Read Wahau Kenyah 1 YAYA 2 Bible Online

1 YAYA 2 - Wahau Kenyah bible

1 YAYA 2

¹Ahaʹ ikem diaʹ anak keʹ, akeʹ ti surat ini mikem apan ncem abeʹ un uyan penyalaʹ ʹo. Un sepuʹo buk aheʹ ke uyan penyalaʹ, ilu un Yesus Keristus, Laki iaʹ atek teneng, iaʹ lemameʹ dau milu neng Amai Bioʹ.

²Ngan usa Keristus tengen iaʹ ncai petutung tuman penyalaʹ le. Abeʹ e bang tuman penyalaʹ le tengen le, un sepuʹo tuman penyalaʹ mung kelunan kusun tanaʹ ini pe.

³Buk le tudep bayaʹ katuk ukum Allah, abeʹ le kawaʹ tekaʹ ngetisen ban le tisen lan neng ia.

⁴Buk un ca usa iaʹ kuma ha: “Akeʹ tisen Allah,” un sepuʹo abeʹ e tudep bayaʹ katuk ukum me, atek palo ne kelunan diaʹ pekina puyan. Abeʹ un katuk iaʹ telit neng ia.

⁵Un sepuʹo aheʹ iaʹ tudep bayaʹ katuk tiraʹ a, neng ia lete puyan iaʹ malaʹ neng Tuhan Allah lepa daʹam lan. Pekina puyan iaʹ ukoʹ le ke tisen lan ilu ban mudip dalem Allah:

⁶Aheʹ iaʹ kuma ia mudip dalem Allah, tekep pe mudip pekuaʹ ngan puyan pengudip Yesus Keristus are.

⁷Ahaʹ cenganak diaʹ akeʹ malaʹ, katuk ukum iaʹ akeʹ nyurat mikem ini, abeʹ e mading, bang katuk ukum iaʹ puʹun le iaʹ ikem lepa un cen tading tading nge are. Katuk ukum iaʹ puʹun ina, idi te katuk iaʹ ikem lepa kenahan are.

⁸Naʹ pe ia puʹun, katuk ukum iaʹ akeʹ nyurat neng puyan malaʹ ini lemuto un mading palaʹ ikem. Puyan ban ne lan lepa un luhaʹ dalem Keristus pekina pe dalem ikem, uban keno keno ke tai salai ntem, ngan ini ne seʹ nai dema iaʹ lan kenai luhaʹ.

⁹Aheʹ iaʹ badaʹ usa ha mudip neng dema, mentung miʹi neng cenganak ke, petem ia mudip neng ntem.

¹⁰Aheʹ iaʹ malaʹ neng cenganak ke, ia te iaʹ lemuto un dema neng pengudip pe, ngan abeʹ un ca inu neng ia iaʹ ukoʹ kelunan ketai laboʹ neng penyalaʹ.

¹¹Un sepuʹo aheʹ iaʹ miʹi neng cenganak ke, ia iaʹ mudip dalau ntem. Seʹ e masat dalau ntem, abeʹ e tisen kempi ketai ie, uban ntem ina iaʹ ngebutaʹ ia.

¹²Akeʹ nyurat palaʹ ikem diaʹ anak keʹ uban penyalaʹ kem lepa pesau kuʹun ngadan Keristus.

¹³Akeʹ nyurat palaʹ ikem diaʹ amai, uban ncem tisen Keristus ban un cen tading tading nge. Akeʹ nyurat palaʹ ikem diaʹ demanai, uban ncem lepa un usun neng Bali Jaʹat.

¹⁴Akeʹ nyurat palaʹ ikem diaʹ anak, uban ncem tisen Amai Bioʹ. Akeʹ nyurat palaʹ ikem diaʹ amai, uban ncem tisen Keristus iaʹ lemuto ban un cen tading tading nge. Akeʹ nyurat palaʹ ikem diaʹ demanai, uban ncem tagep seʹ ngan un katuk tiraʹ Allah mudip dalem ikem, ngan lepa ne ikem un usun neng Bali Jaʹat.

¹⁵Ayen ncem malaʹ neng puyan usun tanaʹ ini peging diaʹ anun ne. Buk kem malaʹ neng puyan usun tanaʹ ini, abeʹ un pengemalaʹ kem neng Amai Bioʹ.

¹⁶Mung inu iaʹ anun usun tanaʹ ini peging asam penyaheʹ usa, ngan inu iaʹ pelila kimet kelunan, ngan mung inu kusun tanaʹ ini iaʹ ukoʹ kelunan tai mpau kimet neng pengudip pe, bang cen puyan usun tanaʹ ini kenai mung nge. Nyahut abeʹ un ca puyan ina nai cen Amai Bioʹ pe.

¹⁷Puyan usun tanaʹ ini peging mung inu ue diaʹ kelunan ubaʹ kidi, abeʹ e ke un pa majan. Un sepuʹo aheʹ iaʹ tudep bayaʹ pengubaʹ kimet Allah, ia ke mudip pa pa majan.

¹⁸Ahaʹ anak anak keʹ, nyeng ketai kuʹo udip ne ini. Koʹ baʹan dau denga iaʹ ikem lepa tisen ban Bunoʹ Keristus atek kenai luhaʹ ʹo. Naʹkini lepa kadoʹ ne bunoʹ Keristus diaʹ luhaʹ. Ina ukoʹ le tisen ban ketai kuʹo udip ne ini.

¹⁹Ida diaʹ bunoʹ Keristus dina nai luhaʹ cen ahang ilu, sulo mecin ilu. Abeʹ de un atek lemakat cen mpun ilu. Buk de lemakat cen mpun le, atek de tudep ke pemung ngan le lete. Un sepuʹo ida lepa mecin ilu apan ne luhaʹ ban ca usa mida pe abeʹ un lemakat cen mpun le.

²⁰Tengen pe ikem uban lepa ne Keristus mubeʹ Berua Buheʹ neng ikem pa hem mung un penisen neng katuk iaʹ telit.

²¹Abeʹ seʹ keʹ nyurat mikem moʹ kem abeʹ un tisen neng katuk iaʹ telit, di lareʹ akeʹ nyurat mikem uban ncem lepa tisen kidi, ngan tisen ban nyahut abeʹ un ca palo nai musit cen katuk iaʹ telit ina.

²²Aheʹ iaʹ palo tupe? Ia iaʹ ngebawaʹ kuma abeʹ Yesus un atek Keristus iaʹ ngkang pungu Keniga Udip. Atek bunoʹ Keristus ne kelunan iaʹ pekina. Ia muau neng Amai Bioʹ peging Anak ina.

²³Uban aheʹ iaʹ muau Anak ina, ia te iaʹ muau Amai Bioʹ, ngan aheʹ iaʹ teto ngahaʹ Anak ina, ia lete iaʹ un Amai Bioʹ.

²⁴Tuman ina ayen ncem kawaʹ nyalet kaʹ dalem penawai hem toʹ dau katuk tiraʹ iaʹ ikem ban kenahan cen tading tading nge are. Buk kem ke pubo tiga tiga mung katuk tiraʹ iaʹ ikem lepa ban kenahan cen tading are, ina le ikem ke lemuto mudip petebulung dalem Anak ngan Amai Bioʹ.

²⁵Ngan ini ne tuket iaʹ Keristus lepa petuket ke naʹ milu, atek udip saheʹ kelineʹ iaʹ ngeriman.

²⁶Akeʹ nyurat ini mikem neng puyan kelunan diaʹ ubaʹ ke pelingu ikem.

²⁷Un sepe ikem dini, lepa ne Keristus mubeʹ Berua ha mikem. Buk un ban Berua ha ngelineʹ dalem ikem, abeʹ titin iaʹ ca ke pekatuk ikem uban Berua ha ina ke pekatuk ikem neng singket naʹan inu ne. Telit lan katuk ke, abeʹ palo un. Tuman ina tudep ne ikem bayaʹ katuk Berua ina, ngan nemek ne ngelineʹ dalem Keristus.

²⁸Ahaʹ anak anak keʹ, nemek ne ngelineʹ dalem Keristus apan le tempa ngan teto tekaʹ tegoʹ o kenai luhaʹ ʹo, abeʹ le pesuhuk ngan saʹe ke nyeripa ia tegoʹ Tau kenai ie ʹo.

²⁹Tisen te ikem uban Keristus iaʹ atek teneng. Ina ukoʹ tekep lete ikem ke ngetisen ne, ban mung diaʹ nemek uyan teneng, ida diaʹ anak Allah.