Read Wahau Kenyah PUYAN LUHA’ 2 Bible Online

PUYAN LUHA’ 2 - Wahau Kenyah bible

PUYAN LUHA’ 2

¹Un dau Yesus laʹa: “Nyurat ne me iaʹ tuʹa Mpun kaʹ lepoʹ Ipesus: “Ini ne dau tiraʹ cen Laki iaʹ ngkang tujoʹ betuʹen neng ujoʹ taʹu ue, iaʹ masat kahang tujoʹ teken peritaʹ mat ina.

²Un dau Yesus, akeʹ tisen ne mung puyan iaʹ ikem lepa ti, ngan muhat seʹ kem pegayeng, ngan dadoʹ kimet cem. Tisen nceʹ lete moʹ abeʹ kem pedayo kelunan jaʹat pemung ngan ncem. Lepa ne ikem ten kelunan diaʹ kuma ida lawa Injil, di reʹ abeʹ pe ida lawa Injil lan. Moʹ luhaʹ ban puyan nte palo ikem.

³Un dadoʹ ban kimet cem dalau hem sihoʹ taru moʹ kuʹun ngadan nceʹ are. Abeʹ kimet cem tai luʹap.

⁴Un sepuʹo dau heʹ pesalaʹ ikem: naʹkini abeʹ ne ikem un malaʹ neng akeʹ kuaʹ baʹan seʹ kem malaʹ akeʹ cen kena re.

⁵Moʹ ina, petawai hem kudaʹcoʹ ban ncem lepa laboʹ idai. Nesen ne, nyepuleʹ kimet cem cen penyalaʹ kem. Bayaʹ ne puyan iaʹ ikem lepa ban ti cen kena are. Buk kem are nesen ngan nyepuleʹ kimet cem cen penyalaʹ, atek keʹ kenai palaʹ ikem ngan alaʹ teken peritaʹ kem ne, cen ukoʹ o ne.

⁶Un ca puyan iaʹ tiga neng ikem, moʹ kem miʹi neng puyan kelunan diaʹ bayaʹ Nikulaus, kuaʹ baʹan akeʹ miʹi neng puyan nte.

⁷“Moʹ ina, buk kem un telinga, ngeringa ne dau isiu Berua Tuhan neng Mpun diaʹ ngelan Tuhan. “Me kelunan diaʹ nyupeʹ puyan iaʹ jaʹat, mida heʹ ke naʹ penyukat apan nte senteng uman buʹan cen inan udip iaʹ dalem Pula Allah.”

⁸Un dau Yesus pelaʹa: “Nyurat ne me iaʹ tuʹa Mpun iaʹ kaʹ lepoʹ Semirna: “Ini ne dau tiraʹ cen Laki iaʹ ading, ngan iaʹ ngebayaʹ, iaʹ lepa matai ngan nai numpak mudip laʹa.

⁹Akeʹ tisen neng penaru hem. Tisen pe akeʹ pengekasip kem. Iaʹ lan ne ikem iaʹ kayaʹ. Akeʹ tisen dau isiu kelunan diaʹ pejaʹat ikem. Naʹ pe ida kuma ida lepoʹ Yahudi, abeʹ lan pekina. Di lareʹ ida iaʹ ca mpun diaʹ anun Sitan.

¹⁰Ayen ncem takut neng penaru iaʹ kenai nantaʹ ikem uʹo. Nawai dau heʹ, ban Bali Jaʹat ina ke ten ikem, ngan ia ke naʹ palai mikem kedalem sepin. Puloʹ tau pengemajan ncem ke sihoʹ taru uʹo. Semamet ne bayaʹ akeʹ. Naʹ pia seʹ ketai pesen neng patai, atek keʹ ke naʹ ca tapung keriman mikem uʹo.

¹¹“Moʹ ina, buk kem un telinga, ngeringa ne dau isiu Berua Tuhan neng Mpun diaʹ ngelan Tuhan. “Kelunan diaʹ un usun neng puyan iaʹ jaʹat, abeʹ de ke sihoʹ sakit kuʹun puyan patai iaʹ kedua uʹo.”

¹²Un dau Yesus pelaʹa: “Nyurat ne me iaʹ tuʹa Mpun iaʹ kaʹ lepoʹ Pegamus: “Ini ne dau tiraʹ cen Laki iaʹ un bahing nyahit seripa ina.

¹³Akeʹ tisen seʹ kem semamet bayaʹ akeʹ. Abeʹ kem lepo pengelan ncem neng akeʹ. Akeʹ tisen ukoʹ kem mudip, ina iaʹ kukoʹ padung pengaren Sitan. Salet lepe ikem dalau dulu lematai Antipas are. Ia iaʹ semamet badaʹ tugen neng puyan nceʹ kaʹ lepoʹ kem, iaʹ kukoʹ Sitan ngelineʹ ina.

¹⁴Ia iaʹ, un pe dau tiraʹ keʹ ke pesalaʹ ikem kediʹut, uban un palai mikem kina diaʹ bayaʹ dau katuk Bilam. Moʹ Bilam iaʹ lepa pekatuk Balak kumpin ne ke pelaboʹ lepoʹ Israil neng penyalaʹ cen naʹaʹ, man puyan uman penguman iaʹ dulu mencai me bali uyat, ngan puyan pemung nyelem.

¹⁵Pekina pe un lete dulu neng ahang ikem diaʹ bayaʹ katuk Nikulaus.

¹⁶Ina ukoʹ nesen ne, ngan nyepuleʹ kimet cem cen penyalaʹ. Buk kem abeʹ un ke nesen cen penyalaʹ kem, laho le kenai heʹ palaʹ ikem, nai nyakit kelunan dina man bahing iaʹ nai cen paʹ keʹ ne.

¹⁷“Moʹ ina, buk kem un telinga, ngeringa ne dau isiu Berua Tuhan neng Mpun diaʹ ngelan Tuhan. “Me kelunan diaʹ nyupeʹ puyan iaʹ jaʹat, mida heʹ ke naʹ penguman nyio, iaʹ dulu abeʹ un tisen. Ngan laʹa singket ida pe akeʹ ke naʹ ca batu puteʹ. Neng batu ina un ca ngadan mading iaʹ dulu abeʹ un tisen, bang kelunan diaʹ alaʹ a iaʹ tisen kidi.”

¹⁸Un dau Yesus pelaʹa: “Nyurat ne me iaʹ tuʹa Mpun iaʹ kaʹ lepoʹ Tatira: “Ini ne dau tiraʹ iaʹ nai cen Anak Allah iaʹ un mata koʹ baʹan seʹ serema luten idai, iaʹ un taket mening koʹ baʹan seʹ jangin iaʹ dulu lepa ngepilau are.

¹⁹Akeʹ tisen pemuyan ncem, ngan akeʹ tisen pengemalaʹ kem, pekina pe semamet seʹ puyan ncem, pekina pe puyan ncem petubo kelunan, ngan puyan dadoʹ kimet cem. Tisen pe akeʹ puyan ncem ini caʹ tai tiga kuʹo ke cen iaʹ ikem ti ading are.

²⁰Un sepuʹo ini tiraʹ keʹ iaʹ ke pesalaʹ ikem, moʹ kem pedayo leto iaʹ ngadan Isibil, iaʹ kuma ia tengen ca pegawa Tuhan Allah. Ia pekatuk ngan pelingu diaʹ pegayeng makeʹ ke tai bayaʹ puyan pemung nyelem, ngan uman penguman iaʹ dulu mencai me bali uyat.

²¹Lepa ne akeʹ naʹ ca awang mia apan ne senteng ke nesen ngan nyepuleʹ kimet te cen penyalaʹ a. Ia iaʹ, abeʹ e ubaʹ ke kelap cen puyan pemung nyelem me ne.

²²Ina ukoʹ atek keʹ ke lemintet ia neng ca pagen iaʹ kukoʹ o ke tuyen sakit, peging ngan diaʹ lepa pemung nyelem ngan ne are. Laho ne akeʹ ke ti ini, buk kelunan dina are nesen ngan nyepuleʹ kimet de cen puyan penyalaʹ de ngan leto iaʹ jaʹat ina.

²³Akeʹ ke lematai mung kelunan diaʹ bayaʹ ia, apan mung Mpun diaʹ ngelan Tuhan ke tisen ban akeʹ iaʹ lesan taʹat ke tisen kimet ngan pengubaʹ kelunan. Ngan akeʹ ke nyuaʹ neng singket singket usa hem bayaʹ ban pemuyan iaʹ ikem lepa ti.

²⁴“Ikem diaʹ ca kaʹ lepoʹ Tatira, abeʹ kem bayaʹ katuk jaʹat ina. Ngan abeʹ pe ikem pekalai puyan katuk iaʹ ida kuma ‘Katuk dalem neng puyan Sitan.’ Dau heʹ mikem, abeʹ keʹ ke naʹ pit mpin ncem ne.

²⁵Un sepuʹo ngkang salet le katuk iaʹ un neng ikem ne, pa kenai heʹ ʹo.

²⁶Me kelunan diaʹ nyupeʹ puyan iaʹ jaʹat, ngan diaʹ tudep ti pengubaʹ keʹ pa ketai kuʹo udip, atek keʹ kenaʹ penyukat mida koʹ baʹan iaʹ Amai heʹ lepa naʹ makeʹ.

²⁷Ngan akeʹ ke naʹ penyukat mida apan nte senteng ngkang pengaren neng mung lepoʹ, koʹ baʹan kelunan lemasi ca kuden tanaʹ man ca batang malat.

²⁸Ngan akeʹ ke naʹ dema mida koʹ baʹan betuʹen maya are.

²⁹“Moʹ ina, buk kem un telinga, ngeringa ne dau isiu Berua Tuhan neng Mpun diaʹ ngelan Tuhan.”