Read Wancho Naga Pongwang Laipex 3 Bible Online

Pongwang Laipex 3 - Wancho Naga bible

Pongwang Laipex 3

¹Athax JOWANPAe zingkya zünmok pangnu thakma huxtsing-loptsang akhokya a pu tüikya. Pue shekocha ma atüi: “Zang-e hünkhi ang tsawatkha angkya pünziak chemchu taxsax-ole thüipu lea?”

²Shekochae pu ang thüi: “Tsawatkha angkya pünziak kwome sax ang tsuak,

³ikoxlechu Zang-e ‘Tsawat osungkha angkya pünziak taxsax tamchu ija to twonchu taxtwon, ile jangchangba hünzom ziüi’, le akaxdaoa.”

⁴Ikoxlechu pue mixcha ang thüi: “Ija otsing münchang, hünzom münziüi;

⁵ikoxle hünzome ija pünziak saxkya füi tomle hünzom ang mikdapüi tamchu omüi-oma awanle Zang lailaile changüile awanpu ilaxle omüi-oma tsingle changüi.”

⁶Chemtue ija mixchae pünziak a saxkoxle müi ang asusule mik-hu zongma tüle müile ngünle laxpuix, jetüi-hwonlangle chang angkya to mongzalo laxle ija pün angkya oziak khaile sax; ilaxle she füi tomle tüikya ma kakopa ang chuwüi hidaole kox; chixe chuwüi ija sax.

⁷Ifüima hokhi pangnyi ang wüi mikdap, ilaxle hokhi a ohua ma tüikya awanle lax. Okhie fup chak khaile sing ilaxle makeke ma tho.

⁸Hansong zangwin wuwule tüipongma tsawat khato JOWANPA ahamkya hokhie atatle lax. Okhi a chix thoto khünle ngo.

⁹Ikoxle JOWANPAe khünak lomle nyak “Nang ojongma tüi?”

¹⁰Chixe lan: “Kue tsawat mongto nang nguikya ozing atatlaxle za üntoxle ku a ohua ma tüikya khoma ku lualua to khünle ngopu.”

¹¹Zang-e atüi: “Nang a ohua ma tüile le owae thüipu? Kue taxsax-ole abaxkya pünziak nange saxdaopia?”

¹²Khünake lan: “Nange ku füi tomle ngo ang apüile fakya shekochae ija pünziak ku ang koxkya kue saxdaokoxa.”

¹³Ifüima JOWANPAe shekocha ang thüi: “ija ile chemthüikoxle mok?” Shekochae lan: “Ija naxsax ang pue ku dyenkya khoma kue ija saxdaongüna.”

¹⁴JOWANPAe pu ang thüi: “Nange ija ile mokkya khoma, müibu hia zünmok pangnu khama nang to thuakzompu; nang wokzutle ahamüi ilaxle nang tsün-tsün ma nange haxbu saxüi.

¹⁵Kue nang hia shekocha hünkhi bama tamchu nangsix-nangli hia she sixli hwom bama zan zingpu. She susa hwome nang khang thuple akhixüi ilaxle nange she susa hwom chidua ma tuüi.” Hwom chidua ma tuüi.

¹⁶Mixcha füi chuwüi chixe akax: “Kue nang ang naotüikya zuma sikngün sisile achenüi ilaxle nao ngünkya fuxtsüi-zolitle ngün ang tomüi, ikoxlechu ma kakopa to mongzalokya nang ma tüile ngoüi ilaxle nang a chix fang-fang ma wüi ngoüi.”

¹⁷Üntoxle lükapa füichu chixe akax: “Nange nang kakonu kax ma laxle tüikya khoma, tamchu kue taxsax-ole kaxtom koxle thomkya pünziak saxkya bama, nang khokho ma haxtok to thuakzomle changdaoa; nang tsün-tsün ma nange ikha angkya sikngün laxle tix saxlaxle changüi.

¹⁸Haxtoke nang fum-hing hia kongbüibu anyemüi, ilaxle nang haxtok angkya fumchakbu saxüi.

¹⁹Nang haxtok to chatle machat-machatle ma khangpong angkya zangmukti laile tix nange süt sax ang ataküi; ija makhange zingkya daile nang a hax changpu, ikhoma nang tamchatle hax towüi chatüi.”

²⁰Adam-e chix kakonu ang Ef le mün kox, chemthüikoxle she a ozün ma tüikya nok honu changle.

²¹Khünak hia chix kakonu hokhi hanpakma JOWANPAe müikhwon makhange nyi sing ilaxle ibu füi hokhi tsangtsa to chwople kox.

²²Ifüima JOWANPAe thüi: “Hulax, omüi-oma awan ang tsuakle khünak a kem khama tuita ningle changdaoa. Khüzün koxkya pün angkya pünziak hwom lailai to khaile sax ang danlaxle tamchu chizile ngo ang müntom angkya oli changle.”

²³Ikhoma JOWANPAe, oja makhange chix zinglaxpuix, ija haxtok thomo-manzaile saxle ngo angkya hanpakma Zang-e hokhi a Eden Tsawat kha angkya koto alai.

²⁴Chixe khünak jwonle alai, ilaxle Eden Tsawat zongma handün chima, khüzün pün hato lekya lom nyele Cherubim hia wünle füikya changlo dan.