Read Wancho Naga Pongwang Laipex 37 Bible Online

Pongwang Laipex 37 - Wancho Naga bible

Pongwang Laipex 37

¹Jakop chuwüi hopa hwom ngole toxkya Kanan haxtok ma wüi ngole hüi.

²Ilaxle ija a Jakop hwom kako-homkha pukax changle. Jusep a zangbün-anüt naosünsa tuita, hopa dacha Bilhah hia Zilpah nyi sasün hwom füi tomtomle chix chuwüi chun hia zwonbu nyet ma süt. Chix hotüi-honao hwome chichang-chizang mwot mokkya kaxhobu chixe hopa hato apüi.

³Chix azule changkya füima pux-paikya chang koxle Jakop-e, sasün hwom pangnu khama Jusep to ataxle mongkün. Chixe Jusep ang nyipong ponglonu tuita single kox.

⁴Chemtue hotüi-honao hwome, hopa Jakop-e hwom pangnu to nüile Jusep to mongkünkya ngünle laxpuix, chix füi zangwünse ngax chitsule hwom ang mongma.

⁵Jata Jusep-e wünmang tuita ngün. Chixe ija wünmang hotüi-honao hwom hama wünle kox. Ija füima sisile hwome chix to miktsak.

⁶Chixe thüi: “Kue wünmang mo wünfang apahüi.

⁷Kem pangnu wüi zang to tsaxthopbu khakle tüikya. Ku tsaxthop zo ilaxle tangthole ajong. Ipongma ija akhople hünzom tsaxthopbu hüilaxle ija to shwom.”

⁸Hotüi-Honao hwome thüi: “Nang wanghom ang achang laxle kwom thakma apün angkya lükya kax hia”? Ijaningle chix wünmang bobo ma chu hwom bama hopa hama khualople ngokya khoma sisile hwome chix to miktsak.

⁹Anaole chu Jusep-e wünmang mama mo hotüi-honao hwom hama wün. Chixe thüi: “Lyetnu, zanghan hia lyettsibu 11-e ku tong shwomle ngünle.”

¹⁰Chixe ija wünmang hopa hama chuwüi wünle kox. Hopae chix to sale thüi: “Ija a chemningkya wünmang? Hünnu hia hüntüi-hünnao hwom kwom pangnusa ngui üntoxle nang tong shwom angkya le hia?”

¹¹Jusep to hotüi-honao hwome miktsak ikoxlechu hopae ibu zangwün komle chix mongkha to thom ilaxle mongzangwünle ngo.

¹²Hanpak tuita ma Jusep hotüi-honao hwom pangwüi hopa müibu nye ang Shekem to kale tüikya.

¹³Jakop-e Jusep ang thüi: “Nangpi Shekem to. Hüntüi-hünnao hwome chunbu nyele ngokya khato tamkakox.” Jusep-e lan: “Kaüia.”

¹⁴Hopae akax: “Hüntüi-hünnao hwom tamchu müibu haxmüi-zangmale tüilaxma hex, le ka üntoxle hutoxthün. Ifüima nang a wanghüi ilaxle hwom chemle tüipuix, ija ku hama wünhüi.” Ile Hebron haxnucha angkya chix hopae Shekem to tsanle akat. Jusep Shekem to ngui.

¹⁵Ikhato chix chaxwan faole aham ngopongma khünak tuitae ngünle lax. Ija mixsüne atüi: “Nange chem lompu?”

¹⁶Chixe lan: “Kue ikhato chun nyele ngokya kutüi-kunao hwom to hupu. Hwom ochichi ma tüipuix, nange awan ang cha?”

¹⁷Ija mixsüne thüi: “Ikhatokya hwom paoün koxlax, chemthüikoxle hwome Dathan chito kahax le zangwünkya kue atatdaoa.” Ikhoma hotüi-honao hwom mantole Jusep Dothan to kale ikhato hwom atak.

¹⁸Hwome chix ochu towüi ngünle lax, ilaxle chixe ikha alople machangba wüi, chix mik amüt angkya zangwün tsuak.

¹⁹Hwome tata füi akaxle thüi: “Chuja, wünmang ngünmix kem hato hüile ngole.

²⁰Hai, kemepi chix langhax, ilaxle chix mang tuita tswomzan khato shohax, ilaxle chix a faozan chak to maxdaoa le thüihax. Ifüima chix wünmang chem ang achangchang keme huüi.”

²¹Ija zangwün atatlaxle Reuben-e Jusep khosün ang azong. Chixe thüi: “Keme chix mik amütle tomtata taxchanghax.

²²Chix to chakmokle chichang homtoxle, keme chix tuita tswomzan to adüt-hax.” Chixe ija a Jusep khosün laxle hopa hato chatle chat ang tom angkya hanpakmale atsingle akax.

²³Chemtue Jusep-e hwom ha alople changpuix, chix hotüi-honao hwome Jusep tsangtsa angkya nyipong ponglo sikle lax.

²⁴Hwome chix kop üntoxle zuazoxkya tswomkha to adüt.

²⁵Hwome fongsaxle ngoponge, Gilid tokhange Ijip nok to ka angkya Ishmael nokbu ngünle lax. Hwom utbu a hum-hing hia grep zanbue awangle hünzing laxle tüikya.

²⁶Judah-e hotüi-honao hwom ang thüi: “Keme kem nao Jusep langle akhün toxkoxle kem ang olüi chemtüi?

²⁷Kemepi chix a ibu Ishmael khünakbu ang hanghax. Ile jangchang thüiningle keme chix to chakmok angkya müntüiüi. Tamthüt koxle chix chuwüi kem zong pasa-tüinao, kem müi, kem aji changpu.” Hwom pangnu mongtsu,

²⁸ilaxle Midi nok thalex mixbu hüikya zuma, hotüi-honao hwome Jusep dokle alailaxle Ishmael khünakbu ang khop ngunkhix khaotsa ang hangle apao. Hwome chix Ijip nok to jo.

²⁹Reuben chatlaxle tswomkha to hukoxle ikhama Jusep chibangkya zuma chix ang mongma ilaxle chix nyi-za akyet.

³⁰Chixe hotüi-honao hwom hato chatlaxle thüi: “Jusep a tswomkha khama müntüi. Athaxpi kue chemle hwonüi?”

³¹Ifüima hwome chun tuita lang ilaxle Jusep nyipong a ija aji khato som.

³²Hwome ija nyipong hopa hato wünlaxle thüi: “Kwome ija lomba to atakle. Ija hünsa kux changchahex”?

³³Chixe ija nyipong tsingle lax, ilaxle lan: “Changlea! Ija a chix nyipong jaojao changpu. Chix a faozan-e saxdaokya changa. Ku sasün Jusep a shaole akhixdaoa!”

³⁴Mongma laxle Jakop-e nyipong akyet ilaxle nyikhwon awun. Chixe sasün hanpakma okuilole mang sople ngo.

³⁵Chix sasün hia sacha hwom pangwüi chix mong asom ang hüi, ikoxlechu chix ang mongsom chikop. Chixe thüi: “Ku a lumting tochu kusa mangsopnga lüwüi ka angkya changle.” Ile chix sasün Jusep mangsopkya tamchizaktox.

³⁶Ipongma Ijip nok to Midi nokbue Jusep a Potifar ang hang. Chix a wanghom pa ma alixachong tamchu chongwang homkha nyetmixbu khama lompa tuita changkya.