Read Wancho Naga Pongwang Laipex 14 Bible Online

Pongwang Laipex 14 - Wancho Naga bible

Pongwang Laipex 14

¹Babilon angkya Amrafel, Ellasar angkya Ariok, Elam angkya Kedorlaomar, ilaxle Goim angkya Tidal, hwom bibi wanghom ali,

²mama wanghom hwom aga ibibi zan to ka: Sodom angkya Bera, Gomorah angkya Birsha, Admah angkya Shinab, Zeboiim angkya Shemebar üntoxle Bela chichangba Zoar nok wanghom.

³Wanghom aga hwom bibi Siddim haxsha, oja athax Omang Tinu ang achangle tüipuix, ikhama zankat thom tuita ang achang.

⁴Hwom a zanglao 12 hanpakma Kedorlaomar-e apünkya fang ma ngole hüikya, ikoxle zangbün azom nguile hüikya füi tomle hwome chix füi alünle ajong.

⁵Zanglao 14 lükya to Kedorlaomar hia chix zankat üithobu süpahibu füi nguilaxle Ashteroth Kamaim ma Refaim to anao, Ham ma Zuzim to anao, Kiriathaim haxsha ma Emim to anao,

⁶ilaxle Edom haxnu ma Hor nok to anaolaxle sak-hax chamtua Elparan alople achuale apao.

⁷Ifüima hwom anongle Kadesh (ipongma Enmishpat le nyakkya) to chat. Hwome Amalek nok haxtok pangwüi lax ilaxle Hazazon Tamar ma ngokya Amor nok to anao.

⁸Ifüima Sodom, Gomorah, Admah, Zeboiim hia Bela nok wanghombue hwom süpahibu koplaxle kale Siddim haxsha ma

⁹Elam, Goim, Babilon hia Ellasar, khua aga wanghombu khua ali wanghombu füi azan.

¹⁰Ija haxsha a kom-nüiti füikya tswombue awangle tüikya. Chemtue Sodom hia Gomorah nok wanghom nyi zantam angkya paole azang ang azongpuix, hokhi a ija tswomkha to düt; ikoxle mama wanghom hwom azom a haxnu chito paole azang.

¹¹Hwom wanghom alie Sodom hia Gomorah angkya, osüt-oling to lünle komle tsuile pao.

¹²Abram zongma sasün Lot Sodom nok ma ating-anokle tüikya; ibue chix füi tomle chix tuina to lünle komkaile tsuile pao.

¹³Ikoxle ikha tokya paole azangkya khünak tuitae ija kaxho Abram hato apüi. Abram a Ibri khünak tuita changkya. Chix a Amor nok kux Mamre zui angkya otsao pünnu tong zui ma ngole tüikya. Mamre hia chix tüita-naopa Eshkol hia Anar hwom pangwüi zankat ma chix üitho changkya.

¹⁴Chemtue Abram-e chix zongto sasün tsyen Lot kople paodaoale atat ang kop-puix, chix pom ma tüikya zankatmix komle sele asox; pangwüi athüt koxle 318 khünak süi. Hwome Dan lomnu fole wanghom ali achuale zik.

¹⁵Ikhato chixe ma khünakbu othom-othom ang ahan. Hwome zan to zangnak ma sing ilaxle hwom to anao. Chixe hwom Damaska zongma shuakux chikao Hobah alople achua.

¹⁶Hwome kople paokya pangnusa chatle lax. Chixe Lot hia chix tuinabu tamchu shekobu hia kople paokya mama khünakbu pangwüi chatle chat.

¹⁷Chemtue Abram-e wanghom Kedorlaomar hia mama wanghombu to anaolaxle chatpuix, Sodom nok wanghom chix füi apong ang Shaweh haxsha (wanghom haxsha lechuwüi nyakle) to laile apong.

¹⁸Melkizedek owa Salem nok wanghompa tamchu Taitax Zang Nguapa changkya hex, chixe Abram hato an hia grepti-ju apüile kox.

¹⁹Chixe Abram to mohimanle thüi: “Taitax Zang owae ding-hi-hax zinglaxpuix, Chixe Abram to mohiman hüi!

²⁰JOWANPA Taitax Zang, owae nang ang zanbu to lüt ang tompuix, chix mün achuakpu!” Ilaxle Abram-e, chixe zanchak tokya kopkya tuina bün ma ahanlaxle othom tuita Melkizedek ang kox.

²¹Sodom nok wanghompa-e Abram ang thüi: “Tuina nange wüi koplax ikoxle ku khünakbu mix achatle fahüi.”

²²Abram-e lan: “Ding hia hax zingkya Taitax JOWANPA tunthoma kue tsaopu,

²³kue nang kux chemchu müntüi. Ile changkox tix wüi nange, ‘Abram nang kue ahak-alua ang tomwüi’ le thüi angkya müntüiüi.

²⁴Ku khünakbue lax-twondaokya wüi chichangba kue ku hanpakma hexle chemchu münlax. Ikoxle ku füikya zankat othom Anar, Eshkol hia Mamre hwome wüi matsyen-tsyen naxlaxkox.”