Read Wancho Naga Pongwang Laipex 42 Bible Online

Pongwang Laipex 42 - Wancho Naga bible

Pongwang Laipex 42

¹Chemtue Jakop-e Ijip nok to sax tüikya zing atatle laxpuix, chixe sasün hwom ang thüi: “Hünzome tütamün-ngax chiawanle büthüipu?

²Kue atatdaoa, Ijip nok to sax huanuma tüileta. Ekhato kalaxle muale thüingaxchu shakle apüilaxle kwom woknuak ang chiazikle thomlaxkhui.”

³Idaile Jusep hotüi-honao hwom mixhuak bün Ijip nok to nuaklom ang ajo.

⁴Athaxchu chix to tütali le nakchangle zalaxle Jusep honao Benjamin a Jakop-e hwom füi tomle chiajo.

⁵Ile Kanan haxtok ma chuwüi nuaknu lekoxle Jakop sasün hwom khünak mamabu füi tomle Ijip nok to sax shak ang ju.

⁶Jusep a Ijip haxtok ma Gowarnor ang ngolaxle chaxwannu angkya khünaknu ang saxjun hangle ngokya. Chix hotüi-honao hwom hüilaxle chix chitong ma akhuxle shwom.

⁷Chemtue Jusep-e hotüi-honao hwom ngünle laxpuix, chixe hwom sün tsingle lax, ikoxlechu chixe hwom a ojao chitsingkya ningle atsing. Chixe hwom ma kaxzale atüi: “Hünzom ojong nok tokya hüi?” Hwome lan: “Kwom a Kanan chaxwan tokya saxjun shak ang nguipu.”

⁸Jusep-e hotüi-honao hwom süntsingle changkoxchu hwome chix mün ojao chiawan.

⁹Chixe chix wünmangbu texle atak ilaxle hwom ang thüi: “Hünzom a khualop mixbu changpu; hünzom a kwom shonaile tüikya opong awanle kop ang nguikya zyetmixbu changle.”

¹⁰Hwome lan: “Alixachong, ile otuechu münchang. Kwom ikhato nang tsax shak ang da tuita ningle nguipu.

¹¹Kwom pangwüi pasa-tüinao changpu. Kwom a khualop mixbu münchang, kwom a kaxtsing zangwünkyabu changpu.”

¹²Jusep-e hwom ang thüi: “Münchang, hünzom a kwom chaxwan shonaikya opong awanle kop ang nguikya zyetmixbu wüi changpu.”

¹³Hwome lan: “Kwom pangwüi bünba anyi changkya. Kwom a pa tuita sasünbu. Kwom a Kanan nok jao changpu. Kwom kha angkya tuita a zidaoa, ilaxle naoshukpa a apa hama toxdaoa.”

¹⁴Jusep-e lan: “Kue akaxkya ningle wüi changpu. Hünzom a khualop mixbu changpu.

¹⁵Hünzom thwon ile tix lop angkya changle: Kue wanghompa mün ma tsaosaxle thüipu, hünnao naoshukpa ikhato apüile machang tanto hünzom chat ang müntomüi.

¹⁶Hünzom tütapu thüichu chatlax ilaxle chix ikhato apüilax. Chix apüile tix hünzom zangwün chichang hia changkya awan ang kopüi. Ile chichang thüiba, wanghom münlün laxle kue thüipu, hünzom a otsing tomtata ma khualop mixbu wüi changpu.”

¹⁷Ifüima chixe hwom nyix azom kun ma shole thom.

¹⁸Nyix azom lükya to Jusep-e hwom ang thüi: “Ku a Zang thua zakya mix tuita changle, kue hünzom danle apaoüi, ikoxlechu chifün tuita ma.

¹⁹Hünzom sukyabu changpule aho ang, athax hünzom ngokya kun ma hünzom kha angkya tuita dantox angkya wüi changle. Mamabu a chatlax ilaxle homchi to woknuak ma maxle ngokya kakobu hato hünzome shakkya sax wünle laxkox.

²⁰Ifüima hünzome naoshukpa ku hato apüi angkya wüi changle. Ile changkoxle tix hünzom zangwün otsingtsing changpule kue lax ang thoüi. Ile jangchangba hünzom münlang.” Ija to hwom pangnue wüi müiüile mongtsu

²¹ilaxle tata füi zangwünle thüi: “Changle, athaxpi keme kem nao to hwondaokya olüix sikngün apongle ngopu. ‘Ile sütaxchang, ku koxle taxapao’ le chixe thüipongma, keme chix ang chemtukuxle mongsi-ngünle ngünkya dai! Ipongma keme chix kax to ojao chiapa. Ija khokho ma athax kem hato ija sikngün hüile ngopu.”

²²Reuben-e thüi: “Kue ija nao to ile taxhwonhax le thüikoxle hünzome ku kax ang kaxle chithüi. Athax a chix mik amütkya olüix keme koppu.”

²³Jusep-e hwom zangwün komle awan ngo, ikoxlechu hwome ija chitik, chemthüikoxle Jusep-e hwom füi owawa kaxtaile fakya mix makhange tix ataile zangwün.

²⁴Jusep hwom ha angkya atsaile paolaxle sop. Akax ang tsuakle chix mong achen ilaxle chatle chat. Chixe Simeon kop ilaxle hwom pomtho ma khakle aho.

²⁵Jusep-e hotüi-honao hwom nyitsong ma sax awangle sho ilaxle hwom ngun chatle hwom nyitsong ma wüi shole kox ilaxlechu hwome lomba to sax ang saxtsom shole humele kox angkya kaxkox. Hwome ile wüi mokle kox.

²⁶Hotüi-honao hwome, hwome shakkya saxjun füi hwom mantsakbu hünzing, ilaxle hwom achex.

²⁷Hwom wünpomle changkya khato, hwom khama tuitae hwom mantsak ang osüt asüt ang nyitsong dok. Chix ngun a hünkax ma otyatyale bang.

²⁸Chixe hotüi-honao hwom nyakle akax: “Ku angpi ku ngun chatle achat koxle. Hulax, ikhama ku nyitsong kax ma tüile!” Hwom mong athomle dütle abanlaxle tata ma atüi: “Zang-e kem to chem hwonpuix?”

²⁹Chemtue hwom Kanan alople hopa hato nguipuix, hwome apongle hüikyabu pangwüi chix hama wünle kox.

³⁰Hwome thüi: “Ijip nok Gowarnor kwom füi tüle-tüle shix-male ilaxle kwom ang, chix chaxwan shonaile tüikya opong awanle kop ang hüikya khualop mixbu le thüile.

³¹‘Kwom pi müikya khünakbu changpu, khualop mixbu pi münchang.

³²Kwom a pasa-tüinao changpu. Kwom apa ang sasün kwom 12 tüikya. Tuita a zidaoa ikoxle akiaküsa a apa füi kwom chaxwan to toxdaoa’ le kwome apuapu.

³³Ikoxle ija mixsüne, kwom zangwün chichangkya hia changkya ile changkox tix awanüi le thüilaxle mixhuak tuita a chix füi tomle ngo ang tom ilaxle kwom bibi a hünzom woknuake zingokyabu hato süt apüi angkya kuxma hom to chat ang tompu.

³⁴Kwome chix hato nao oshukma apüile koxkox tix kwom khualop mixbu chichang hia changpuix awan angkya ta. Ile changkoxle tix chixe kwom nao chatle koxüi ilaxle kwom ang thalexle chang ang tomüita.”

³⁵Ilaxle hwome mahünhün dokkya thoma pangnu hün ma wüi ngun thwopbu bang. Ija ngun thwopbu ngünlaxle hwom füi tomle hopa chuwüi aban.

³⁶Hopae hwom ang thüi: “Hünzome ku ang naosom pangwüi naxmaxlax le texpia? Jusep nang maxdaoa, Simeon nang maxdao; athax hünzome Benjamin chu paoüi! Maxkya ku mong maxngolax angpu!”

³⁷Reuben-e hopa ang thüi: “Kue nang hato Benjamin chatle chichat thüiningle nange kusa nyi langlax. Chix a ku füifüile danhüi. Kue tütale changkoxchu chix a chatle apüi angkya jaojao.”

³⁸Ikoxlechu Jakop-e thüi: “Kusa nang füito pao ang müntsuaküi; hotüi nang zidao, athax chix, chix tata wüi changle. Lomba to chix to tütale wüi changtüi. Ku a azule maxün ilaxle nange ku hato mongmax angkya jang-apüi thüiningle ku zichu zitüilax.”