Read Wancho Naga Pongwang Laipex 39 Bible Online

Pongwang Laipex 39 - Wancho Naga bible

Pongwang Laipex 39

¹Ishmael khünakbue Jusep a Ijip nok to katlaxle Potifar ang hang. Chix a wanghom pa ma alixachong tamchu wanghom hom nyetmix khama lompa tuita changkya.

²JOWANPA a Jusep füi tüikya ilaxle pangnu lom to chix a tho-lünle chang ang tom. Chix a Ijip nok nwotmix tuita homkha ma ngo.

³Jusep füi JOWANPA womle tüikya makhange chix mwot pangwüi mohiman ang achangle hüikya hopupae ngün ang kop.

⁴Jusep füi Potifar ang mongzom müi ilaxle mahuak da ang thom. Ma homkha hia tuina pangwüi to chix ang humele chang ang tom.

⁵Ija makhange, Jusep khokho ma, ija Ijip nok homkha hia haxtok pangwüi to JOWANPAe mohiman.

⁶Ile tütali hünlixchu pangwüi Jusep chak to danlaxle Potifar ang chix wok ma sho angkya süt shokya boma tütali tochu chix khangza ma kak angkya jao chitüile ngole hüi. Jusep a ojung-odün hia osün-ojo pangwüi müikya naosün tuita changkya.

⁷Ija jaojaole chix hopupa Potifar kakonue chix to mikzalo le hu ilaxle she füi tomle jip angkya atsang.

⁸Chixe ile münchangpu le ado ilaxle thüi: “Hulax, ku hopunue, homkha ma ku tüikya khoma tütali tochu chix khangza ma kak angkya ojao chitüi. Ija a chixe ku ang pangwüi to hume ang tsankoxle.

⁹Ija homkha ma ku machu chix füi tomwüile zong tüipu. Chixe ku chak to chidankya a nang tata wüi. Ipongle changkya füima kue büthüikya to iningkya chichang-chizang suale Zang zongto ochax lyenle changüi?”

¹⁰Ile nyixfokya to she füi tomle jip ang tsiale ngokoxlechu Jusep she füi chijip.

¹¹Ikoxle nyixta homkha ma mama dabu owachu chitüi pongkhae Jusep chix mwot mok ang homkha to dongle asu.

¹²She-e chix nyitua ma koplaxle thüi: “Oman, ku füi jip-hax.” Ikoxlechu chix homtho to laile paole azang. Fütle paoüima chix nyi-za she chak to danle tox.

¹³Chemtue she chak to chix nyi-za toxlaxle homtho to zikle laipuix,

¹⁴she-e da mamabu nyak üntoxle thüi: “Ija to hulax! Ku kakopae apüikya Ibri Süne kem adale. Chix ku nui to donglaxle ku to shing ang azongle.

¹⁵Ku azaxle akhongkya thoto, chix nyi ku hama dantoxlaxle chix homtho to laile paole.”

¹⁶She-e ija Jusep nyi ma kakopa nguikya kople she chak to thom.

¹⁷Ofüima she-e ija zangwün otyatya wüi ma kakopa hama wünle thüi: “Ija Ibri naosa, nange hom ma apüilaxle thomkya mixsüne ku nui to donglaxle ku adale.

¹⁸Ikoxlechu ku akhongkya thoto, chix nyi ku hama danle toxlaxle homtho to laile paole.”

¹⁹Ija atatlaxle Potifar ang tüle mongtsik.

²⁰Chixe koplaxle Jusep a wanghom dabu shole thomkya kun ma shole thom.

²¹Ikoxlechu Jusep füi JOWANPA tüile ngokya daile ikhatochu Zang-e chix to mohiman. Kun nyele ngokya alixachong tuita chix füi tüle müi.

²²Chixe Jusep a, kun ma shole tüikya khama akhokya achang tamchu hwome chempang mokpuix ibu pangwüi to humele chang angkya hünlix chix ang kox.

²³Jusep-e humele chang angkya hünlit koxle thomdaokya mwot tütali to chu nyetmixe tamchatle hungo angkya mwot chiatsat. Chemthüikoxle, JOWANPA chix füi tüile ngokya khoma, chixe amokmok mwot pangwüi tsuakle hüi ang tom.