Read Wancho Naga Pongwang Laipex 25 Bible Online

Pongwang Laipex 25 - Wancho Naga bible

Pongwang Laipex 25

¹Abraham-e chatle chuwüi Keturah le amünkya mixcha tuita tamlax.

²She makhange chix ang Zimran, Jokshan, Medan, Midi, Ishbak üntoxle Shuah hwom bibi pux.

³Jokshan a Sheba hia Dedan nyi hopa. Dedan sasün hwom a Ashurim, Letushim, üntoxle Leumim.

⁴Midi sasün hwom a Efah, Efar, Hanok, Abida üntoxle Eldah. Hwom bibi a Keturah su-sa-hwom changkya.

⁵Chix ma atüitüi komkaile Abraham-e Isak ang kox.

⁶Ikoxle chix danucha mamabu sasün hwom ang a hingho-chakzun ma kox; ile chix ozün ma tüitanto wüi mwottsuak laxle hwom bibi a sasün Isak füi atsaile handünchi nok to pao ang tom.

⁷Abraham a zangpua 175 tsünlo-khothole ngolaxle zi.

⁹Sasün Isak hia Ishmael nyie chix mang Makfela angkya longlua ma zu; ija a Hit nok Zohar sasün Efron haxtok changkya. Ija haxtok a Mamre zongma handün chikao ma tüikya.

¹⁰Ijakha a Abraham-e Hit nok ma shakle laxkya haxtok changkya. Abraham a ikhama chix kakonu Sarah füi tomle zu.

¹¹Abraham zi füima, Zang-e sasün Isak to mohiman. Isak a “Ku Ngünle laxkya Ozün ma Tüikya Zang Kux Tüküi” zui ma hom-hax zinglaxle ngo.

¹²Ibibi a Sarah dacha Ijip cha Hagar makhange ngünkya Abraham sasün Ishmael sixli hwom changle.

¹³Ibibi a Ishmael sasün hwom mün tüichong naoli achwotle zakya changle: Nebaioth, Kedar, Adbil, Mibsam,

¹⁴Mishma, Dumah, Massa,

¹⁵Hadad, Tema, Jetur, Nafish, ilaxle Kedemah.

¹⁶Ibibi chuwüi Ishmael sasün hwom üntoxle hwom münbu changle. Hwom tingkhua hia hwom thongnuibu mün tswonle hwome ibu mün-nyak; hwom jat-li mün a wanghom hwom 12 ang chuwüi amün.

¹⁷Ishmael a 137 zangpua tsünlole ngolaxle zi.

¹⁸Ishmael jat-li hwom a Hawilah makhange Shur alople tingkop-haxzing laxle mama Abraham su-sa hwom füi atsaile ngo. Ijongkha a Asiria chikao to Ijip nok füi asaole tüikya; ilaxle chix a ma-mixbu pomtho ma zi.

¹⁹Ibu a Abraham sasün Isak pukax changpu: Abraham a Isak hopa changkya.

²⁰Chixe Rebika laxpongma Isak a zanglao 40 nguidaokya. Rebika a Paddan-aram angkya Aramea mixsün Bethuel sacha tamchu Laban hona changkya.

²¹Isak-e chix kakonu ma süshix-naosom nguidongle chichangkya khoma JOWANPA to zangjop; ikoxle JOWANPAe chix zangjop to lanle Rebika ma naotüi ang tom.

²²She wok-kha towüi naosa anyi tüilaxle ashing-atop le changkya khoma she-e thüi: “Ija ningle ku matix chemkhoma changkya chang koxpu?” Ikhoma she a JOWANPA ma tsaipong-kaxpak tikle chang ang pao.

²³Ilaxle JOWANPAe she ang thüi: “Nang ma jat-li anyi tüile; nange zanpa anyi puxle alaiüi. Tuita a ata mix füi tsak-zongle tüiüi; Hotüie honao thothale changüi.”

²⁴Chemtue she hato nao ngün angkya hanpak ngangle hüipuix, she wok khama naosa anyi tüikya.

²⁵Pongwang angkya khikhile, tsangtsa ma mune awangle chwoplaxle lai; ikhoma hwome chix ang Esau le amün.

²⁶Ifüima honao lai. Chix a hotüi Esau cha ma koplaxle lai, ikhoma hwome chix ang Jakop le amün. Ipongma Isak a zanglao 60 nguidaokya.

²⁷Okhi tsongle hüikya zuma, Esau a müihap le faokhakha to ngose tsukya mix ang achang, ikoxle Jakop a nyihom ma dangjajale ngonuikya mix ang lai.

²⁸Esau-e langle apüikya müisüt ma azamlaxle Isak-e chix towüi akhüix, ikoxle Rebika-e Jakop towüi akhüix.

²⁹Hanpak tuita ma Jakop-e suisong le ngokya. Ipongma Esau, faokha tokya tüle na-jua le wangle hüi.

³⁰Esau-e Jakop ang thüi: “Ku ang ija khikhikya fialo sui shong-fahüi, ku tüle na-jua le maxle.” (Ikhoma chix ang Edom le nyak.)

³¹Jakop-e lan: “Owangpa ma nang nuput sünkho ku ang koxle shong-kop-hüi.”

³²Esau-e thüi: “Ku woknuake maxle ziüikhakha thüilax koxning, ija nuput sünkho chem changkya?”

³³Jakop-e lan: “Pongwang ma nange tsaosaxle kopdao.” Ikhoma chixe tsaosaxlaxle ma nuput sünkho Jakop ang koxle apao

³⁴Ifüima Jakop-e an hia suibu Esau ang kox. Chixe ija süt sax üntoxle jipkya zokya faokhato wüi pao. Ile Esau-e ma nuput sünkho Wün-ahai.