Read Wancho Naga Pongwang Laipex 4 Bible Online

Pongwang Laipex 4 - Wancho Naga bible

Pongwang Laipex 4

¹Athaxpi Adam chix kakonu Ef füi jip-pomle chang ilaxle she ma naotüi. She-e Kain pux ilaxle thüi: “Kue JOWANPA tokhange khünak tuita kopdaoa.”

²Anaole she-e honao Abel pux. Abel a chun-nyetmix ang achang ikoxle Kain a manzai mix ang achang.

³Hanpak tuita ma Kain-e mae kopkya manzai puamün kha angkya JOWANPA hato tö apüile kox.

⁴Abel-e chuwüi chix manzai kha angkya chun oputwang anutkya tuita JOWANPA hato tö apüile kox. JOWANPAe Abel hia chixe apüikya tö pongle kop,

⁵ikoxle chixe Kain hia chixe apüikya tö pongle chikop. Ikhoma Kain ang müimamale mongtsik dongle thün asik.

⁶JOWANPAe Kain ang thüi: “Nang ang chem mongma tamchu büthüikoxle thün asik?

⁷Nange mwot changle mokdaokoxba, nang a nyinyole tüise; ikoxle nange chichangchizang mwot mokkya khoma ochax a nang luapox ma zuile tüile. Ijae nang kopsele mongtsukya tüile; ikoxle nange ija to lüt angkya oli changle.”

⁸Ifüima Kain-e honao Abel ang thüi: “Künyi pi wunsa khato kahax.” Ile hokhi wunsa khato tüipongma, Kain a honao Abel zan to ka ilaxle chix langle awüt.

⁹Kain ma JOWANPAe atüi: “Hünnao Abel a omaün?” Chixe lan: “Kue müntik. Ku a kunao nyetmix hexle hia?”

¹⁰Ifüima JOWANPAe thüi: “Nange iningkya khomtsikya mwot büthüikoxle mokpu? Jannong alüi ang nyakle akhong ngokya ningle haxkha tokhange hünnao ajie ku hato akhongle ngole.

¹¹Athaxpi nang chak fangma langkya hünnao aji pongle kop ang wikha akakya haxtok makhange nang to thuakzomle changdaoa.

¹²Nange haxtok ma thomo-manzaile changkya zuma, ijae oziak-opua puamünle chang ang müntomüi. Nang a chaxwan tok ma samle ngokya püntüi ang achangle ngoüi.”

¹³Kain-e JOWANPA ang thüi: “Ija ku zothup a kue chiadu tsuak tangle tsakkya changle.

¹⁴Anyix ku nange chaxwan tok tamchu nang miksho angkya jwonle apaopu. Ku a hom-hax chitüile chaxwan tokma samle aham ngoüi, ilaxle owae ku atakle laxpuix, chixe ku langüi.”

¹⁵Ikoxlechu JOWANPAe chix kax to lan: “Ile münchangüi. Owawae nang langle jangchang, olüix ang khüzün anüt lax angkya changpu.” Ikhoma chix apongle changkya ma khünak owaechu chix chilang angkya hanpakma JOWANPAe Kain to münwan kox.

¹⁶Ifüima Kain JOWANPA tuntho angkya achexle pao ilaxle “Nod”, le nyakkya haxtok, Eden zongma handün chikao haxtok to ngo.

¹⁷Kain chix kakonu füi jip-pom ilaxle she ma naotüi üntoxle Inok pux. Ikhato chixe tingtan-nokzing ilaxle ija ang sasün mün ma Inok le nyak.

¹⁸Inok ang Irad pux. Irad a Mehujael hopa ang achang; Mehujael a Methuselah hopa ang achang ilaxle Methuselah a Lamek hopa ang achang.

¹⁹Lamek-e sheko anyi lax. Tuita a Adah ikoxle ata mixcha ang a Zillah le amünkya.

²⁰Adah-e Jabal pux. Chix a müi tsomle nyihom to ngokyabu putong ang achang.

²¹Chix füikya tüita-naopa a Jubal changkya. Chix a thuaput-waxmai angaokyabu putong achangkya.

²²Zillah-e Tubal Kain pux. Chix a khop hia janbu makhange oling-olak pangwüi zingkya mix ang achang. Tubal Kain nanao ang Naamah le amünkya.

²³Lamek-e chix kakonu nyi ang thüi: “Adah hia Zillah nyi ku kax to apalax: Chixe ku to hwonkya khoma, kue naosün tuita langdaoa.

²⁴Kain langkya mün to, mixhuak anüt lax angkya jangchang thüiningle, owawae ku langle jangchangba, puzombün anüt khüzün lax angkya changle.”

²⁵Adam hia hosheko hokhi ang mama lüka naosa tamtüi. She-e thüi: “Kain-e langle awüt daokya lüi ma Zang-e ku ang lüka naosa tuita fadaoa.” Ikhoma she-e chix ang Seth le amün.

²⁶Seth ang lüka naosa tüi. Chixe ija nao ang Enosh le amün. Ipongma khünaknue zangshwom pongma JOWANPA münlün angkya owang wang.