Read Wancho Naga Pongwang Laipex 41 Bible Online

Pongwang Laipex 41 - Wancho Naga bible

Pongwang Laipex 41

¹Zanglao anyi füima Ijip nok wanghompa-e, chix a Nail shuanu kax ma ajongle tüikya hexta le wünmang tuita ngün.

²Ipongma tomnut le nünfuikya maihu hunu anüt tikha tokya lai ilaxle fumtsüt ang süt.

³Ifüima mama maihu hunu anüt, tsyatsyenle zazatuakyabu tamlai. Hwom hüi üntoxle pongwang ma laile ngonuikya hozuibu hama ajong.

⁴Zazatuale tüikya maihunubue haxnut-zangfex le tüikya maihunubu saxle awüt. Ile ngünkya füima wanghompa zo.

⁵Chix mikngüt hüile tamchatle jip, ima chuwüi wünmang mama tamngün. Tsaxtong tuita ma tsaxto owan müiwüi müile to-anüt dongkya haxmüi-zangmale münle ngün.

⁶Ifüima mama shushuta le tsaxto anüt dong üntoxle ija a sak-hax winjepe huisho le zokle ashunle tüikya.

⁷Ifüima shushuta le tüikya tsaxtobue owan müiwüi müile tüikya tsaxtobu jok. Ifüima wanghompa zokoxle ija a wünmang ang achangle bang.

⁸Ngainop ningle chix ang tüle mongzangwün, ikhoma Ijip chaxwan ma atüitüi jenu-shipa hia tsingpa-wanpabu komkaile sele asox. Chixe hwom hama chix wünmang wünle kox ikoxle owaechu ija kaxming apuale fa-ang chitho.

⁹Ija ma chix wangshempa, ju-mopa ang ngokya mixe wanghompa ang thüi: “Ku thaikyabu kue anyix texle atakle.

¹⁰Hanpak tuita ma, nang wangshempa ku zuipa kukhi füi nang ang mongtsik dong ilaxle nange kukhi a kun to, wanghom homkha nyetmixbu lompa hwom hom ma shole thompu.

¹¹Ikhato jata kukhie wünmang tuipong ngünpu; ija wünmang ma kaxming malom-malom tüikya.

¹²Ikhato kukhi füi tomle Ibri sün tuita tüikya. Chix a nyetmix khama lompa tuita dapa changkya. Kukhie chix hama kukhi wünmang wünle koxpu, ilaxle chixe ibu kaxming taile fapu.

¹³Chixe chemle akax fapuix ija jaojaole changle hüipu. Nange ku a owangpongkya mwot to chatle süt ang tompu ikoxle ku zuipa wangshempa tuita a dingsomle langpu.”

¹⁴Wanghompa-e Jusep se ang apao, ilaxle chix kunkha tokya momle apüi. Chixe khosex tamchu nyi-za lüile chang üntoxle wanghompa hato ngui.

¹⁵Wanghompa-e chix ang thüi: “Kue wünmang tuita ngünle tüile ikoxle ija kaxming owaechu apuale fa ang müntho. Nange wünmangbu tai ang awanle le ku hama wünle fadaoa.”

¹⁶Jusep-e lan: “Kue le münchang, O, wanghompa, ija tai ang a Zang-e tix apuale faüi.”

¹⁷Wanghompa-e thüi: “Ku a Nail shuanu kax ma ajongle ngopuixta le kue ngün.

¹⁸Ipongma haxnut-zangfexkya maihu hunubu anüt tikha tokya lailaxle fumtsüt ang süt.

¹⁹Ifüimachu maihu hunubu mama anüt lai. Ibu a zazatuale tüikya. Ibu ningle maxmaxshukya maihu kue Ijip haxtok ma otuechu mangün.

²⁰Ibu maxmaxshukya maihubue haxnut-zangfexle tüikya maihubu saxle awüt.

²¹Ile changkya owaechu chiawan, chemthüikoxle hwom a otyatyale tsyatsyenle wüi ngo. Ifüima ku azangle zo.

²²Kue ile chuwüi ngünle: Tsaxto anüt owan müiwüi müile tsaxtong tuita ma dongle münkya ngün.

²³Ifüima mama tsaxto anüt dongle lai, ibu a owan chimüikyabu tamchu sak-hax winjepe zokle huisho le tüikyabu.

²⁴Owan chimüikya tsaxtobue owan müikya tsaxtobu jokle ngün. Kue ija wünmang jenu-shipa hia tsingpa-wanpabu pangwüi hama wünle koxpu. Ikoxle hwom opupuechu ija wünmang kaxming apuale fa ang müntho.”

²⁵Jusep-e wanghompa ang thüi: “Wünmang pangnyi oli tuita hanpakpak wüi changle. Ija a, Zang-e nang füi chemle mok angkya tüipuix, ija apuale fakya changpu.

²⁶Maihu hunu nutkya anüt a zanglao anüt hanpak changle, ilaxle owa müikya tsaxto anüt chuwüi zanglao anüt hanpak changle, hokhi a tuitata wüi changpu.

²⁷Zazatuakya maihu hunu anüt ofüima tikha tokya laikya hia owan chimüikya tsaxto anüt, sak-hax winjepe ashunlaxle tüikya nyi a zanglao anüt kaikuak-saonu le angkya hanpak changle.

²⁸Ija a kue nang füi akax daokya ningle changpu. Zang-e, chixe chem mok angkya tüipuix, ija nang hama aho ngokya changpu.

²⁹Ijip haxtok pangnu khato wüi zanglao anüt a tüle ahak-aluale tüiüi.

³⁰Ifüima lüile zanglao anüt tuinu-nuaknu lekya tüiüi. Ija nuaknu lepongma, ipong müile saxlaxle ngokya zanglao anüt alakle asamüi, chemthüikoxle otui-onuake ting-nok hato thama apüiüi.

³¹Tüle tüinangle ngokya hanpak zanghan pangwüi alakle asamdaoüi, chemthüikoxle hüile ngokya tuinu-nuaknu a tüle chongkya changüi.

³²Nang wünmang anyi ma anaole ngün ang kopkya a, ija tütakoxlechu changle hüi angkya wüile Zang-e tyadaoa ilaxle ija athax füichima changjao changüi.

³³“Athax nange je-hwon hia füingün mikza füikya khünak kamlax ilaxle chix a nang haxwan pangwüi to humele chang ang tomlax.

³⁴Nange chatle chu mama okho-olobu kamlax, ilaxle zanglao anüt ahak-aluale tüipongma kopkya kha angkya manzai othom aga pong athünle thom ang tomlax.

³⁵Ile kop-lo angkya zangpua hüile ngopongma sütling athün angkya hwom ang kax koxlax, ilaxle hwom ang ting-ting to tsax athünlaxle ibu to nyele hungo ang tomlax.

³⁶Ile Ijip nok to tuinu-nuaknu lekya tukma ibu sütling a tsyenle ahankoxüi. Iningle chang koxle khünaknu a woknuak ma münziüi.”

³⁷Wanghompa hia nguakhobue ija zangwün changkoxa le lax.

³⁸Wanghompa-e hwom ang thüi: “Keme Jusep ningle müikya khünak, tuita Zang Chasa füikya mix chemtuechu atak toxüi münchang.”

³⁹Wanghompa-e Jusep ang thüi: “Zang-e nang hama ibibile ahole fa füima chatle nang lailaikya jetüi-hwonlangkya mix owa tamtüiüi.

⁴⁰Kue nang ku chaxwan ma ija mwot to hu ang kamle koppu. Ku wangpünbue nang kax ma lax angkya changle. Hwom hanpakma, ku kaxtom fangfang ma nang kaxtom changüi.

⁴¹Athax kue nang Ijip haxtok ma Gowarnor ang kampu.”

⁴²Chongwang shintop füikya chix chakkhi angkya khoptüt suk üntoxle wanghompa-e Jusep chakkhi ma langle kox. Chixe Jusep to othalixkya nyie awunle kox. Chix dingkux ma liknu wai alikle kox.

⁴³Chixe Jusep ang anyi lükya man-kanlin chix ngale aham ang kox. Chix le pongma nyetmixbue akhongle chix thothoma le ang tom. Hwome: “Lomshanlax-o! Lomshanlax-o!”, le akhong. Ijaningle Jusep a Ijip haxtok ma Gowarnor ang achang.

⁴⁴Wanghompa-e chix ang thüi: “Ku a wanghom changle, ikoxle Ijip haxtok ma, nang-tsai nang-kax ma lüwüi chichangba, owaechu cha-chak nwonle münchangüi.”

⁴⁵Chixe Jusep ang Ijip nok mün koxle Zafenah Paneah le nyak. Chixe Jusep ang kakonu chuwüi lomle kox. She a, Heliopolis tingnu angkya zompu-zangpa Potifera sacha Asenath changkya. Ijip nok wanghompa thotha ang sütpongma Jusep a zanglao 30 changkya. Chixe wanghom khwa dantoxlaxle Ijip haxtok pangkhato wüi aham.

⁴⁶

⁴⁷Zanglao anüt ahak-aluale tüipongma hwom chaxwan ma tüle saxkop-linglole chang.

⁴⁸Ibu pangwüi angkya afoxlaxle Jusep-e ting-ting to pung zinglaxle athün. Pangnu tingnok towüi hozui-onam tokya saile asoxlaxle Jusep tsax komle athün.

⁴⁹Saxziak huanu-huanuma changkya tokhange Jusep-e thüt-zing lejao chichangle sho. Ibu saxjun a tinu kax angkya fix büta le changkya.

⁵⁰Tuinu-nuaknu hüiüi tho angkya zanglaobu mong ma Asenath makhange Jusep ang sasün anyi puxle alai.

⁵¹Chixe thüi: “Zang-e ku ang ku sikngün hia apa hwom alaktsuak ang tomdaoa.” Ikhoma chixe sasün tüichongpa ang Manasseh le mün kox.

⁵²Chixe ile chuwüi thüi: “Zang-e ku ang ku fuxtsüikya chaxwan to su-sabu fadaoa.” Idaile chixe anyi lükya sasün ang Efraim le mün kox.

⁵³Zanglao anüt Ijip noke tüle kop-lole ngokya hanpak ashukle hüi.

⁵⁴Ifüima zanglao anüt tuinu-nuaknu le angkya owang wang. Ibu pangwüi Jusep-e akax daokya ningle changle hüi. Tuinu-nuaknu a pangnu chaxwan towüi le, ikoxlechu Ijip haxtok ma pangnu khato wüi sax ang ling angkya ma chitüi lüwüi tüikya.

⁵⁵Chemtue Ijip nok woknuake max ang thüipuix, hwome wanghompa ma süt jua. Ile chixe hwom Jusep hato taile tsanle apao. Jusep-e chemle akaxpuix ija kax ma laxle chang angkya hwom füi akaxle apao.

⁵⁶Tui-nuak oziamale pangnu khato wüi ule hüi, ikhoma Jusep-e pangnu khatokya pungbu daplaxle Ijip nok ang hang.

⁵⁷Chaxwan pangnu khato wüi oziamale nuaknu lekoxle, Jusep angkya tsax shak ang khünaknu Ijip nok lomle ngui.