tekep lete Pengebioʹ Detaʹu le ke un ca inu iaʹ ia ke mencai.

⁴Buk ke un neng usun tanaʹ ini, peletoʹ o abeʹ senteng nuyan ca detaʹu, uban un detaʹu diaʹ mencai pengencai bayaʹ puyan Adet Yahudi.

⁵Pemuyan nte detaʹu are, bang puyan ca kata ngan lingai neng iaʹ ke nuyan lan kaʹ surga. Kuaʹ baʹan puyan Musa cen naʹaʹ are. Kena ha ke medeng luncung palan, un dau Allah neng ia kuma ha: “Nawai tiga ne, uyan mung nge kuaʹ layen kata iaʹ ikoʹ taʹan kaʹ mudung are.”

⁶Un sepuʹo iaʹ lan ne Yesus un gayeng detaʹu iaʹ pelapa bioʹ cen anun nte, koʹ baʹan penyalet tuket, iaʹ ia lepa uyan kahang Allah ngan kelunan, un pelapa tiga uban, moʹ o pebesun neng tuket iaʹ petuket puyan iaʹ pelapa tiga.

⁷Buk ke abeʹ un iaʹ salaʹ neng penyalet tuket iaʹ ading are, abeʹ titin un penyalet tuket iaʹ kedua ha.

⁸Un sepuʹo Allah iaʹ peluhaʹ salaʹ kelunan diaʹ anun ne tegoʹ o kuma: “Un dau Tuhan: Un te tau iaʹ kenai, tegoʹ keʹ ke uyan ca penyalet tuket iaʹ mading neng lepoʹ Israil ngan lepoʹ Yahudi.

⁹Abeʹ e koʹ baʹan penyalet tuket iaʹ akeʹ uyan ngan tepun nte are, dalau heʹ ajak ngkin ida kawang cen tanaʹ Masir. Abeʹ de semamet bayaʹ tuket iaʹ akeʹ lepa uyan ngan nte, ina ukoʹ keʹ abeʹ un nyingo ida. Pekina dau Tuhan.

¹⁰Un sepuʹo naʹkini, ini ne penyalet tuket iaʹ akeʹ ke uyan ngan lepoʹ Israil uʹo: Un dau Tuhan: Akeʹ ke miget katuk adet ceʹ neng kimet de ngan nyurat te neng penawai re. Akeʹ ke nuyan Allah re, ngan ida ke nuyan kelunan diaʹ anun nceʹ.

¹¹Ca usa mida abeʹ titin ke pekatuk diaʹ kuaʹ lepoʹ o, pekina pe pisiu diaʹ kuaʹ panak ke kuma: ‘Tekep koʹ ke ngetisen Tuhan.’ Uban mung nte ke tisen akeʹ, cen diaʹ dumit pabeʹ diaʹ lataʹ.

¹²Akeʹ ke un pengelesau neng salaʹ de, ngan abeʹ keʹ ke nawai penyalaʹ de laʹa.”

¹³Luhaʹ uban tuket iaʹ ading are lepa mubo kuʹun Allah, uban Allah iaʹ pisiu neng puyan tuket mading ini. Moʹ inu iaʹ ketai mubo, ngan abeʹ un bang laʹa, laho ketai salai.