Read Wancho Naga Pongwang Laipex 30 Bible Online

Pongwang Laipex 30 - Wancho Naga bible

Pongwang Laipex 30

¹Ikoxle Rachel-e Jakop ang naosa tuita ngaxchu pux-paile chichang, ilaxle she-e hona to khax-khu laxle Jakop ang thüi: “Ku ang naosom atüihüi, ile chichangba ku ziüi.”

²Jakop ang Rachel füi mongma, ilaxle thüi: “Ku Zang ang chemle achangthoüi? Nang ma naosom tüiang chitomle abax thomkya a chix changpu!”

³She-e thüi: “Ija ku dacha Bilhah füi jiplax; she makhange thüingaxchu ku ang naosa tüi angchahex. Ile she makhange thüingaxchu ku nao honu tuita ang achang ang.”

⁴Ilaxle she-e hodacha ma kakopa ang kox, ikhoma chix she füi jip.

⁵Bilhah makhange Jakop ang sasün tuita puxle kox.

⁶Rachel-e thüi: “JOWANPAe ku sukya ang laxdaoa, chemthüikoxle chixe ku zangjop to lanle ku ang sasün tuita fale tüile.” Idaile she-e chix ang Dan le amün.

⁷Bilhah ma chatle chuwüi naotüi ilaxle Jakop ang sasün tuita puxle kox.

⁸Rachel-e thüi: “Ku ana füi zongbakle azandaoa, ikoxlechu kue wüi anaodaoa.” Idaile she-e ija nao ang Neptali le amün.

⁹Liah-e she ma naosom nguidongkya zakdaoale awankya zuma, she-e ma kakopa ang hodacha Zilpah chix kakonu ang lax ang kox.

¹⁰Ifüima Zilpah-e Jakop ang sasün tuita puxle kox.

¹¹Liah-e thüi: “Ku a shomüidaoa.” Idaile she-e ija nao ang Gad le mün kox.

¹²Zilpah-e Jakop ang tamchatle chuwüi sasün tuita puxle kox.

¹³Anaole Liah-e thüi: “Ku ang mong huanuma müile! Athaxpi shekobue ku ang mongmüi mixcha le nyaküi.” Ilaxle she-e ija nao ang Ashar le mün kox.

¹⁴Wonglai tsax atukya tuke Reuben zim to ka üntoxle mendrek atak, ija chixe honu Liah hato apüile kox. Rachel-e Liah ang thüi: “Hünsae apüikya mendrek ku angchu hidaole fahüi.”

¹⁵Liah-e lan: “Nange ku kakopa tswonle paokya ma ngaxchu mongzom mamüi hia? Athax nang ku sasün mendrek chuwüi pao ang azong cha?” Rachel-e thüi: “Nange hünsa kux mendrek ku ang jangkox, nang aja Jakop füi jip ang tsuaküi.”

¹⁶Chemtue Jakop zim tokya hansong wünwang le changpuix, Liah chix pongto zale apong ilaxle thüi: “Aja nang ku füi jip angkya changle, chemthüikoxle nang hanpak otha ang kue kusa kux mendrek koxdaoa.” Ikhoma ija ja tomle jip-pomle chang.

¹⁷Zang-e Liah zangjop atatle lax, ilaxle she-e Jakop ang aga lükya sasün tuita puxle kox.

¹⁸Liah-e thüi: “Zang-e ku ang ku hingho fadaoa, chemthüikoxle kue ku da ku kakopa ang koxkoxpu.” She-e ija nao ang Isakar le mün kox.

¹⁹Anaole chuwüi Liah ma nao nguidongle sasün tuita pux. Ija a she-e ngünkya azok lükya nao.

²⁰She-e thüi: “Zang-e ku ang sümüikya hingho koxdaoa. Athaxpi ku kakopae ku pongle kop angkya changle, chemthüikoxle kue chix ang sasün azok puxle koxdaoa.” She-e ija naosa ang Zebulun le mün kox.

²¹Ofüima she-e sacha tuita pux. She-e ija nao ang Dinah le mün kox.

²²Ifüima Zang-e Rachel texle atak; chixe she zangjop to lan ilaxle she ma naosom nguidong ang tsuakle achang.

²³She ma nao nguidong laxle sasün tuita pux. She-e thüi: “Ku ang sasün tuita koxkya makhange Zang-e ku mongma paodaoa.

²⁴JOWANPAe ku ang anaole chuwüi sasün mama naxfahüi.” She-e ija nao ang Jusep le amün.

²⁵Jusep puxkya füima Jakop-e Laban ang thüi: “Athaxpi ku hom to chat ang tomhüi.

²⁶Nang mwot moklaxle achakle kopkya naosom honu hwom ku ang fahüi. Ku a hom to chat angkya changle. Kue chemtukux müile nang mwot mokle koxpuix ija nange awan ngopu.”

²⁷Laban-e chix ang thüi: “Kue thüifang, o-nan makhange kue awan ang kople, JOWANPAe ku to nang khokho ma mohimankya changle.

²⁸Nang hingchak chemtukux sütpuix akiaklax, kue ibu nang ang koxüi.”

²⁹Jakop-e chix ang thüi: “Kue chemle nang mwot mokle hüipuix tamchu nang tsom-pombu ku chak ma chemtukux pu-tsale hüipuix, ibu pangwüi nange awan ngopu.

³⁰Ku hüikya thoma nang tsom-pombu hidaole wüi bangpu, ikoxle ibu müimamale tsale hüidao; iningle ku ahamham pangnu chito JOWANPAe nang to mohimanle hüipu. Athaxpi ku angchu ma hanpak ang hu angkya hato nguile hüile.”

³¹Laban-e atüi: “Kue chem koxle nang thathomüi?” Jakop-e lan: “Kue otha chemchu münlom. Nange ija ku kax to apale jangchangba kue nang chunbu to otya ma hume lüwüi ngoüi.

³²Zangwün a ija changle: Anyix kue nang chunbu pangwüi to hule lefang ilaxle chun hosa chun anaknak üntoxle zwon a zazathuakle atüitüi zünle kopfang; ibibi bakle ku ang jangfaba thakho nguikya angchu changüi.

³³Ku chiahuxkya hia ahuxkya, athax füichima loplax angpuix. Nange ku ang koxkya otha to akhile hüikya zuma, ku chun hia zwonbu, nang thoma nakkya hia zazadütkya boma mama jangbang, ija a kue nang kux ahuxkya changpule nange awanle laxüi.”

³⁴Laban-e lan: “Müiüi. Künyie nange chemle akaxpuix ile moküi.”

³⁵Ikoxle ija nyixnyix wüi Laban-e chix chun hia zwonbu kha angkya nakle hia zazadüt le atüitüi honu-hola pangwüi süi ilaxle ibu to sasün hwom ang hu ang tom.

³⁶Hwom ibu müizyem koplaxle Jakop füi nyix-azom hanhomle ahamkya tsailo fao to ka. Ota danle toxkya Laban müi to Jakop-e hume.

³⁷Ifüima Jakop-e poplar, almon, hia mama pün angkya pünkang ohingbu lax üntoxle zazadüt le naxtüi ang ibu düntsyen le okhwon lile awüt.

³⁸Chunbue ti lingle changpongma kiathox ibu hwom ti ling khuabu hama danle tox. Müibu ti ling ang nguipongma atu-amaile changkya khoma chixe ija ile hwon.

³⁹Ikhoma ija pünkangbu hama atu-amaile changpongma hosa kopkyakya chune hosabu zazathuakle pux.

⁴⁰Jakop-e chun a zwonbu füi süile thom ilaxle Laban zwonbu zazathuakle hia naknak le tüikyabu hato jwonle ahüi. Ile chixe chix müizyembu süile alai ilaxle Laban müizyembu füi atsaile thom.

⁴¹Chemtue owan müikya müibu atu-amaile changpuix, ipongma hwom ti ling khua zui ma chixe ibu pünkang dan, ile hwome pünkang tüikya khama hosa atüile chang ang kop.

⁴²Ikoxlechu tsyatsyenkyabu atu-amaile changpongma pünkang ibu hwom tunthoma chidan. Ile Laban ang müi tsyatsyenkyakya wüi ang achang, ikoxle Jakop ang a haxnut-zangfexkyakya wüi ang achang.

⁴³Ile Jakop a tüle tüi-nangkya mix tuita ang achang. Chix ang müizyembu, dabu, utbu üntoxle mantsakbu tüihukya.