Read Wahau Kenyah PUYAN LUHA’ 4 Bible Online

PUYAN LUHA’ 4 - Wahau Kenyah bible

PUYAN LUHA’ 4

¹Uʹo ina akeʹ Yaya taʹan neng penaʹat ceʹ, ca pamen pesik kaʹ surga. Un dau tuyau tekepip bioʹ le, kuaʹ baʹan dau iaʹ akeʹ lepa kenahan ading nte. Un dau ue: “Nai ne kempau. Akeʹ ke peluhaʹ mikoʹ puyan iaʹ ketai nuyan uʹo ini.”

²Belekaʹ tekaʹ Berua Tuhan nesun neng akeʹ. Neng penaʹat ceʹ kaʹ surga akeʹ taʹan ca padung pengaren. Un ca iaʹ madung kidi.

³Silung nge nyerema ukoʹ baʹan seʹ batu yasip iaʹ pekekuning, ngan batu akik sebala. Un ca akung lunliwa neliling padung pengaren ina, koʹ baʹan seʹ bileng.

⁴Teliling padung pengaren ina un dua puloʹ pat padung pengaren laʹa. Neng singket padung dina un dua puloʹ pat diaʹ lataʹ madung kidi. Un sapai re puteʹ, ngan tapung nte mat.

⁵Cen padung pengaren iaʹ bioʹ ina kenai bekilet, ngan dau tuyau langit, ngan dau gerem. Un pe koʹ baʹan tujoʹ de peritaʹ diaʹ ngedema dudo padung pengaren ina; ina ne seleket tujoʹ naʹan berua Allah.

⁶Tahaʹ juma padung pengaren ina un seʹ koʹ baʹan belahu lingai iaʹ mening, koʹ baʹan batu pilau. Ngan teliling padung pengaren ina un pat naʹan diaʹ mudip, diaʹ un mata pa tipo tahaʹ tena ngan tahaʹ bayaʹ.

⁷Un diaʹ ading mida diaʹ mudip dina koʹ baʹan seʹ ca lencau re. Iaʹ kedua ha koʹ baʹan seʹ anak sapi re. Iaʹ ketelu ue koʹ baʹan seʹ silung kelunan nte. Ngan iaʹ kepat te koʹ baʹan seʹ ca sui atung iaʹ ketai madang re.

⁸Singket ida pat diaʹ mudip dina un kapit tahaʹ nem nte, ngan un kadoʹ mata re tipo tahaʹ awang ngan tahaʹ dalem. Pat usa dina abeʹ de tai pekenaʹ belian utung tau utung alem ne. Un dau re: “Buheʹ, buheʹ, buheʹ ne Allah, Tuhan iaʹ Bioʹ Penyukat, iaʹ lepa ban un, ngan iaʹ un naʹkini, ngan iaʹ kenai ʹo.”

⁹Kun diaʹ pat usa diaʹ mudip dina ti belian iaʹ selawan dau, iaʹ nyelama, ngan nyuaʹ tiga saheʹ de palaʹ ia iaʹ madung neng usun padung pengaren ina, iaʹ mudip lemuto-uto ina.

¹⁰Tegoʹ de ti pekina, kun diaʹ dua puloʹ pat usa diaʹ lataʹ dina muʹup nyeripa ia iaʹ madung neng usun padung pengaren ina, moʹ de sebayang palaʹ ia iaʹ mudip lemuto-uto ina. Mentung nte mahung tapung paren nte dudo padung pengaren ina. Kun dau re:

¹¹“Ahaʹ Allah, Tuhan meʹ, bang ikoʹ iaʹ tekep alaʹ serema peniga, ngan selama, ngan penyukat, moʹ bang ikoʹ le iaʹ ban uyan mung inu ne. Moʹ kuʹun pengubaʹ kimet coʹ mung inu lepa nuyan ngan mudip.”