Read Wahau Kenyah 1 YAYA 3 Bible Online

1 YAYA 3 - Wahau Kenyah bible

1 YAYA 3

¹Pekimet kumpin seʹ Amai Bioʹ malaʹ ilu, uban pasak bioʹ ban pengemalaʹ a, pa dulu pisiu ilu diaʹ anak Allah. Anak ke lan lete ilu. Ini iaʹ ukoʹ dulu kusun tanaʹ ini abeʹ un nugen ngetisen ilu, uban abeʹ de nugen ngetisen Tuhan Allah lepe.

²Ahaʹ cenganak diaʹ akeʹ malaʹ, naʹkini ne ilu diaʹ ban anak Allah, ngan abeʹ un luhaʹ lepe ke kumpin seʹ puyan le ketai pekaliu uʹo. Un sepuʹo tisen lete ilu uban tegoʹ Keristus kenai luhaʹ ʹo, ilu ketai pekaliu kuaʹ baʹan diseʹ layen ne, uban le ke taʹan ia neng seʹ layen ne lan.

³Mung kelunan diaʹ un tebelum ina neng Keristus, ida diaʹ petuk ke buheʹ koʹ baʹan Keristus un buheʹ lete.

⁴Aheʹ diaʹ uyan penyalaʹ, un dengkep seʹ penyalaʹ a ngesa katuk adet Allah, uban puyan penyalaʹ ia ne iaʹ ngesa katuk adet.

⁵Tisen te ikem ban Keristus lepa nai luhaʹ apan ne mesau penyalaʹ kelunan, ngan nyahut abeʹ un penyalaʹ dalem Keristus.

⁶Tuman ina aheʹ diaʹ mudip dalem Keristus, abeʹ de pekutat uyan penyalaʹ. Un sepuʹo aheʹ diaʹ pekutat seʹ uyan penyalaʹ, luhaʹ ban nte abeʹ un taʹan Keristus lepe, ngan abeʹ un tisen ia pe.

⁷Ikem diaʹ anak keʹ, ayen buhaʹ kelunan mele aheʹ pe ke pelingu ikem. Aheʹ iaʹ ti puyan iaʹ teneng, ia te iaʹ teneng koʹ baʹan Keristus iaʹ teneng lete.

⁸Aheʹ iaʹ pekutat seʹ uyan penyalaʹ, atek anun Bali Jaʹat ne kelunan ina, uban Bali Jaʹat iaʹ uyan penyalaʹ cen tading tading nge. Ini iaʹ ukoʹ Anak Allah nenganan ban nai luhaʹ are, apan ne nasaʹ pemuyan Bali Jaʹat.

⁹Aheʹ diaʹ anak Allah, abeʹ de pekutat uyan penyalaʹ uban beneʹ Allah un mudip dalem ida. Abeʹ de senteng pekutat uyan penyalaʹ uban Allah iaʹ atek Tuʹa re.

¹⁰Cen puyan ini ne un luhaʹ seʹ ban tekajaʹ diaʹ anak Allah ngan diaʹ anak Bali Jaʹat: aheʹ diaʹ abeʹ un ti puyan iaʹ teneng buk ke are malaʹ neng diaʹ cenganak ke, abeʹ de anak Allah.

¹¹Katuk tiraʹ iaʹ ikem lepa ban kenahan cen tading tading nge are, pekini dau ue: tekep le malaʹ neng ilu semaheʹ.

¹²Ayen le koʹ baʹan Kain iaʹ ban anun Bali Jaʹat. Ia lematai iaʹ sadin ne. Inu adeʹ Kain ban lematai iaʹ sadin ne tupe? Uban un pemuyan ne jaʹat, ngan pemuyan iaʹ sadin ne un teneng, ina ukoʹ o lematai ia.

¹³Ahaʹ cenganak cenganak keʹ, tuman ina ayen tai muʹo tawai buk dulu kusun tanaʹ ini ke miʹi neng ikem.

¹⁴Tisen te ilu ban le lepa mecin patai ngan nai kaʹ dalem udip. Ilu tisen puyan ina uban kuʹun puyan le malaʹ diaʹ cenganak le. Kelunan diaʹ abeʹ un malaʹ neng cenganak de, petem lepe ida dalem patai.

¹⁵Aheʹ iaʹ miʹi neng cenganak ke, ia iaʹ kuaʹ baʹan ca iaʹ lematai kelunan. Tisen lete ikem uban kelunan iaʹ lematai kelunan abeʹ e un udip iaʹ saheʹ kelineʹ iaʹ ngeriman neng usa ha.

¹⁶Pekini ban le ke ngetisen inu ban puyan malaʹ: Keristus lepa naʹ udip pe tuman ilu. Ina ukoʹ tekep ilu ke naʹ udip le tuman diaʹ cenganak le.

¹⁷Buk ca kelunan kayaʹ, ngan ia taʹan seʹ cenganak ke tepet neng inu, petem me mempeng tekaʹ penawai ia neng cenganak ke ina, kumpin seʹ e senteng badaʹ ia un pengemalaʹ neng Allah dalem penawai ie tupe?

¹⁸Ahaʹ anak anak keʹ, ayen le malaʹ kelunan bang man dau isiu ngan dau paʹ tuaʹ le, di lareʹ tekep le peluhaʹ seʹ le malaʹ lan neng kelunan man ban pemuyan ne iaʹ telit.

¹⁹Tuman ina, pekini ban le ke ngetisen ilu un neng katuk iaʹ telit. Pekini ne puyan kimet le ketai salet tekaʹ ke ngejuma Allah.

²⁰Buk kimet le ke pesalaʹ ilu, tisen te ilu uban Allah iaʹ pelapa bioʹ cen uʹo kimet le, ngan tisen te ia neng mung inu pe.

²¹Tuman ina cenganak cenganak keʹ diaʹ akeʹ malaʹ, buk kimet le abeʹ un ke pesalaʹ ilu, tempa tekaʹ le ngejuma Allah.

²²Inu inu iaʹ ilu nyat kia, ilu alaʹ lete uban le tudep bayaʹ katuk ukum me, ngan ti pemuyan iaʹ sihoʹ pengubaʹ a.

²³Ini ne dau katuk ukum me milu: ngelan neng ngadan Anak ke Yesus Keristus, ngan malaʹ neng ilu semaheʹ koʹ baʹan Keristus lepa cuk ilu are.

²⁴Aheʹ kelunan iaʹ tudep bayaʹ katuk ukum Allah, ia lete iaʹ mudip dalem Allah, ngan Allah pe mudip dalem ia lete. Pekini ban puyan le ke ngetisen Allah mudip dalem ilu: ilu tisen uban kuʹun Berua ha iaʹ ia lepa naʹ milu.