Read Wancho Naga Pongwang Laipex 28 Bible Online

Pongwang Laipex 28 - Wancho Naga bible

Pongwang Laipex 28

¹Ifüima Isak-e Jakop se üntoxle chix to mohimanle chix ang thüi: “Nange Kanancha münlaxüi.

²Idaile chwonchwonle wüi Paddan-aram to hünhochong Bethuel, owa hünnu hopa changpuix, chix hato kalax; ilaxle ikhato hünnu hotüi Laban sacha hwomkha angkya tuituita nang kakonu ang laxlax.

³Nang tüle simüi-limüile pu-tsale chang angkya hanpakma Khüthak Zang-e mohimanle naxchangfa.

⁴Chixe nang ang Abraham mohiman naxfa, nang ang tamchu nangsix-nanglibu ang chuwüi, ipongma nang mixnok wünpa tuita ningle ngokya haxtok, oja Zang-e Abraham ang koxle toxdaopuix, ija haxtok ma hopunu ang nang naxchang kox!”

⁵Ile Isak-e Jakop tomle akat. Jakop a Paddan-aram nok to kale Aram nok Bethuel sasün Laban hom to ngui. Chix a Esau hia Jakop nyi honu Rebika zongto hotüi changkya.

⁶Athax Isak-e, Kanancha chilax angkya hanpakma zünlaxle Jakop a Paddan-aram to chix kakonu lom ang mohiman koxlaxle tsanle akat.

⁷Honu hia hopa nyi kaxtom ma laxle Jakop Paddan-aram to kaüi Esau-e ngünle lax.

⁸Chemtue chix kakonu ang Kanan cha laxkya to hopa Isak ang mongzom chimüikya Esau-e ngünle laxpuix,

⁹Esau a Ishmael hato kalaxle, Abraham hosu Mahalath, owa Ishmael sasün tamchu Nabaioth honao changkya hex, she a chix kakonu ang apüi. Chix ang sheko mamabu chuwüi tüihukya, ibu to obo ang lax.

¹⁰Bersheba dantoxlaxle Jakop Haran chito ka.

¹¹Zangwat dütkya füima chix tuita otsao nui to ngui ilaxle ikhama nazak. Long tuita ma ngom ate laxle chix a jip ang shui.

¹²Wünmang chito chixe haxwannu makhange zangdingkho to thukya dixtua tuita ma kaxtaimixbu dong-dong-ju le ngokya ngün.

¹³Ikhama JOWANPA chix zui ma ajongle tüikya. Chixe thüi: “Ku a, JOWANPA, Abraham hia Isak nyi Zang changpu. Athax nang jiple ngokya haxtok a, nang ang tamchu nangsix-nangli hwom ang kox angkya changpu.

¹⁴Hwom a haxtsa angkya haxbu büta pu-tsale changüi. Hwome hwom haxsüt longzi pangnu chito akhaole paoüi, ilaxle nang hia nangsix-nanglibu makhange pangnu jat-li to mohimankya tüiüi.

¹⁵Mong ma koplax, ku a tütakhatochu nang füi womle tamchu nang kho-awale ngoüi, ilaxle kue nang ija haxtok to chatle chat ang tomüi. Kue nang füi tsaosax daokyabu pangnu changle mahüi tanto kue nang otuechu danle müntox.”

¹⁶Jakop zo ilaxle thüi: “JOWANPA a ikhama tüile! Chix ikhama tüikya kue chitsing ngodao ngüna!”

¹⁷Chix za ilaxle thüi: “Ikha chemningkya za-adünkya onuihex! Ija a Zang hom changüi; ija a zangkangting to ngui angkya fülom changüi.”

¹⁸Ofüinop Jakop akhangle zo, chix ngom atekya long kop, ilaxle ija tuita münwan ang küile tox. Chixe ija Zang hanpak ang atsaole koxkya ang achangle ija to müngae li.

¹⁹Chixe ikha ang Bethel le nyak. (Ikhama tüikya tingnu ang noxta Luz le nyakle tüikya.)

²⁰Ifüima Jakop-e JOWANPA füi Tsaotsüt lax: “Ku ojongto paopuix ikhato nange ku kho-awa tamchu sütling hia nyi-za koxle jangchang,

²¹üntoxle ku apa hom to haxmüi-zangmale chat ang jangkop, nang a ku Zang ang changüi.

²²Athax kue münwan ang oja long ajongle toxpuix, ikha a nang to shwom-to le chang angkya nui-ting ang changüi, ilaxle nange ku ang koxkya kha angkya kue bün ma othom tuita nang ang koxüi.”