Read Wancho Naga Pongwang Laipex 40 Bible Online

Pongwang Laipex 40 - Wancho Naga bible

Pongwang Laipex 40

¹Ifüima alüile chingo homtoxle Ijip nok wanghompa wangshem anyi, ju-mopa hia sax-mopa nyie wanghompa zongto chisukya mwot mok.

²Ija wangshem nyi füi chix ang tüle mongtsik,

³ilaxle hokhi pangnyi wüi kun ma shole thom. Ija kun a, wanghom hom nyetmix lompa akhokya hom ma tüikya. Jusep chuwüi ikhama thomle tüikya.

⁴Hwom a ija kun mongkha ma okuilole ngole hüi ilaxle lompa-e Jusep a hwom da ningle ngo ang tom.

⁵Jata ija kun khato wangshempa nyie wünmang tuipong ngün, ilaxle wünmang kaxming a malomlom to hüi.

⁶Chemtue Jusep hwom hato swomsa ma nguipuix, chixe hokhi künbüt-mongban ngünle lax.

⁷Chixe hokhi ma atüi: “Anyix a hünkhi huanuma abüt-abankya ningle büthüipu?”

⁸Okhie lan: “Kukhie wünmang tuipong ngünkya changa, ikoxle ija wünmang kaxming apuale fa angkya mix müntüi changa.” Jusep-e thüi: “Wünmang tai angkya a Zang-e tix apuale faüi. Hünkhie ngünkya wünmang ku hama wünhu.”

⁹Idaile ju-mopae thüi: “Ku wünmang ma ku thüntho ma grep zuriak haxtok tüikya,

¹⁰ijama ozu azom tüikya. Ochakbu laikya füi tomle opua pua ilaxle grep ziakle jum.

¹¹Ku a wanghompa laihwon chak ma twonlaxle tüikya. Kue ija laihwon ma grepti-ju fyet ilaxle wanghompa ang koxle ngünle.”

¹²Jusep-e chix ang thüi: “Ija wünmang a ile chang angkya hanpak changle: grep zu azom a nyix azom hanpak changle.

¹³Nyix azom lükya to wanghompa-e nang danle alaiüi, nang thaidaokya alaküi, ilaxle nang ang amipongkya nang mwot chatle mok ang tomüi.

¹⁴Ikoxle ile nang osho müikya hüikya zuma ku wüi taxalak. Ku bama wanghompa hama wün angkya tamchu ija kunkha angkya alaile pao angkya bama chingchalaxle ku to asunkya tüihüi.

¹⁵Ku a Ibri nok haxtok tokya koplaxle paokya changpu, ilaxle ikhatochu kunkha to shole thomtang ku ma thaikya chemchu müntüikya.”

¹⁶Chemtue sax-mopae chix zuipa wünmang taile fakya changtomtale le apale laxpuix, chixe Jusep ang thüi: “Kue chuwüi wünmang tuita ile ngünle: Saxtsap azom kue khang ma akholaxle tüikya.

¹⁷Okho angkya ma mali-mali to atsanlaxle wanghompa hanpak ang an tüikya, ikoxle ibu a osabue saxle ngopuixta le ngünle.”

¹⁸Jusep-e lan: “Ija kaxming a ile changle: Tsap azom a nyix azom hanpak changpu.

¹⁹Nyix azom lükya to wanghompa-e nang danüi ilaxle nang khang dütle awütüi! Ifüima nang zwoptho a pünkho to ashaüi ilaxle osabue nang müi saxüi.”

²⁰Nyix azom füima wanghompa-e chix puxkya nyix mün ma chix nguakhobu pangwüi selaxle fong asüt. Chixe chix wangshem, kun to thomkya nyi alai üntoxle noknu tuntho to apüi.

²¹Chixe ju-mopa ang ngokya wangshempa ang amipongkya chix mwot chatle mok ang tom.

²²Chix wangshempa sax-mopa ang ngokya mix a dingsomle langle awüt. Ibu pangwüi Jusep-e wünmang taile fakya lailaile chang.

²³Ikoxle ija ju-mopa wangsheme Jusep ba ojao texle chitexle alak asam.