Read Wancho Naga Pongwang Laipex 45 Bible Online

Pongwang Laipex 45 - Wancho Naga bible

Pongwang Laipex 45

¹Jusep-e chix dabu tunthoma mongnu adünle adu hüikya tsyen ang chithole changkya khoma chixe hwom pangwüi chix nui angkya laile pao ang kaxkox. Ile chix owa changkya hex, Jusep-e angaile wünpongma hwom khama mix owachu chitüi.

²Jusep akhongle sopkya Ijip khünakbue atat, ilaxle ija kax wanghom hato apüi.

³Jusep-e hotüi-honao hwom ang thüi: “Ku a Jusep changpu. Apa ozün ma tüilaxma?” Ikoxlechu hotüi-honao hwome ija atat pongma, hwom pangwüi abütle changkya khoma hwome kaxlan ang chitho.

⁴Ifüima Jusep-e hwom ang thüi: “Oman, ku hato soxle hüihüi.” Ijama hwom chix hato soxle hüi, Chixe hwom ang thüi: “Hünzome Ijip nok to hangle apaokya Jusep a ku changpu.

⁵Ami ku hangle changdaokya khoma athax hünzom ang mongmale taxngo. Hünzom thoma achale khünaknu khosün angkya hanpakma ku ikhato ngui ang tomkya a Zang mwot changle.

⁶Ija a chaxwannu hato hüile ngokya tuinu-nuaknu le angkya zanglao anyi-lükya tix changpu; chatle chu zanglao aga atale tüile; ija tuktuk ma thomwot-manzai hia puamün chemchu müntüi angkya changle.

⁷Hünzom üntoxle hünzom sixlibu pangwüi ija kaikuak-saonu lepongma azangle ngo angkya hanpakmale hünzom thoto pangnu atha-anyemle bang angkya hanpakmale ku ikhato achale Zang-e akatkya changpu.

⁸Idaile ku ikhato ka ang tomkya a otsingtomtata ma hünzom münchang ikoxle Zang tix changpu. Chixe ku a wanghompa füi atakya mix ang zingle dandaoa. Chix chaxwan athax pangwüi ku chak ma tüile. Ijip haxtok apün angkya khünak anyi-lükya a ku changpu.

⁹“Athax hünzom momle chatlax ilaxle apa hama chix sasün Jusep kaxho ile laxkox: ‘Zang-e ku a Ijip nok apünkya mix ang zingle thomle; alüile hanhom chingo homtoxle ku hato kahüi.

¹⁰Nang, Goshen haxsha ma, nangsu-nangsa hwom, nang chunbu, nang zwonbu, nang maihubu, ilaxle nang tuina pangwüi füi, ku zui ma ngo ang thoüi.

¹¹Nang Goshen ma jangngo thüiningle, kue nang to humele tsuaküi. Athax chuwüi tuinu-nuaknu kaile le-ang zanglao aga jao tüile. Nang, su-sabu hia tsom-pombu füi woknuak ma maxle ngo angkya to kue münlua.’”

¹²Jusep-e chatle chuwüi thüi: “Athax hünzom pangnue, Benjamin, nange chuwüi ku a Jusep changpule ngün ang tsuaküi.

¹³Ikhato ku chemtukuxle zax-zangle ngopuix tamchu hünzome ngünkya pangnu bama apa hama wünle laxkox. Ifüima momlax, nonole apa ikhato kat-hüi.”

¹⁴Chixe honao Benjamin to künle kop üntoxle sop ang süt; chixe künkya zuma Benjamin chuwüi sop.

¹⁵Ifüima chix sopngale hotüi-honao hwom pangnu füi tun apong. Hotüi-honao hwome chix füi zangwün ang süt.

¹⁶Chemtue Jusep hotüi-honao hwom nguikya kaxho wanghom khwa to nguipuix, hwom pangwüi ang mongmüi.

¹⁷Chixe Jusep ang thüi: “Hüntüi-hünnao hwom ang müibu ma sax hünzing laxle tix Kanan to chat ang tomkox.

¹⁸Hwome hwom hopa hia kako homkha pangwüi ikhato kat ang tomkox. Kue hwom ang Ijip haxtok amüimüikha koxüi. Hwom okhonguikya boma ngaxchu onüi tüinangle ngo ang tsuaküi.

¹⁹Hwom kakobu, hopa hia naosom hwom kat angkya kuxma, maihu-kanlinbu Ijip nok tokya wüi laxlaxtox angkya akaxlax.

²⁰Hwome mamixbu danle tox angkya bama mongma angkya chemchu müntüi. Ijip chaxwan ma sümüikya kha haxtok hwom kux ang changüi.”

²¹Jakop sasün hwome ija lailaile mok. Jusep-e hwom ang maihu-kanlinbu kox ilaxle lomba to sax angkya sütbu kox. Ibu chixe wanghompa kaxtom ma mok.

²²Chixe hwom pangwüi ang lüinyibu chuwüi kox. Chixe Benjamin ang khop ngunkhix 300 boma lüinyi aga kox.

²³Chixe hopa hato Ijip haxtok ma tüikya bwot-ba sümüimüi mantsak bün ma awangle hünzing laxle an hia mama osüt-olingbu awün. Lomba to hwom sax angkya sütling chuwüi kox.

²⁴Chixe hotüi-honao hwom hom to chat ang tom ilaxle hwom ang lomba to ahe-akakkya chitüi angkya kaxkhün koxle akaxle awün.

²⁵Hwom Ijip chaxwan dantoxlaxle hopa hato Kanan to chat.

²⁶Hwome hopa ang thüi: “Jusep a ozün ma tüile. Chix a Ijip haxtok apün ang ngole tüile!” Jakop ang khangkho sam ilaxle hwom zangwün to mongong ang chitho.

²⁷Ikoxlechu chemtue hwome chix ang, Jusep-e hwom füi akaxkyabu wünle koxpuix tamchu hwom Ijip nok to laxlaxle kat angkya Jusep-e awünkya maihu-kanlin ngünle laxpuix, chix ang khangkho ngai.

²⁸Chixe thüi: “Ku sasün Jusep ozün ma wüi tüile. Athaxpi ku chix hato kat-hüi. Ku maziziba wüi kue chix ngünle tox angkya changle.”