Read Wancho Naga Pongwang Laipex 33 Bible Online

Pongwang Laipex 33 - Wancho Naga bible

Pongwang Laipex 33

¹Athax Jakop-e mikzaple hukoxle khünak 400 koplaxle Esau hüile ngokya ngünlelax. Ikhoma chixe, sasün hwom, Liah, Rachel hia dacha hwom manunusa le ahan.

²Chixe dacha hwom sasün hwom füi thochi ma süt ang tom; ifüifüima naosom hwom füi Liah süt ang tom ilaxle Rachel sasün nyie füikom le chang ang tom.

³Chix a hwom pangnu tunthoma le. Chixe othom anüt ma hax to akhuxlaxle, hotüi ha ma-alop ma-alople ile aham.

⁴Ikoxle Esau a chix füi apong ang zikle hüi, chix to thüile kün ilaxle ngom ma künlaxle tun apong; ijama hokhi pangnyi sop.

⁵Chemtue Esau-e shekobu tamchu naosombu ngünle laxpuix, chixe atüi: “Ibu nang füi tomle hüikyabu a opang?” Jakop-e lan, “Ibu a nang dapa ku ang JOWANPAe mohimankyabu changle.”

⁶Ifüima danuchabu soxle hüi; hwom füi tomle naosom hwom chuwüi hüi, ilaxle Esau chitong ma akhux.

⁷Liah hosa hwom chuwüi hüilaxle chix chitong ma akhux. Oshuk ma Rachel hia Jusep hwom hüilaxle chix chitong ma akhux.

⁸Esau-e thüi: “Ami thochima ku füi apongle leünkyabu a chemningkya”? Jakop-e lan: “Ija nang mongjua jox angkya hanpakma changle.”

⁹Ikoxlechu Esau-e thüi: “Ku ma tütalichu okhonguile tüingole; kunao, nangkux ibu nange wüi kopdao.”

¹⁰Jakop-e thüi: “Münchang, ile münchangüi, nange ku to mongjuakya chemchu chitüi thüiningle ku hingho chuwüi lax angkya changle; ku zongto nang thün ngünkya a otsing tomtata ma Zang thün ngün ang kopkya tukuxle sütle. Nange ku to chem mongjua chitüile ipongpongle wünpwonle pongle kopkya huanu changpu.

¹¹Kue nang hato apüikya hingho pongle kop angkya wüi changpu, chemthüikoxle ku to JOWANPAe ching-chahudaoa, ile kue alomlom pangwüi kue koptsuakdaoa.” Ile Jakop-e atsangkya khoma Esau-e ibu hingho pongle kop.

¹²Ifüima Esau-e thüi: “Athaxpi jo homchi to chat ang achexhax, ilaxle ku nang füi tomtomle ahamüi.”

¹³Ikoxlechu Jakop-e chix ang thüi: “Nange awan ngopu, naosom ma zong chitüi tamchu hosa füikya müibu paktikle aham angkya changle. Hwom nyixta ngaxchu atsangle jangjwon thüiningle ibu zile paoüi. Ibu to akhi-amikle chang angkya a ku mwot ang changle.

¹⁴Idaile nang achale chat bang, ikoxle ku a zaze-zazele azuile hüiüihex. Edom ma-alop ma-alople naosom hia müibu füi otsuaktsuak ma ahamle hüilax angpuix.”

¹⁵Esau-e lan: “Jangchangba kue ku khünakbu züizüi nang füi toxfang.” Ikoxlechu Jakop-e thüi: “Khünakchu taxtox ngo, nange ku to mongjua chemchu chitüile ku pongle kopkya müihudaoa.”

¹⁶Ikhoma Esau a Edom alop ang achexle chat.

¹⁷Ikoxle Jakop a Sukkoth to pao; ikhato chixe ma pombu hia müibu athong angkya nui zaile athong.

¹⁸Mesopotamia tokya chat pongma, Kanan haxtok angkya Shekem alople haxmüi-zangma lüwüi ngui. Chixe tingnu zui ma kothofa to chixe hwom thongnui zaile athong.

¹⁹Chixe ijakha haxtok khop ngunkhix hota koxlaxle Shekem hopa Hamor su-sa hwom ma shak.

²⁰Chixe ikhama tö-tsap tuita tan ilaxle ijongkha ang Israel nok Zang mün ma El le nyak.