Read Wahau Kenyah PUYAN LUHA’ 3 Bible Online

PUYAN LUHA’ 3 - Wahau Kenyah bible

PUYAN LUHA’ 3

¹Un dau Yesus pelaʹa: “Nyurat ne me iaʹ tuʹa Mpun iaʹ kaʹ lepoʹ Sardis: “Ini dau tiraʹ cen Laki iaʹ mampin berua Allah iaʹ tujoʹ naʹan ina, ngan tujoʹ betuʹen ina. Akeʹ tisen mung pemuyan ncem. Tisen pe akeʹ dulu badaʹ ikem ca Mpun iaʹ mudip, kenuen pe ikem lepa matai.

²Ina ukoʹ beteʹ ne, ngan ngepali inu iaʹ petem un neng ikem kena ha ke matai lan. Moʹ abeʹ keʹ tisen puyan ncem iaʹ tai dengkep kata taʹat Allah heʹ lepe.

³Ina ukoʹ kem petawai ne katuk, ngan kumpin puyan ncem kenahan ne ading nte are. Ngimet ne bayaʹ dau ue, ngan nesen ne, ngan nyepuleʹ kimet cem cen penyalaʹ. Buk kem abeʹ un ke beteʹ uʹo, kenai heʹ ukoʹ baʹan ca kelunan bekelau are. Nyahut cem abeʹ un tisen ne tegoʹ jakaʹ keʹ nai ʹo.

⁴Un lepe palai mikem diaʹ kaʹ lepoʹ Sardis ina iaʹ abeʹ un ngejameng gelam ngkem. Ikem iaʹ ke pemung masat ngan nceʹ ʹo, ngan puteʹ gelam ngkem, uban penekep kem ti pekina lete.

⁵Me kelunan diaʹ nyupeʹ puyan jaʹat, ida iaʹ ke un gelam puteʹ pekina. Nyahut ceʹ abeʹ un ke mesau ngadan nte cen surat ngadan diaʹ un udip ne. Akeʹ ke ngahaʹ ida diaʹ anun nceʹ kata Amai heʹ, ngan pekina pe kata mung diaʹ melikat te.

⁶“Ina ukoʹ buk kem un telinga, ngeringa ne dau isiu Berua Tuhan neng Mpun diaʹ ngelan Tuhan.”

⁷Un dau Yesus pelaʹa: “Nyurat ne me iaʹ tuʹa Mpun iaʹ kaʹ lepoʹ Piladipia: “Ini dau tiraʹ cen Laki iaʹ buheʹ ngan telit, iaʹ mampin kusi anun Daut cen naʹaʹ. Inu ia ke mesik, abeʹ un aheʹ iaʹ senteng mekep pe. Inu ia ke mekep, abeʹ un aheʹ iaʹ senteng ke mesik ke.

⁸Akeʹ tisen inu ikem ti, akeʹ tisen pe kediʹut le penyukat cem. Ikem lepa bayaʹ dau katuk keʹ, ngan abeʹ kem lepo pengelan ncem neng akeʹ. Ina ukoʹ keʹ mesik ca pamen tahaʹ tena ikem, iaʹ abeʹ un aheʹ senteng ke mekep pe laʹa.

⁹Ngeringa tiga le dau heʹ. Koʹ baʹan mpun kelunan diaʹ anun Sitan dina, diaʹ lemalo badaʹ ida lepoʹ Yahudi, di ie abeʹ pe ida lepoʹ Yahudi lan. Akeʹ ke cuk ida nai tahaʹ tena, ngan muʹup nusau taket cem, apan mung nte tisen akeʹ iaʹ malaʹ neng ikem.

¹⁰Lepa ne ikem nawai dau heʹ cuk ikem dadoʹ kimet are, ina ukoʹ keʹ ke petubo ikem lete tegoʹ penaru bioʹ iaʹ ke nai abeʹ libut usun tanaʹ ini ʹo, ke ten mung kelunan diaʹ kusun tanaʹ ini.

¹¹Laho te akeʹ nai ʹo. Petubo ne penyukat iaʹ un neng ikem apan abeʹ un aheʹ iaʹ senteng ke magang bang ngkem iaʹ keriman.

¹²Aheʹ iaʹ un usun neng puyan iaʹ jaʹat, ia akeʹ ke uyan ca sukaʹ umaʹ Palan Allah heʹ, ngan nyahut te abeʹ un ketai puke cen ina ne laʹa. Akeʹ ke nyurat ngadan Allah heʹ neng ia, ngan ngadan lepoʹ Allah heʹ, iaʹ ina lepoʹ Yerusalim iaʹ mading, iaʹ ke nai kentaʹ cen surga, cen Allah heʹ ʹo. Ngan akeʹ ke nyurat ngadan nceʹ iaʹ mading neng ia lete.

¹³“Moʹ buk kem un telinga, ngeringa ne dau isiu Berua Tuhan neng Mpun diaʹ ngelan Tuhan.”

¹⁴Un dau Yesus pelaʹa: “Nyurat ne me iaʹ tuʹa Mpun iaʹ kaʹ lepoʹ Ludikia: “Ini ne dau tiraʹ cen Laki iaʹ ngadan Amin, iaʹ semamet badaʹ tugen neng puyan nceʹ ngan telit kimet. Ia iaʹ puʹun neng mung inu iaʹ Allah lepa uyan.

¹⁵Akeʹ tisen inu iaʹ ikem lepa ti. Akeʹ tisen pe ikem abeʹ un sengim, ngan abeʹ pe ikem pana. Awaʹ pe ikem sengim lan, buk are pana lan pe.

¹⁶Uban ncem kahang kawaʹ, akeʹ ke muhaʹ kem cen paʹ keʹ.

¹⁷Moʹ un dau hem: ‘Kayaʹ ne ameʹ, moʹ kadoʹ ne inu meʹ. Abeʹ un inu iaʹ tepa neng ameʹ laʹa.’ Un sepuʹo petem abeʹ kem tisen ikem kelunan pincaʹ, ngan kelesau, ngan kasip, ngan ugai, ngan butaʹ.

¹⁸Moʹ ina akeʹ ke pekatuk ikem lemeli mat neng akeʹ, mat iaʹ lepa dulu masi man luten, ina le ikem ke kayaʹ lan uʹo. Lemeli pelaʹa keluma puteʹ man ncem pegelam usa hem, ngan mekep penyaʹe hem kuʹun ugai hem ne. Ngan lemeli tabat man nabat mata hem, apan ncem senteng naʹat ʹo.

¹⁹Akeʹ ke pekatuk ngan mukum mung diaʹ akeʹ malaʹ. Tuman ina, alaʹ ne tekaʹ sebelang tawai hem, nesen ngan nyepuleʹ kimet cem cen penyalaʹ kem.

²⁰Ngeringa! Akeʹ nekejeng kaʹ lung pamen ngan megoʹ o. Buk aheʹ kelunan iaʹ kenahan dau heʹ, ngan mesik pamen makeʹ, atek ketai heʹ kedalem amin ne pemung uman ngan ne. Ngan ia pe pemung uman ngan nceʹ ʹo.

²¹Me kelunan diaʹ un usun neng puyan iaʹ jaʹat, akeʹ ke alaʹ de pata madung ngan nceʹ kusun padung pengaren nceʹ, koʹ baʹan nceʹ lepa un usun neng puyan iaʹ jaʹat are, ngan naʹkini akeʹ madung pata ngan Amai heʹ neng usun padung pengaren ne.

²²“Moʹ ina, buk kem un telinga, ngeringa ne dau isiu Berua Tuhan neng Mpun diaʹ ngelan Tuhan.”