Read Wahau Kenyah PUYAN LUHA’ 5 Bible Online

PUYAN LUHA’ 5 - Wahau Kenyah bible

PUYAN LUHA’ 5

¹Uʹo ina akeʹ taʹan ca lelen surat neng ujoʹ taʹu ia iaʹ madung neng usun padung pengaren ina. Surat ina un senurat tahaʹ dalem ngan tahaʹ likut, ngan un tujoʹ de penyalet iaʹ ngedintet kidi.

²Akeʹ taʹan pe ca usa melikat iaʹ muhat diseʹ, iaʹ ngelengap dau badaʹ, kuma: “Aheʹ iaʹ tekep ke lemasi penyalet surat ini, ngan mesik lelen ne tupe?”

³Abeʹ un aheʹ kelunan iaʹ un penyukat senteng ke mesik elen surat ina ngan naʹat dalem me, naʹ pia dulu kaʹ surga, naʹ pia dulu kusun tanaʹ, naʹ pia kentaʹ tanaʹ abeʹ un aheʹ.

⁴Moʹ ina, nange tuaʹ ne akeʹ, moʹ abeʹ un ca kelunan iaʹ tekep mesik lelen surat ina ngan naʹat dalem me.

⁵Tegoʹ ina, kenai ca usa diaʹ lataʹ dina pisiu ngan nceʹ. Kun dau ue: “Ayen ncoʹ nange. Naʹat coʹ. Lencau iaʹ nai cen puhoʹ Yahudi, Laki iaʹ bioʹ mela Daut ina, ia lepa un usun neng puyan iaʹ jaʹat, ina ukoʹ o un penyukat senteng lemasi tujoʹ penyalet ina, ngan mesik lelen surat ina.”

⁶Uʹo ina kun nceʹ taʹan ca usa Anak Dumba iaʹ nekejeng neng beluaʹ padung pengaren ina. Un diaʹ pat naʹan diaʹ mudip dina, ngan diaʹ lataʹ dina teliling ia. Un Anak Dumba ina koʹ baʹan diseʹ iaʹ dulu lepa nebek. Tujoʹ de uhung nge, ngan mata ha pe tujoʹ de. Un mata ina kuaʹ ngan tujoʹ berua iaʹ Allah cuk pa libut usun tanaʹ.

⁷Nai kun Anak Dumba ina alaʹ lelen surat ina neng ujoʹ taʹu ia iaʹ madung neng usun padung pengaren ina.

⁸Tegoʹ seʹ e alaʹ lelen surat ina, un diaʹ pat naʹan diaʹ mudip dina, kun nte muʹup pemung ngan diaʹ dua puloʹ pat usa diaʹ lataʹ dina, muʹup kata Anak Dumba ina. Singket usa de ngkang sampeʹ, ngan kiut mat diaʹ sangan kuʹun lisan kemanyan iaʹ tutung ngan baʹoʹ, iaʹ ina temameʹ mung kelunan diaʹ anun Allah.

⁹Penco re ti ca belian iaʹ mading. Pekini dau ue: “Ikoʹ iaʹ tekep alaʹ lelen surat ina, ngan ke lemasi penyalet te. Moʹ ikoʹ iaʹ lepa sihoʹ tebek ngan matai. Ngan kuʹun dahaʹ koʹ, ikoʹ lepa nyuaʹ kelunan me Allah, cen singket naʹan puhoʹ kelunan, cen singket naʹan isiu, ngan singket naʹan gaham perinta, ngan singket naʹan lepoʹ ne.

¹⁰Ikoʹ iaʹ lepa uyan ida ca lepoʹ paren, ngan uyan ida detaʹu diaʹ ke pegayeng me Allah le. Ngan ida iaʹ ke ngaren usun tanaʹ ini.”

¹¹Kun nceʹ naʹat pelaʹa, ngan akeʹ kenahan dau melikat, kudaʹ puloʹ ibu kadoʹ de. Kun nte nekejeng teliling padung pengaren ina, ngan diaʹ pat naʹan diaʹ mudip, ngan diaʹ lataʹ dina.

¹²Kun nte belian bioʹ dau re, kun nte: “Anak Dumba iaʹ lepa sihoʹ tebek ngan matai, ia iaʹ tekep ke alaʹ penyukat, ngan kayaʹ, ngan tudi neng penisen, ngan pengali, ngan selama, ngan serema peniga, ngan pada.”

¹³Uʹo ina akeʹ kenahan dau mung inu iaʹ kaʹ surga, pekina pe kusun tanaʹ, ngan kentaʹ tanaʹ, ngan diaʹ kaʹ banget. Ida dina ne iaʹ belian kuma ha: “Me ia iaʹ madung neng usun padung pengaren ina pemung ngan Anak Dumba, ke un pada, ngan selama, ngan serema peniga, ngan penyukat pabeʹ majan ʹo.”

¹⁴Kun diaʹ pat usa diaʹ mudip dina mipa: “Amin.” Ngan mung nte dia lataʹ dina penco re pengkup ngan nyelama ia.