Read Wancho Naga Pongwang Laipex 29 Bible Online

Pongwang Laipex 29 - Wancho Naga bible

Pongwang Laipex 29

¹Jakop a handünchikao chaxwan to okat-okat le ka.

²Chunzyem othom azom akankhop le nazak laxle tüikya, zang kotho tokya tüküi tuita hato chix allele laile kox. Chunbu ang ti khole alinghomkya ija tüküi a long füi oka haklaxle tüikya.

³Chemtue chunzyembu bakle asoxüihex, chun-nyetmixbue ija long laoxlaxle chunbu ang ti aling. Ti-aling tsuak füima hwome ija longfüi chatle huxle tox.

⁴Jakop-e chun-nyetmixbu ma atüi: “Tüinao-hom, hünzom ojong nok tokyabu hex?” Hwome lan: “Kwom a Haran nok tokyabu changpu.”

⁵Chixe atüi: “Hünzome Nahor hosu Laban awancha?” Hwome lan: “Kwome awanle.”

⁶Chixe atüi: “Chix müimüi tüilaxma hex?” Hwome lan: “Chix a müimüi wüi tüile. Hulax, chix sacha Rachel chix chunbu füi nguingo le.”

⁷Jakop-e thüi: “Athax zanghan dangdang le tüitan, chunbu wüntu mangui. Hünzome ibu a ti alinglaxle fumtsüt ang chatle büthüikoxle chipaopu?”

⁸Hwome lan: “Chunbu pangwüi nguile matsuak tanto tamchu ija longnu apaole machang tanto kwome ile mok ang müntho. Longnu laoxle apaole chang füimatix kwome chunbu ang ti aling ang thoüi.”

⁹Jakop hwom füi kaxkaxle ngopongkhae wüi chunzyem füi Rachel nguile hüi.

¹⁰Chemtue Jakop-e Rachel chix hohochong Laban chunzyem füi nguile ngokya ngünpuix, chix tüküi hato hüi, longnu laoxle awüt, ilaxle chunbu ang ti aling.

¹¹Ifüima chixe she füi tun apong ilaxle mongmüile sop.

¹²Chixe she ang thüi: “Ku a hünpa holisa, Rachel sasün changle.” She a hopa hato zikle chat;

¹³üntoxle chemtue chixe holisa Jakop bama atat ang koppuix, chix füi apong ang zikle lai. Chixe Jakop to künle kop ilaxle tun-apong ilaxle hom to apüi. Chemle pang ole changpuix, ibu Jakop-e Laban hama wünle changkya zuma,

¹⁴Laban-e lan: “Changle, nang a ku aji tamchu ku tsangtsa jao changpu.” Jakop ikhato lyetjang ahomle ngole hüi.

¹⁵Laban-e Jakop ang thüi: “Nang a ku zongto ma-mix changle le amuamuale ku mwot mokle kox angkya le münchangüi. Nange omün pongle laxse tsucha?”

¹⁶Laban ang sacha anyi tüikya; nüchongnu a Liah üntoxle naolinu a Rachel.

¹⁷Liah Mik-hu chakzam ajunjun. Liah wüi sümüi ikoxlechu ojong-odün hia osün Rachel wüi sümüi.

¹⁸Jakop-e Rachel o wüi sükün, idaile chixe thüi: “Nange ku ang Rachel lax ang koxüi jangthüiba, kue nang ang zanglao anüt mwot mokle faüi.”

¹⁹Laban-e lan: “Owawa ang koxle apaokya füi she kue nang ang wüi koxüi; idaile ku füi tomle hom ma wüi ngodao.”

²⁰Rachel lax angkya kuxmale Jakop-e Laban hom ma zanglao anüt mwot mokle kox. Ibibi hanpak, Rachel tokya mongküne chix zongto nyixnyi-zom ang laxle akai.

²¹Pangnu tsuakkya füima Jakop-e Laban ang thüi: “Athaxpi hanpak nguidaoa; ku ang nang sacha Rachel lax ang koxhüi.”

²²Idaile Laban-e khünakbu pangwüi ahyenle hokhi tuiju-nasomle kox.

²³Ikoxle ija ja, Rachel chichangle Jakop hato chixe Liah mix ahüi, ikhoma Jakop ang she füi jip.

²⁴(Laban-e chix dacha Zilpah a chix sacha Liah dacha ang kox.)

²⁵Rachel chichangle Liah mix changdaokya changa, le Jakop-e zangngai mik matix tsing ang kop. Chix Laban hato hüilaxle akax: “Nange ku to ile büthüikoxle hwonpu? Kue ibibile Rachel kopse monge mokwüi, ikoxle nange ile ku chemkhoma dyenpu?”

²⁶Laban-e lan: “Hona thoma honao koxle apao angkya ikhato wanlom ma müntüi.

²⁷Ija hatdang ashukle naxchangfa; ifüima nange chatle chuwüi zanglao anüt hom ma mwot mokle ngoüihex jangthüi: kwome honao Rachel chuwüi koxüi.”

²⁸Jakop-e müiüiatix le mongtsu, ilaxle tuiju-nasomle pwon-lekyabu tsuakle hatdang ashukkya füima, Laban-e chix sacha naolinu Rachel chuwüi Jakop kakonu ang achang ang kox. (

²⁹Laban-e chix dacha Bihah Rachel dacha ang kox.)

³⁰Jakop-e Rachel füi chuwüi jip, ilaxle Liah füi ngaxchu chixe she towüi onüi mongkün. Ifüima chixe Laban hanpak ang mama zanglao anüt mwot mokle kox.

³¹Rachel to a onüi mongkün ikoxle Liah to a aluile chikak-chikünkya chemtue JOWANPAe ngünle laxpuix, chixe Liah ma naosom nguidongle chang ang tom, ikoxle Rachel a nao chingui-chidong le ngo ang tom.

³²Liah ma naotüi ilaxle sasün tuita pux. She-e thüi: “JOWANPAe she künduk-mongthang ngünle laxdaoa; athaxpi ku kakopae ku to mongkünkya tüiüi.” She-e ija nao ang Reuben le mün kox.

³³Anaole chu she ma nao nguidongle chang ilaxle tuita sasün wüi pux. She-e thüi: “Ku to kakoe chikün-chiluakya atatlaxle ija nao a JOWANPAe koxpu.” Ija daile she-e chix ang Simeon le amün.

³⁴Anaole chuwüi she ma nao nguidongle sasün wüi tuita pux. She-e thüi: “Athaxpi ku kakopa ku füi shingmongle changüi, chemthüikoxle kue chix ang lüka naosasa wüi azomnu puxle koxdaoa.” She-e ija nao ang Liwi le amün.

³⁵Anaole chuwüi she ma nao nguidongle sasün wüi tuita pux. She-e thüi: “Izuma a kue JOWANPA achuaküi.” She-e chix ang Judah le amün. Ifüima she ma naosom nguidongkya zakle pao.