Read Wancho Naga Pongwang Laipex 2 Bible Online

Pongwang Laipex 2 - Wancho Naga bible

Pongwang Laipex 2

¹Ile haxtsa-zangfang zingkya mwot tsuakle hüi.

²Nyix anüt lükya to chix mwot tsuaklaxle Zang ang chakngai.

³Nyix anüt lükya hanpak to chixe mohiman ilaxle ataxkya nyix tuita ang atsaole dan, chemthüikoxle ija nyixkha chixe chix mwot-lün ilaxle nazak.

⁴Haxtsa-zangfang a ibibile iningle zingle alai. Chemtue JOWANPAe ding-hi-hax zingle changpuix,

⁵chaxwan tokma pün-zua chemchu chitüikya tamchu fum-sui chemchu chitüile ngokya, chemthüikoxle ipong kople chixe zangwat ma-ajo ilaxle haxtok apu-achang angkya mix owachu matüi.

⁶Ikoxlechu haxmong tokya ti fuakle lailaxle chaxwannu thün azom.

⁷Ifüima JOWANPAe hax ilaxle ija makhange khünak tuita zingle alai; chixe ija to nakua ma khüzün zakdün mütle kox sheme ija khünak ozün ang achang.

⁸Ifüima JOWANPAe Eden handün chikao ma tsawat tuita zing; ilaxle chixe zingkya khünak ikhama dan.

⁹Osün müikya tamchu oziak sax ang tüle müikya pünziak füikya pün oli pangwüi chixe ikhama nyem ang tom. Tsawat osungkha ma khüzün koxkya pün hia omüi-oma pangwüi awan angkya jepün nyemle tüikya.

¹⁰Eden mong ma jenle jukya shuasa tuitae tsawat khama ti kox. Eden akai füima ija shuasa shuajen ali ang achangle ahan.

¹¹Pongwang angkya shuajen a Pishon; ija a hun tüikya Hawilah akhople jen; (

¹²ija haxtok angkya hun a müikya; Adelam hia Onik longbu ikhato tüile.)

¹³Anyi-lükya shuajen a Gihon; ija a Kush haxtok akhople jenkya shuajen changle.

¹⁴Azom-lükya shuajen a Tigris changle; ija a Asiria haxtok zongma handün chikao ma jenle. Ilaxle ali lükya shuajen a Eufrat changle.

¹⁵JOWANPA Zang-e Eden tsawat mo-zangle hume thom angkya hanpakma khünak ikhama dan.

¹⁶Ifüima chixe khünak ang kaxtom koxle akax: “Nange tsawat mong angkya pünziak mongtex ma sax ang tsuak;

¹⁷ikoxle omüi hia oma tsing angkya jepün angkya pünziak chisaxüi; chemthüikoxle ija angkya pünziak saxkya nyix wüi nang thüile ziüi.”

¹⁸Ifüima JOWANPAe akax: “Khünak chix tata ile ngokya münmüi; kue chix juafong angkya hozui tuita zingle koxüi.”

¹⁹Ile hax makhange Zang-e faomüi tamchu zangwin angkya osa oli pangwüi zingle alai, ilaxle ibu ang mün chempangle koxüihex ang ibu pangwüi khünak hato apüi ilaxle Adam-e chemle nyakpuix ija a ibu münnyak ang achangle pao.

²⁰Faomüi-janyax hia o-jux pangwüi ang khünake omünbu kox; ikoxle khünak ang chix juafong ang asukya üitho chitüi.

²¹Idaile JOWANPAe khünak hato mikngüt ahüi, ikoxle chix jip; ifüima chix samlapza tuita alaile lax ilaxle ija manma hax füi tix.

²²Khünak angkya alaile laxkya samlapza makhange chixe sheko tuita zingle alai ilaxle she a khünak hato apüi.

²³Ijama khünake thüi: “Athaxpi ija a ku lailaikya: Ku angkya za tamchu ku angkya hak changpu; ija ang ‘sheko’ le nyaküi, chemthüikoxle ija a khünak angkya laxkya changle.”

²⁴Idaile khünake manu-mapa danle toxüi ilaxle hokhi a müitom tuita ang achangüi.

²⁵Ile khünak hia chix kako nyi ohua ma tüikya üntoxle hokhi chiazak.