Read Wahau Kenyah 1 PETERUS 2 Bible Online

1 PETERUS 2 - Wahau Kenyah bible

1 PETERUS 2

¹Tuman ina pet ne mung puyan jaʹat, palo, ngan ngaloʹ, ngan ngetiʹet, ngan pejaʹat dulu.

²Koʹ baʹan anak bala iaʹ ngebaʹan iteʹ, tiga hem muhang tekaʹ ke ngebaʹan tiraʹ iaʹ seleket telang iteʹ iaʹ buheʹ me berua hem, apan cen puyan ncem nisep ina kenai telancek pengudip kem, idi hem tisen puyan iaʹ ke pudip ikem dalem Tuhan.

³Koʹ baʹan dau Kitap Tuhan: “Lepa ne ikem tisen tekaʹ neng ban puyan peniga Tuhan.”

⁴Nai ne ngenyeng Tuhan, ia ina ca sukaʹ batu iaʹ mudip. Naʹ pe kelunan ban pekaheʹ ia are, Allah ban lemileʹ ia iaʹ atek tiga.

⁵Nai ne singket singket cem koʹ baʹan sukaʹ batu diaʹ mudip, ngan naʹ ne usa hem ia kanan koʹ baʹan impa ke medeng ca amin palan iaʹ un udip berua. Kina hem ke ngkang gayeng detaʹu diaʹ buheʹ, apan ncem ke mencai liwa cen udip berua hem, iaʹ sihoʹ neng pengubaʹ Allah kuʹun Yesus Keristus.

⁶Moʹ un dau Kitap Tuhan: “Akeʹ lepa lemileʹ ca batu iaʹ atek tiga, naʹkini akeʹ uyan ne sukaʹ tekedeng penyalet Siun. Aheʹ iaʹ ngelan ia, nyahut te ke tai pebahoʹ ne.”

⁷Tiga laleʹ sukaʹ batu ina mikem diaʹ ngelan Tuhan. Un sepuʹo palaʹ dulu diaʹ abeʹ un ngelan: “Batu iaʹ tukang umaʹ dina ban pet, moʹ de kuma ha jaʹat, ban idi iaʹ tai nuyan sukaʹ tekedeng.”

⁸Un pe dau Kitap Tuhan pelaʹa: “Batu ini nuyan ca batu petatek, ca batu iaʹ ke pelaboʹ dulu.” Petatek te ida moʹ de muau neng tiraʹ ina. Pekina seʹ kimet Allah ngutung ida.

⁹Un sepuʹo ikem dini ca pemanak iaʹ ban Allah lemileʹ, ca mpun detaʹu puhoʹ laja, ca lepoʹ iaʹ buheʹ, ca mpun diaʹ anun Allah tengen. Ia ban lemileʹ ikem apan ncem pedenga puyan peniga Allah. Moʹ o ban mengin ikem kawang cen dalem ntem, ketai kedalem dema ha iaʹ selawan.

¹⁰Iaʹ cen naʹaʹ abeʹ kem diaʹ anun Allah, un sepuʹo naʹkini ikem nuyan mpun diaʹ anun ne. Cen naʹaʹ abeʹ lepe pengelesau Allah un neng ikem, un sepuʹo naʹkini un ne ban pengelesau ue neng ikem.

¹¹Ahaʹ cenganak diaʹ akeʹ malaʹ, ikem iaʹ koʹ baʹan diaʹ tutang ngan diaʹ mudip kena kusun tanaʹ ini. Pengenyat ceʹ, ayen ncem nyuluk neng asam pengubaʹ usa, iaʹ pekutat pebunoʹ ngan berua le.

¹²Tekep tiga penyaheʹ kem neng ahang dulu diaʹ abeʹ un ngelan Tuhan, apan tegoʹ de mekem salaʹ mikem, luhaʹ kena seʹ ban atek tiga pemuyan ncem, ina ukoʹ de ke pempau Allah tegoʹ Tau Tuhan kenai ʹo.

¹³Tuman Tuhan, tiga hem tunuk neng mung naʹan perinta kelunan, tiga ha men iaʹ paren bioʹ iaʹ ngkang perinta mpau,

¹⁴pekina pe me gebenur iaʹ paren bioʹ ina cuk tai nyuaʹ ukum neng kelunan diaʹ uyan jaʹat, ngan pada kelunan diaʹ uyan tiga.

¹⁵Moʹ pekina ne pengubaʹ kimet Allah: ia ubaʹ ikem ke kanan penyaheʹ tiga hem, man ncem ke penceng isiu turan turan iaʹ nai cen paʹ kelunan diaʹ abeʹ un mencam pekimet.

¹⁶Mudip ne ikem neng udip iaʹ pejo. Un sepuʹo ayen ncem kanan udip pejo ina man ncem mekep pengejaʹat cem, di lareʹ mudip ne ikem koʹ baʹan ulaʹ Allah are.

¹⁷Nyelama le ikem neng mung kelunan. Malaʹ ne ikem neng mung cenganak kem dalem Tuhan, mentung ngkem takut neng Allah, ngan nyelama neng iaʹ paren bioʹ perinta.

¹⁸Mung ngkem ulaʹ, tunuk ne palaʹ tuʹa hem pa muʹo tekaʹ selama hem. Abeʹ e bang tunuk palaʹ diaʹ tiga le, ngan diaʹ un saheʹ seʹ le, un sepuʹo palaʹ diaʹ laseʹ kimet neng ikem pe.

¹⁹Allah ke naʹ peniga mikem buk lan dema tekaʹ kimet dalem penawai hem ngejuma Allah dalem ngkem ngihen tuyen kuʹun dulu diaʹ abeʹ un tuman ukoʹ de petaru ikem.

²⁰Inu bang nge buk ke ngan denaʹ kem ngihen dulu mepan ikem suaʹ ban penyalaʹ kem tupe? Un sepuʹo buk ke ngan denaʹ kem ngihen neng penuyen suaʹ kem ban uyan tiga, ina ne ukoʹ Allah ke naʹ peniga mikem.

²¹Moʹ neng puyan ini ne Allah nengangan ban mengin ikem: moʹ lepa ne Keristus sihoʹ tuyen suaʹ ikem, ngan mahung ca kata mikem, apan ncem mencam tai bayaʹ uban puyan ne.

²²Abeʹ Keristus uyan penyalaʹ, ngan nyahut un ca palo cen isiu ue.

²³Dulu nunoʹ pe ia, abeʹ e nyuaʹ a man tunoʹ, ngan dalau ue sihoʹ tuyen, abeʹ e ngihaʹ ke nyakat, bang seʹ e pelek usa ha palaʹ Allah iaʹ pebetep dau ngan teneng.

²⁴Moʹ Keristus tengen iaʹ pesuʹun neng penyalaʹ le kedalem usa ha neng kayu tecek, apan le senteng matai cen penyalaʹ ngan mudip neng iaʹ teneng. Moʹ ban kuʹun suhat te, ina ukoʹ kem un maget.

²⁵Cen kena ikem daru koʹ baʹan dumba are, un sepuʹo naʹkini, lepa ne ikem ngeliwet nai bayaʹ ia iaʹ Manan ikem, ngan iaʹ Petubo berua hem.