Read Wancho Naga Pongwang Laipex 19 Bible Online

Pongwang Laipex 19 - Wancho Naga bible

Pongwang Laipex 19

¹Sodom nok to kaxtaimix mixsün anyi nguikya hansong ma, Lot a tingnu pan ma thungle tüikya. Chixe hokhi ngünkya shemle, chix ajong ilaxle hokhi füi apong ang lai. Chix hokhi chitong ma akhuxle shwom.

²Chixe thüi: “Alixachong nyi, ku a ikhama hünzom thotha ang ngopu. Kwom hom to nguihax. Hünkhie cha-chakbu tsuxlaxle hom ma nazak wünpom le chang ang tsuaküi. Ngainop swomsae zolaxle hünkhi pao angkya khato achexle pao ang tsuak.” Ikoxle hokhie lan: “Tax, kukhie zangnak ija tingnu panja to akai lax-angpuix.”

³Chixe atsangle ngokya oshukma hokhi chix hom to wünpom ang ngui. Wünpa nyi hanpakma müile fongmok-tiktale chang angkya Lot-e chix dabu füi akax. Amyet-akhomle changkya zuma hwome ija sax-lingle chang.

⁴Wünpa nyi lyakho to madongkya bama, Sodom nok angkya khünaknue ija hom akhople kop. Tingnu angkya khünaknu, azupa makhange naosa to lünle ikhama tüikya.

⁵Hwome Lot sele alailaxle ataüi: “Aja nang hom ma wünpom ang nguikya mixsün anyi ojong? Okhi ikhato kwom hato alaihüi!” Sodom nok angkya khünakbue hokhi füi sheko-lüka mwot moksele sung.

⁶Lot a homtho to lai ilaxle tokfüi ma kahak.

⁷Chixe hwom ang thüi: “Kue hünzom ma chingcha jupu, iningkya chichang-chizang mwot ija nyi füi sütaxmokünfa!

⁸Hulax, ku ang naochasa anyi tüile. Kue hokhi hünzom hato alaifang. Hünzome chemle mokse tsupuix ija hünzome hokhi füi moklax. Ikoxlechu ija wünpa nyi to chemle chu taxchangünfa. Okhi a ku hom to nguikya wünpa nyi changle. Okhi khose angkya a ku mwot changpu.”

⁹Ikoxle hwome thüi: “Nang püntüi, ikhama taxngo! Kwom hama ija taxmok, ija moklax le akax angkya nang owa? Lomshan lax, chichangthüiba ibu to hwonse süthak le kwome nang to hwon angkya awancha?” Hwome Lot thwomle apao ilaxle kahak daple ama ang hüi.

¹⁰Ikoxle hommong angkya mixsün nyie chak thui laxle Lot bele hommong to anop ilaxle ka hak.

¹¹Ifüima hokhie homthoma tüikya khünak noknusa ang mik apwom ang tom, ikhoma hwome kahak lomle chiataktsuak.

¹²Ija mixsün anyie Lot ang thüi: “Nang ang owawa: su-sa hwom, nomcha hwom, chichangba owawa ma-mix ija tingsho ma ngokya mix jangtüiba: hwom ija tingsho angkya paokox,

¹³chemthüikoxle kwome ijakha amüt angkya changle. Ikha angkya khünakbu bama kaxhux-fekya JOWANPAe huanuma atatle hüidaoa ilaxle kwom a ija Sodom tingnu amüt angkya hanpakma tsanle ahüikya changpu.”

¹⁴Ikoxle Lot a chix sacha hwom lax angkya khünakbu füi apong ang paole akax: “Momlax, ikha angkya laile paohax; ikha a JOWANPAe amüt angkya changle.” Ikoxle hwome chix kax a abaokya ang laxle apa.

¹⁵Swomsa ma kaxtaimix nyie Lot nonole apao ang azongle ngo. Okhie thüi: “Momlax! Ija tingnu maxpongma hünzom chiwom angkya hanpakma nang kakonu hia sacha nyi koplaxle momle achexün.”

¹⁶Lot a paose chitsu. Tütale wüi changkoxchu JOWANPAe chix to chingcha; ikhoma ija mixsün nyie chak ma syetle, Lot, chix kakonu üntoxle sacha nyi, hwom bibi tingnu akaile apao.

¹⁷Ifüima kaxtaimix tuitae thüi: “Hünzom khang azang ang zikle paolax! Aküile taxhu chichangba haxsha to zak-zui le taxchang. Hünzom chilang angkya hanpakma haxhua chito zikle paolax.”

¹⁸Ikoxle Lot-e lan: “Münchang, alixachong-hom, kwom ile chang ang taxtom.

¹⁹Hünkhie kwom azün laxle ku to ching-chahudaoa. Ikoxlechu haxhuabu a ochu towüi; kue thama apongüi changa, ikha ma-alop ma wüi ku zile paoüi changa.

²⁰Hünkhie chuja tingsa ngüncha? Ija a nuisox changle. Ku ikhato pao ang koxhüi: ikha a onui hixkya changle: ku ikhato ozün ma ngo ang müiüi.”

²¹Chixe lan: “Müiüi, naxchanglax. Kue ija tingsa münamütpu.

²²Momlax! Ziklax! Nange ikha ma-alopba kue chemchu mok ang müntsuak.” Lot-e ija tingsa changle le thüikya khoma, ija noksa ang Zoar le nyak.

²³Lot-e Zoar alop pongma zanghan a dongle changüna.

²⁴JOWANPAe allele Sodom hia Gomorah ding ma chuale ngokya khat zangwat ningle düt ang tom.

²⁵Tingnu pangnyi tamchu haxsha komkaile amüt, ibu füi tomle ikhama tüikya khünak-mixsa hia haxtok ma alailai komle amüt.

²⁶Ikoxle Lot kakonue aküile hu ikhoma she a hum longlo ang achangle pao.

²⁷Ofüinop swomsae Abraham, JOWANPA hokhi ajongle ngokya haxkho alop ang zikle pao.

²⁸Chixe Sodom hia Gomorah üntoxle haxsha pangwüi to asongle hukoxle chaxwan angkya wünkhut laile, tsanzok wünchao lailaile ding to dongkya ngün.

²⁹Ikoxlechu haxsha ma tüikya, Lot ngokya tingnubu amüt pongma, chixe Abraham texle atak ilaxle Lot a zingmüi ma paole azang ang tom.

³⁰Lot a Zoar ma ngo ang chazakya khoma, chix a sacha anyi koplaxle haxhua chito dongle longlua tuita ma ngo.

³¹Hona mixe honao ang thüi: “Künyi hopa a azupu, ilaxle künyi tuiju-nasomle supux-sapaile chang angkya chaxwannu ma lüka owangaxchu chitüi.

³²Oman, künyie pi apa to ju ang atok-hax, ikoxtix künyi chix füi jip-pom manüi ifüimatix chix makhange supux-sapaile chang ang tsuaküi.”

³³Ija ja hokhie chix ang ju aling, ilaxle nüchongnu chix füi jip-pomle chang. Chix to jue müimamale tokkya khoma chixe ibu chemchu chiawan.

³⁴Ofüinyix honae honao füi akaxle thüi: “Ku müja chix füi jip-pomle changpu; aja chuwüi chix jutok ang tomhax, ilaxle chix füi nang jiplax. Ifüima künyi pangnyi ang wüi apa makhange süshix naosom nguidongle changüi.”

³⁵Ikhoma ija chuwüi hokhie chix to ju ang atok, ilaxle honao chix füi jip-pomle chang. Chix müimamale jutok le changkya khoma ija chuwüi chixe ojao chiawan.

³⁶Ile Lot sacha pangnyi wüi hopa makhange nao nguidongle chang.

³⁷Nüchongnue sasün tuita ngün. She-e chix ang Moab le mün kox. Chix a anyixkya Moab nok putong changkya.

³⁸Honao ang chuwüi sasün tuita ngün. She-e chix ang Benami le amün. Chix a anyixkya Amon nok putong changkya.