Read Wancho Naga Pongwang Laipex 27 Bible Online

Pongwang Laipex 27 - Wancho Naga bible

Pongwang Laipex 27

¹Athaxpi Isak a müimamale azule mike ngaxchu chingünle chang. Chixe sasün tüichongpa Esau nyakle thüi: “Ku sa!” Chix tsale lan: “Ui, ku ikhama tüile.”

²Isak-e thüi: “Hulax, ku azule maxdaoa, otue wüi zifatüi.

³Hapnu hia sanbu füi kalaxle nange pi kue sax ang faomüi langle wünlaxle shong-asütfa.

⁴Kue saxsele sungle ngokya ningle müi songlaxle ku hato apüihüihu.”

⁵Chemtue Isak-e Esau füi ija zang wünle ngokyahex, Rebika-e apale ngokya. Idaile Esau müilom ang fao to ka tama,

⁶she-e Jakop ang thüi: “Hünpae Esau ang,

⁷‘Müi langle apüilaxle müi songle fahüi; ija müisax füima, JOWANPA tunthoma oshuk lükya mohiman koxle toxfang’ le akaxkya kue atatdaoa.

⁸Idaile, ku sa, nange athax ku kax manman le moklax,

⁹Khaxa paolax ilaxle zwonsa nutkya anyi kople apüihüi, kue ija müi füi hünpae saxse sungkya ningle songle fafang.

¹⁰Nange ija chix hato apüile asütkox, jangchangba chix ziüima akiakya mohiman nang ang koxle toxüi.”

¹¹Ikoxlechu Jakop-e honu ang thüi: “Nange awan ngopu, Esau a mune awangle tüikya mix ikoxle ku ma mun a chitüi.

¹²Owatsing, ku to twonle anolaxle apae chix dyenkya awanle lax ang tsuak; ile changpuixle ning mohiman lüix to ku hato othuak-ozom mix apüile changüntoxcha?”

¹³Onue lan: “Nang to thuakzomkya namtüi thünchu ibu komkaile ku hato wüi naxnguikox; kue chem akaxpuix ija ning tamokkox. Momle pao üntoxle ku hato zwon ning shong-apüihüi.”

¹⁴Ikhoma paolaxle Jakop-e ibu honu hato apüile kox ilaxle she-e Isak-e saxse sungle ningle songle amyet.

¹⁵Ifüima she-e hom ma tüikya Esau nyiwun amüikya Jakop ang awunle kox.

¹⁶She-e chix to mun chitüikya suakto hia dingkux tangto zwon-khwon füi baple kox.

¹⁷She-e ija müisongkya hia she-e zingkya an Jakop chak to apongle kox.

¹⁸Ifüima Jakop a hopa hato hüilaxle nyak: “Apa!” Isak tsa ilaxle atüi: “Nang a ku sa opupu changkya?”

¹⁹Jakop-e lan: “Ku a hünsa tüichongpa Esau changpu; nange tomkya ningle kue müi langle apüipu. Ngo hüi üntoxle kue apüikya ija müi saxhüi ilaxle ku to mohimanhüi.”

²⁰Isak-e atüi: “Ochwonpai ma nange chemle atak tholaxpu?” Jakop-e lan: “JOWANPA nang Zang-e ija atak angkya bama ku to fongle changdaoa.”

²¹Isak-e Jakop ang thüi: “Nang to ku chak füi twonkya zongma nang ku hato soxle hüiüi. Otsingtsingma Esau changlaxma?”

²²Jakop hopa hato soxle hüi. Isak-e chix chak füi twonlaxle thüi: “Dingdün a Jakop dingdün ikoxle suakto a Esau ningle wüi atakle.”

²³Chixe ija Jakop changpule chitsing chemthüikoxle chix suaktobu a Esau suakto lailaile mune awangle tüi.

²⁴Chixe mohiman koxüi thothoma anaole chuwüi atüi: “Nang otsingtsing ma Esau wüi hexnyi?” Jakop-e lan: “Changle ku Esau a.”

²⁵Isak-e thüi: “Oja, müi hidaole ku ang laxhüi. Ija müi saxle koplax tix kue nang to mohimanüi.” Jakop-e ija müisui hopa ang apongle kox ilaxle chixe ling ang grepti-ju chuwüi hidaole apüile kox.

²⁶Ifüima hopae chix ang thüi: “Ku sa, nang ku hato soxle hüilaxle ku füi tun apongle changhüi.”

²⁷Jakop-e hopa füi tun apong ang hüikya zuma hopae chix nyi to atumle lax, ilaxle tix chix ang mohiman kox. Chixe thüi: “Ku sa ngan a JOWANPAe mohimankya haxtok ongan lailaile zinglong le.

²⁸JOWANPAe nang ang ding tokya nyenti fa üntoxle nang haxtokbu ma haxzao tüi ang naxtom! JOWANPAe nang ang sütling okhonguile naxfa.

²⁹Chaxwan angkya jat-libu hünzom da ang naxchang, ilaxle khünakbu hünzom zongto puinai le naxchang. Hünzome hünzom haxnu-homsabu thakma apün-awangle naxchang, ilaxle hünnu sixli hwom hünzom chitong to akhuxle naxchang. Hünzom to thuakzomle changkyabu thom-mwon le naxchang, ilaxle hünzom ang nomfui le thüikyabu mohiman ang naxchang.”

³⁰Isak-e chix ang mohiman koxkya tsuaklaxle laile paokya füishemle fao tokya Esau wangle hüi.

³¹Chixe chuwüi tüle müile müisong laxle hopa hato apüile kox. Chixe hopa ang thüi: “Apa, thunglax üntoxle kue nang hato apüikya ija müi saxlax ilaxle nang kax ningle ku to mohimanhüi.”

³²Isak-e atüi: “Nang opupu?” Esau-e lan: “Ku hünsa tüichongpa Esau a.”

³³Isak a anyonle abün ang süt, ilaxle chixe atüi: “Ami ku hato müisong laxle apüile koxkya a owa hexsi? Athax ile nang nguiüi thothoma kue ija süt saxle kopdaoa. Kue ku oshuk mohiman chix ang koxle apaodaoa; athax jento ija a chix kux ang ngoüi.”

³⁴Chemtue Esau-e ija kax atatpuix, chix mongmaxle akhongle soplaxle akax: “Apa! Nang mohiman ku ang chuwüi laxhüi.”

³⁵Ikoxle chixe lan: “Hünnao atsingle hüilaxle nang mohiman komkaile paodaoa.”

³⁶Esau-e thüi: “Chixe chix Jakop changpule münthüi lehi? Chixe ile dyenkya othom anyi ma nguidaoa. Pongwang ma chixe ku nuput sünkho tswonle paopu; hulax, athax a chixe ku mohiman tswonle paopu.” Ilaxle chixe thüi: “Nange ku hanpak ang oli tuita ngaxchu müntüi lea?”

³⁷Isak-e lanle thüi: “Kue chix a nang thakma apün ang tomdaoa, ilaxle mama chix honao hwom chuwüi chix da ang naxngokox le koxdaoa; ilaxle osüt-oling füi chix azangle ngo ang kopüihex-ole tsuak füima, ku sa, kue nang hanpak ang chemthüithoüi?”

³⁸Esau-e hopa ang thüi: “Apa, nang ma mohiman oli tuita ngaxchu müntüi hexnyi? Apa nange ku tochu mohiman angkya wüi changle.” Ija akaxlaxle chix sop.

³⁹Ifüima Isak-e chix ang thüi: “Nang hanpakma nyenti müntüi, haxzao füikya haxtokchu müntüi.

⁴⁰Nang a chang füi ozün ma ngoüi. Nang a hünnao da ang ngolax; nang chix füi alünkya zuma, chix kax fang ma ngokya zaküi.”

⁴¹Mohiman lili hopae bakle chix ang koxkya khoma Esau-e honao to miktsak. Chix mongto thüi: “Athax apa mangsop angkya hanpak chwonpu. Chix tokfüi ma kue Jakop langüi.”

⁴²Ikoxlechu chemtue honu Rebika-e Esau-e ile atsingkya chemtue awanle lax, she-e Jakop sele apüilaxle akax: “Hüntüi Esau-e nang lang angkya mongzangwünle tsuakdaoa, ilaxle chix a hanpak thatan ang adule ngowüi.

⁴³Idaile, ku sa, ku kax ma laxlax. Nang chwonchwonle wüi achong Laban hato Haran to kalax.

⁴⁴Ikhato nang hüntüi mongtsik madang-madang le ngolax.

⁴⁵Nange chix to hwondaokya chixe alakle changkya zuma kue nang wün ang owawa tsanle akatüi. Kue ku sa nyi nyixta ma wüi shemle max ang müntom.”

⁴⁶Rebika-e Isak ang thüi: “Ku kakle tamchu Esau sheko mixnokcha-e ngwomle. Jakop-e chu ikhatokya naocha laxle jangchang thüiningle ku zichu-zitüi.”